دھرم شالا میں کھیلے جانے والے ورلڈ ٹی ٹوئنٹی میں نیوزی لینڈ نے آسٹریلیا کو شکست دے کر اس ٹورنامنٹ میں مسلسل دوسری کامیابی حاصل کر لی ہے۔۔

آسٹریلیا کی طرف سے 143 کے ہدف کے تعاقب میں اسلام آباد سے تعلق رکھنے والے عثمان خواجہ اور دھواں دھار بیٹنگ کی شہرت رکھنے والے شین واٹس نکلے۔ عثمان خواجہ جو اپنا پہلا ٹی ٹوئنٹی میچ کھیل رہے تھے، انھوں نے پہلے دو اوور میں چار زبردست چوکے لگا کر اپنی فارم اور اپنی کلاس کی جھلک دکھائی۔ نیوزی لینڈ کی طرف سے ایڈم ملنے اور کورے اینڈرسن نے بولنگ شروع کی۔ پہلے تین اوور میں عثمان خواجہ نے 14 گیندوں کو سامنا کیا تھا اور 24 رنز بنائے تھے۔ جبکہ دوسری طرف واٹس صرف ایک گیند کا سامنا کر پائے تھے۔ پانچ اوور کے ختم ہونے پر آسٹریلیا نے 41 رنز بنا لیے تھے۔ شین واٹسن چھٹے اوور کی دوسری گیند پر کیچ ہو گئے۔اس کے بعد کپتان سمتھ میدان میں اترے لیکن وہ باہر نکل کر شاٹ کھیلنے کی کوشش میں سٹمپ آؤٹ ہو گئے۔ اس وقت سکور بورڈ پر آسٹریلیا کا سکور 51 رنز تھا۔ ابتدائی اوور کی تیزی کے بعد عثمان خواجہ کی بیٹنگ کچھ ماند پڑ گئی۔ آٹھویں اوور میں ایک تیز رن لیتے ہوئے عثمان خواجہ رن آؤٹ ہو گئے۔ دس اوور مکمل ہونے پر آسٹریلیا کا مجموعی سکور 66 رنز تک پہنچ پایا تھا۔ گیارہویں اوور کی پہلی ہی گیند پر ڈیوڈ وارنر آؤٹ ہو گئے۔ نیوزی لینڈ نے جب 14 اوور مکمل کیے تو آسٹریلیا کو 54 رنز 36 گیندوں پر درکار تھے اور مچل مارش اور گلین میکسویل کریز پر تھے۔ پندرہویں اوور کی چوتھی گیند پر مچل مارش نے سیدھا چھکا لگایا جو 101 میڑ دو کیا اور اسی اوور کے ختم ہونے پر آسٹریلیا نے اپنے سو رنز مکمل کیے۔ 16ویں اوور کے شروع میں میکسویل بھی اونچی شاٹ لگانے کی کوشش میں کیچ ہوئے۔ انیسویں اوور میں مچل مارش جو نیوزی لینڈ کے لیے خطرہ بن رہے تھے آؤٹ ہو گئے۔ انھوں نے سترہویں اوور میں دو چھکے لگائے تھے اور اسی کوشش میں باونڈری کے قریب آؤٹ ہوئے۔ اس کے بعد مچل میکلینگھن نے ایک ہی اوور میں اپنی سلو گیندوں سے دو کھلاڑیوں کو آؤٹ کر دیا۔ میچ آسٹریلیا کی پہنچ سے دور نظر آنے لگا۔ آخری اوور میں آسٹریلیا کو 19 رنز درکا تھا اور ان کی تمام امیدیں فاکنر پر تھیں لیکن وہ اس اوور کی پہلی گیند پر کیچ ہو گئے۔ اس موقع پر میچ نے ایک اور کروٹ بدلی جب نیول نے پہلی چھکا لگا دیا۔ لیکن ایک گیند بعد اینڈرسن آؤٹ ہو گئے۔ قبل ازیں دھرم شالا کی خنک فضاؤں میں آسٹریلیا اور نیوزی لینڈ کے درمیان ہونے والے میچ میں نیوزی لینڈ کی ٹیم کی بیٹنگ ٹھنڈی ٹھنڈی رہی اور وہ 20 اوور میں 142 رنز بنا پائے۔ ابتدا میں مارٹن گپٹل کے بلے سے کچھ شعلے نکلتے دکھائی دیے لیکن ان شعلوں پر آسٹریلیا نے جلد ہی قابو پالیا۔ نیوزی لینڈ نے اس میچ میں آسٹریلیا کے خلاف ٹاس جیت کر پہلے بلے بازی کرنے کا فیصلہ کیا ہے۔ نیوزی لینڈ کی طرف سے مارٹن گپٹل اور کین ولیمسن نے اننگز کا آغاز کیا اور پہلے ہی اوور میں دونوں کھلاڑیوں نے ایک ایک چوکا لگا کر مجموعی طور پر نو رن بنائے۔ ناتھن کولٹر نائل نے آسٹریلیا پہلا اوور کرایا۔ واٹسن نے نیوزی لینڈ کے پانچویں بلے باز ٹیلر کو آؤٹ کیا اور اس کے بعد لوک رنونچی بھی ایک آسان کیچ میکسویل کے ہاتھوں میں دیے بیٹھے۔ میچ کے تیسرے اوور میں ایشٹن ایگر کو بال کرنے کے لیے بلایا گیا اور اس اوور میں گپٹل نے تین چھکے لگائے۔ اس اوور میں چوکے ءگانے کی باری ولیمسن کی تھی، چنانچہ انھوں نے دو زبردست چوکے لگائے۔ پانچوں اوور کی چوتھی گیند پر گپٹل کے ایک چھکے کے ساتھ نیوزی لینڈ نے 50 رنز مکمل کیے اور پاور پلے کے اختتام پر نیوزی لینڈ کا مجموعی سکور 58 رنز تھا۔ تیسرے اوور میں ہی نیوزی لینڈ کا سکور 33 رنز ہو گیا تھا اور گپٹل نے 16 گیندوں پر 28 رنز بنائے تھے۔ میچ کا آٹھوں اوور کرانے کے لیے جیمز فاکنر کو بلایا گیا اور ان کی پہلی ہی گیند پر گپٹل نے چھکا لگانے کی کوشش کی اور باؤنڈری لائن سے بالکل قریب میکسویل نے دوڑتے ہوئے ان کا کیچ پکڑا لیا۔ گپٹل نے 39 رنز بنائے۔ گپٹل کے بعد دوسرے اوپنر کپتان ولیمسن میکسویل کو سیدھا چھکا لگاتے ہوئے باونڈری پر کیچ ہو گئے۔ انھوں نے 20 گیندوں پر 24 رنز بنائے جن میں چار چوکے بھی تھے۔ اس وقت مجموعی سکور 61 رنز تھا۔ نیوزی لینڈ کو تیسرا نقصان 76 کے سکور پر ہوا گیارہویں اوور میں ہوا جب کوری اینڈرسن بھی سیدھا چھکا لگاتے ہوئے کیچ ہو گئے۔ اس موقع پر آسٹریلیا کی گرفت میچ پر مضبوط ہوتی دکھائی دی رہی تھی۔ کالن منرو آؤٹ ہونے والے پانچویں کھلاڑی تھے وہ 23 رنز سکور کر سکے۔ منرو جو ’ہارڈ ہٹر‘ کی شہرت رکھتے ہیں صرف دو چوکے لگا سکے۔ اس سے پہلے نیوزی لینڈ کے کپتان کین ولیمسن نے ٹاس جیت کر پچ کے بارے میں اپنی رائے دیتے ہوئے کہا کہ یہ خشک لگ رہی ہے اور اس پر بیٹنگ آسان ہو گی۔ اس میچ کی ایک اور خاص بات یہ ہے کہ آسٹریلیا کی طرف سے پانچ کھلاڑی اپنے ٹی ٹوئنٹی کیریئر کا آغاز کر رہے ہیں۔ ان میں اسلام آباد میں پیدا ہونے والی عثمان خواجہ بھی شامل ہیں۔ نیوزی لینڈ نے بھارت کے خلاف بھی اپنے پہلے میچ میں ٹاس جیت کر پہلے کھیلنے کا فیصلہ کیا تھا لیکن وہ ایک بڑا سکور کرنے میں کامیاب نہیں ہوا تھا۔ لیکن بھارت کی ٹیم کو مقررہ 20 اوور سے قبل ہی آؤٹ کر کے نیوزی لینڈ نے آخر میں یہ میچ با آسانی جیت لیا تھا۔ آسٹریلیا کا اس ٹورنامنٹ میں یہ پہلا میچ ہے۔ یہ دونوں ٹیمیں ٹی ٹوئنٹی ورلڈ کپ کا اعزاز جیتنے میں کامیاب نہیں ہو سکی ہیں۔ آج کا دوسرا میچ انگلینڈ اور جنوبی افریقہ کے درمیان ممبئ میں کھیلا جائے گا۔ انگلینڈ بھی اپنا پہلا میچ ویسٹ انڈیز سے بری طرح ہار چکی ہے اور اس کے لیے میچ جیتنا ضروری ہو گیا ہے۔