اے جوانیں گپے کہ لہتیں روچ ساری میرانی ڈیم زدگانی چیزے مردماں آہانی چہ ڈیم ءَ کپتگیں لوگ گسانی مُز رستگ اَنت چد ءُ پیش اے
د مگ ءَ بی این پی عوامی نیشنل پارٹی ءُ بی این پی مینگل ءِ بھتام ءُ گلہّ ھمیش بوتگ اَنت کہ بنجاہی حکومت اے نیمگ ءَ دلگوش گور نہ کنت بلے ڈاکٹر عبداُلمالک ءِ حکومت ءِ دور ءَ بنجاہی حکومت ءَ میرانی ڈیم زدگانی لوگانی ( بازیں مردمانی واھگ اَت کہ مچکدگانی مُزّ پیسرءَ برس اَنت ) مُزّ ڈسٹرکٹ گورنمنٹ ءَ دات اَنت ءُ چد ءُ شریں گپ چے بیت کہ اے وھداں ڈی سی تربت ءُ تحصیلءِ آفیسر ءِ وتی جند ءِ سیادی گوں ھمے میرانی ڈیم زدگان اِنت برزی سند ءَ پیسریگیں صوبہ ءِ وزیر اعلیٰ ءِ سیادی ہم گوں ھمے تحصیل ءَ اِنت چد ءُ آدیم بلوچستان ءِ ایڈوکیٹ ءِ جنرل ءِ سیادی ہوں گوں میرانی ڈیم زدگان انت ۔اے درگت ءَ بائدیں مردمانی گِلہّ ءُ زنگ ھلاس بوتین اَنت پرچکہ گوشت ءُ کارچ دوئیں آھاں دست ءَ اَنت بلے انوں ہوں مردمانی گِلہّ ءُ زنگ ھلاس نہ اَنت اے درچ ءَ کہ مستریں زنگشانی بوھگان اِنت کہ ڈی سی تربت ، ایڈوکیٹ جنرل ءُ تحصیل ءِ بازیں آفیسر وت ماں وت نہ ایوک ءُ یکیں میتگ ئیگ اَنت بلکیں وت ماں وت ءَ گوستگیں وزیر اعلیٰ ءِ کس ءُ عزیز اَنت اے گپ گیش تر نودز،چُربک ، گوڑی ، سولبند ءُ شے کہن ءِ جاہ منندیانی نیمگ ءَ دیم ءَ آھگان اِنت کہ دمگی برزی سند ءَ واک داریں دراہیں مردمانی سیادی گوں ناصر آباد ءَ انت ءُ اے مردم گیش تر وتی سیاد ءُ عزیزاں نپ ءُ سیت پُجارینگان اَنت اے گپ ءَ اول اے
لیکہ رد کنت کہ گوستگیں وزیر اعلیٰ ءِ سیادی ءُ جامنندی ھچ وڑا ناصر آباد ءَ نہ اِنت ءُ دومی اگاں ایڈوکیٹ جنرل ءُ ڈی سی اگاں وت ماں وت ءَ کس ءُ عزیزاَنت گُڈا اے چے وڑا ھرابیں گپے بوت کنت ، کس ءُ عزیزی جوانیں ءُ شریں گپے ۔ ا ے درگت ءَ اے دمگ ءِ مردم بائدیں وش بہ بنت پرچکہ درآمدیں مردمے پہ درآمدء َ آ وڑ پگر ءُ حیال نہ کنت ءُ پدا وتی کہ کُشیت گڈا روچ ءِ سرا دور نہ دنت۔دومی اے گِلہّ ءَ ہم جوازے نیست کہ ڈاکٹر عبداُلمالک ءَ ڈی سی ، چیف آفیسر ءُ ایڈوکیٹ جنرل وتی مردم آؤرتگ اَنت ادا کسے گُشت کنت کہ بی این پی عوامی ءِ دور ءَ سیّد احسان شاہ ءَ دیگر ءُ درآمد یا نیشنل پارٹی ءِ مردم آؤرتگ انت؟ اگاں ناں گڈا ڈاکٹر عبداُلمالک پرچہ گناہ گار اِنت ؟ دگہ گِلہّ یے اے کنگ بوھگان اِنت کہ ڈی سی ءُ ایڈوکیٹ جنرل وتی پارٹی ءُ کس ءُ عزیزانی نام مُزّانی لسٹاں مانگیتکگ اَنت ءُ ایندگہ پارٹی کارندہ ، غریب بزّگارانی نام در کتگ اَنت ۔ اے ہم پوچیں گپے پرچکہ اگاں اے وڑ کنگ بوت اِنت گڑا اگاں غریب ءُ بزّگاراں زھرشانی یے کت نہ کت گڈا بی این پی عوامی ءُ مینگل کجام ریا ءَ گٹ اَنت کہ آھانی نیمگ ءَ ھچ وڑیں زھر شانی یے دیم ءَ نہ یتکگ؟ اگں اے وڑیں زلمے گوں تحصیل ءِ مردماں بوت اِنت گڈا گوستگیں 17 سالاں اے دمگ ءِ جھگیر واجہ سیّد احسان شاہ ھچبر بے ترک ءُ توار نہ بوتگ اَت آئی ءَ
پہ وتی ووٹراں زلور توارے جمبینتگ اَت اگاں ناں اے درگت ءَ کورٹ ءَ شتگ اَت تنکہ آئی ءِ پارٹی کارندھاں ھوار اے تحصیل ءِ غریب ءُ بزگانی حق جنگ مہ بیت بلے اے درچ ءَ اگاں چیزے دیم ءَ آتکگ ایوکا سوشل میڈیا ءِ یک ( Clip ) کلپے کہ آئی ءِ تہا ایڈوکیٹ جنرل ءُ ڈی سی ءَ را بھتام جنگ بوتگ۔ بلے اگاں اے (Clip ) راست بوتیں گڈا کمشنر ءِ دیم پرچا آرگ نہ بوتگ ؟ پرچکہ کمشنر ءِ سیادی نہ گوں نیشنل پارٹی ءَ اِنت نہ کہ کمشنر کسئے ءِ سیاد ءُ وارث اِنت ءُ نہ کہ اے تحصیل ءِ مردم اِنت ۔( چو کہ ڈی سی ءِ بابت ءَ گُش اَنت ) پمیشکہ اے گپ ءَ را بائدیں کہ ساڑاھگ بہ بیت کہ ڈیم زدگاناں وتی مُزّ رسگان اِنت ءُ اے مُزّانی گرگ ءُ دئیگ ءَ گوستگیں وزیر اعلیٰ ڈاکٹر عبداُلمالک ، ایڈوکیٹ جنرل بلوچستان ءُ ڈی سی تربت ءِ مزنیں جہد ءُ کوشستے ھوار نوں بائدیں اے دمگءِ مردم مُپتیں گِلہّ ءُ زنگ ءِ بدل ءَ گوں گوستگیں وزیر اعلیٰ ، ایڈوکیٹ جنرل بلوچستان ءُ ڈی سی تربت ءَ کُمک ءُ مدد بکن اَنت کہ چو مہ بیت باندا چیف جسٹس پاکستان ، نیب بلوچستان ءُ دگہ ادارہ اے گپانی نوٹس ءَ بگپت ءُ ڈیم زدگانی مُزّ یکوارے پدا دارگ بہ بنت اے درگت ءَ گوں ڈی سی تربت ، گوستگیں وزیر اعلیٰ ڈاکٹر عبداُلمالک ءَ گوں دَزبندی اِنت کہ اے کار گیجءَ (Process ) ءَ گشاد بکن اَنت تنکہ اے جیڑھ چہ بُن ءَ ھلاس بوت بکنت۔
***
