بے شک ھرنائی ءُ سیوئی ءِ میان ءِ ریل دگ ءِ اژنوکی پہ بلوچستان ءِ دُور ءُ دراجیں مردمانی حاترا نیکیں پالے کہ چریشی ءِ اے دگ ءِ مردماں رو ءُ آ ءِ بازیں آسراتی رست کنت ۔ اے دگ ءِ بنگیجی گوستگیں روچاں بلوچستان ءِ سر وزیر نواب ثناء اُﷲ زھری ءَ گوں کمانڈر ذرباری کمانڈ ءُ ایندگہ دمگی ( صوبائی ) وزیراں کت ۔بلوچستان ءِ مھلوک ءِ اے دیریگیں گِلّہ ءُ لوٹے بوتگ کہ پاکستان ریلوے بلوچستان ءِ مردماں چہ ریل ءِ آسراتیاں ڈالچار کنگان اَنت پرچکہ کوئٹہ ، لاہور ، راولپنڈی ءُ پشاور ءِ ریل ءِ آسراتی پہ بلوچستان ءِ مھلوک ءَ دیگ نبوتگ اَنت بلکیں اے آسراتی ایندگہ دمگانی ( صوبہانی ) مردمانی حاترا اَنت ۔ گوستگیں وھداں پاکستان ریل ءَ کراچی ۔ راولپنڈی دگ ءَ گہتر کنگ ءِ حاترا ارباں کلدار ھرچ کت بلے پہ بلوچستان ءَ کلدار ے ہم ھرچ کنگ نبوت۔ ھمے درگت ءَ بائدیں کوئٹہ ۔ زاھدان کراچی ، لاہور ءُ پشاور ءِ میانجی ءَ ریل ءُ آئی ءِ دگاں گہتر کنگ بوتین اِنت ۔بلے ایشی ءِ بدل ءَ چو پی آئی اے ءِ وڑا بلوچستان ءَ آؤکیں بازیں ریل بند کنگ بوت اَنت ۔اے درچ ءَ پاکستان ریلوے بائدیں وتی ڈبہاں بزانت ءُ کوئٹہ زاھدان ءُ کوئٹہ چمن ءِ حاترا ریل ءِ رو ءُ آ ھگے بنا کنگ بہ بیت بلکیں اے روءُ آ ھمروچ بہ بیت پرچکہ چرے ریل ءِ کاراں پاکستان ءِ کاروباری سیادی یے گوں افغانستان ءُ ایران ءَ بوت کنت ۔ چہ ریل ءِ اے دگاں ما افغانستان ءُ ایران ءِ کاروباری مردماں اے نیمگ ءَ دلگوش کت کنیں ۔چرے دگاں زمین بندیں میانی ایشیا ءِ ملک گوں افغانستان ءَ ھوار پاکستان ءَ معاشی ءُ مالی نپ ہءُ سیتے بخشات کن اَنت اگاں گوادر اشک آباد دگ جوڑ بوت گڈا اے دمگ آکبت ءِ مالی ءُ بیپاری بنزیاہ بوت کنت ۔ ھمے نوبت ءَ حکومت اگاں سپیزنڈ ریلوے اسٹیشن ءَ بگر داں کچلاک ءَ ، شہرءِ تہا شٹل ریل ءِ بندوبستے بکنت گڈا چریشی ءَ نہ ایوکاشہرءِ دو جتائیں سُرگ وت ماں وت ءَ ھوار بنت بلکیں شہرے مُچی ءُ مانگیشی ہم کم بنت ۔ریل ءِ اے سفر شہرءِ تہا رو ءُ آ
( Trafic ) ءِ جیڑھاں نہ ایوکا کم کنت بلکیں چریشی ءَ ماحول گہتر بوت کنت پرچکہ یک انجنے بازیں مردمے یکیں وھد ءَ شہرے یک سرے ءَ چہ دومی سرا بارت۔دومی ریل ءِ سفر دنیا ءِ ارزان تریں وسیلہ اِنت ءُ ایوڑا کوئٹہ ءِ جاہ منندانی جان چہ 1960 بساں چُٹ ات ۔
