گوادر ءِ دیمروئی ءِ بنداتی دروشُم 1993 ء ءَ گندگ بوت کہ گوادر ءِ عکس گوں بُرزیں ماڑیاں ماں روتاکاں پیش دارگ بوت بلے آئی ءِ راستیں دیمروئی ءِ گامگیج 1992 ءءَ نواز شریف ءِ سیمی حکومت ءِ وھداں دیم ءَ آتک اَنت چرآئی ءَ پد جنرل مشرف ءَ گوادر چین ءِ دست ءَ دیمروئی کار ءَ رھبند دیم ءَ آؤرت اَنت کہ آئی ءَ تربت پل اژنوک جوڑ کت ( اولی رند ءَ نواب بگٹی ءِ دور ءَ جوڑ کنگ بوتگ اَت ) میرانی ڈیم بست ، گوادر پورٹ جوڑ کت ۔ 1998 ء ءَ بلوچ گہہ ( مزاحمت ) ہم سر زاھر ءُ پدّر بوت کہ 2004داں وتی زراب ءَ آتک ۔ھمے درچ ءَ ا بلوچ گہہ ، چین ءُ ایندگہ مُلکانی نیّت ءُ ارادگانی پُشت ءَ میانی ایشیاءِ یک عکس ءُ دروشمے شہ زانت( دانشور ) راجکار، راجکاریں کاردارانی تہا پرشت ءُ دیم ءَ آتک کہ ھمے پش درا ھنچو بوت کہ بازیں ( وتی منّا ) بلوچ راج دوست وتی حک ءُ پکائیں دروشم ءَ بلوچ ءِ دیم ءَ آتک اَنت۔ ( اے کسانیں آسرے نہ اِنت ) ھمے میان ءَ چاھبار پورٹ جوڑ کنگ بوت ءُ نوں وت چین ءَ وتی اولی ٹرین ہم گوادر ءِ ودارکنگ ءَ پیسر تہران ءَ دیم دات ۔ایشیا ، اسرائیل ءِ بے ترک ءُ تواری ، شام ، مصر یمن ، بحرین ءُ پدا سعودی ءُ ایندگہ مُلک آشوبی زرابے ءِ آماچ اَنت دومی نیمگ ءَ امریکہ ءَ گوں ایران ءَ وتی 37 سال ءِ دُژمنی ھلاس کت اَنت گوں آئی ءَ مھر ءُ دوستی ءِ سفر ءِ بنا کتگ ۔ اے درچ ءَ ایران ءِ سرا دراہیں بندی ھلاس کنگ بوتگ اَنت۔دومی میانی ایشیا ءِ مُلکاں گوں ایران ءَ ھچ وڑیں بدی ءُ بدواھی یے نیست بلے اے دست ءَ سعودی عرب ءَ گوں پاکستان ءَ ھوار34 ملکی لشکری سنتے ھڈ داتگ کہ شہ زانتانی گُشگ ءِ رِدا ایوک ءَ ایران ءِ وشنیاتکی ءَ ھڈ دئیگ بوتگ پرچکہ اے تپاکی ءِ تہا یوک ءَ ایران ءُ شام دو ھنچیں مُلک اَنت کہ ایشی ءِ تہا ھوار نہ اَنتءُ اے دوئیں مُلک شیعہ مُلک اَنت ۔اے زید ءِ تہا 2020 (دو ھزار بیست ) ءَ پاکستان جہد ءَ اِنت کہ گوادر پورٹ ھرچ وڑا جوڑ کنگ بہ بیت ءُ بلوچ گہہ ایشی ءَ داں ھمے سال ءَ دارگ ءِ جہد ءَ اِنت ۔اے بابت ءَ جہد کنگ بیت کہ 2020 ءَ ساری سعودی سنتیں مُلک ایران ءِ سرا اُرش بکن اَنت۔
پدّر اِنت کہ کَنگ ءِ شکار گوں آپ ءِ لُردی ءَ اِنت اگاں اے درچ ءَ آپ لُرد کنگ بوت گڈا گوادر یکبرے پدا پہ چین ءُ میان ایشیائی مُلکاں گوھر قیمتی یے بوت کنت ۔
ھمے نیّت ءَ اسحاق ڈار ءُ چوھدری نثار پاک چائنا کوریڈور ءَ را رند پہ رندءَ Game Changer گُش اَنت اگاں کہ نوکیں جاوراں چو گندگ نہ بیت بلے چو کہ پاکستان سعودی سنت ءِ تہا ھوار اِنت اے سنت ءَ دراہیں ڈپلومیٹک ھنر ءُ شیواری کار گرگ بنت پدا حدا ءِ مھربانی ءَ عرب ’’ سمجھداریں ‘‘ مردم اَنت ۔ اے گوھر قیمتی ھما وھد ءَ دست ءَ آتک کنت کہ اے دمگ ءِ آپ لُرد کنگ بہ بیت بلے اگاں سعودی عرب ءُ ایران ءِ میان ءَ دوستی ءُ راستی بوت گڈا پاک چائنا کوریڈور ءِ حال چے بیت ؟ اے گپ انت کہ ایشی ءِ سرا بائدیں بلوچ شہ زانت ءُ پیش بندی کنوک چار ءُ بچار بکن اَنت ۔