اے درچ ءَ مستریں زمہ واری دمگی ( صوبائی ) حکومت ئیگ اِنت کہ پاکستان ریل ءِ سرا زور پر بدنت کہ آ کوئٹہ شہرءِ تہا شٹل ٹرین ءِ رو ءُ آ ءِ بنا بکنت تنکہ کوئٹہ ءِ جاہ مننداں چو پاکستان ءِ ایندگہ مردمانی وڑا سفر ءِ ارزان ءُ کم نیادیں وسیلہ یے برس ایت ۔پریشی ءَ ریل ءِ حاکماں ھچ وڑیں جکانسری ءِ زلورت نہ اِنت پرچہ کہ شہرءِ تہا چہ پیسرا ریل ءِ دگ ، ریل ءِ انجن ،ریل ءِ ڈبہ ءُ ریل ءِ کاردار ہست ءُ ساڑی اَ نت ۔
اے درچ ءَ اگاں ریل ءِ زمہ واراں کارے کنگی اِنت گڈا آ زاھدان کوئٹہ ءِ دگ اِنت پرچکہ اے دگ ءُ ءُ اے دگ ءَ رو ءُ آ کنوکیں ریل عالمی سند ءِ نہ اَنت اگاں حکومت زاھدان کوئٹہ دگ ءَ جوان ءُ گہتر کنگ ءَ سوبین بوت گڈا پاکستان ءِ ریل ءِ بود ءُ بالاد عالمی سند ءِ بیت ءُ چریشی ءَ بیپار ءُ کارگو ءِ کارداں یورپ ءَ شنگ ءُ تالان بوت کنت ءُ اے پیم ءَ پاکستان ءِ معیشت ، مال ءُ بیپار باز دیم روی کرت کنت۔
حکومت گوادراءَ گوں زاھدان ءَ ریل ءِ دگ ءِ وسیلہ ءَ ھوار گیجگ ءِ حاترا ھچ وڑا دل ستک نہ اِنت اگاں کہ اے وھدءَ گوادرءَ را پاکستان ءِ بیپار ءِ دل گشگ بوھگان اِنت ۔اگاں گوادر ءُ زاھدان ءِ یک گچینیں جاہے ءَ ریل ءِ دگ ھوار گیجگ بہ بنت گڈا آکبت ءَ ایران ہم پہ وتی بیپاری کاراں اے دگ ءَ کار مرز کت کنت ۔ پہ ایران ءَ چہ چاھبار ءِ تیاب ءَ پہ گوادر ءِ تیاب ءَ آھگ چہ ایندگہ دگ ءُ راہاں نزیک تر اِنت۔مکران ءِ اے دوئیں تیابانی دوری ایوکا 72 کلو میٹر اِنت۔
اے درگت ءَ بائدیں پاکستان ریل وھدءِ جاوراں سرپد بہ بیت ءُ کوئٹہ زاھدان ریل ءِ دگ ءَ گہتر کنگ ءِ حاترا گامگیج بزور ایتءُ اے دگ ءَ عالمی رو ءُ آ (Transport )ءِ سند بیاریت ءُ سر بکنت ۔
اے درگت ءَ بائدیں بلوچستان ءِ دمگی حکومت ءَ ھوار سنیٹ ءَ قومی اسمبلی ءَ بلوچستان ءِ جہگیر بنجاہی حکومت ءُ پلاننگ ڈویژن زور پر بدی اَنت کہ آ پہ اے کار ءِ حاترا آؤکیں بجٹ ءَ ذر ءُ فنڈ بگیشین اَنت پرچکہ اے کار ایوکا پہ بلوچستان ءِ مھلوک ءَ نہ اِنت بلکیں مُچ پاکستان ءِ مھلوک ءِ حاترا اِنت ۔اگاں ھُرت چارگ بہ بیت اے کار ءُ پراجیکٹ پہ پاکستان ءَ چہ لاہور ءُ ایندگہ شہراں جوڑ کرتگیں رو ءُ آ ءِ کاراں دہ سری جوان تر ءُ پاکستان ءِ معیشت ءِ حاترانپ ءُ سیتی اِنت ۔
پدا اے کار ءِ ھرچ ءُ درچ ہم چہ میٹرو ءُ اوینج لائن ٹرین ءِ ھرچ ءُ درچاں گیشتر بہ بنت بلے نپ ءُ سیتے چہ اے پروجیکٹاں دہ ھمنچو بوت کن اَنت ۔
