میدی ءُ دریا وردی دنیا ءِ کوْھن تریں روزگاراں یکے ۔ ھما زمانگ ءَ کہ بنی آدم چہ کِشت ءُ کِشار ءَ سرپد نہ اَت گڈا آئی ءِ لاپ ءُ روزگارگوں زِرا بندوک اَت بلوچ چو کہ 2 ھزار کلو میٹر زِر ءِ واھُند اِنت ھوں چہ بندر ءَ اے روزگار ءَ ھمگرنچ اِنت ۔ ءُ پدا بلوچ زِر یکشل ءَ دیمروئی ءِ بدل ءَ پد منتگی ءِ نیمگ ءَ ٹکان اِنت ۔پرچکہ دومی عالمی جنگ ءَ پد کہ دنیا ءَ دریا وردی ءِ پڈءَ ھما دیمروئی کرتگ آئی ءِ سان ءُ ناس انگت بلوچ تیاب ءَ سر نہ بوتگ اَنت ۔ اے ٹیکنالوجیکل دیمروئی ءِ سیہ پ پُشت ءَ بلوچ تیاب ننداں وتی لاپ والینتگ ءُ وتی گُژن ءِ روچ تیلینتگ اَنت ھما روچ کہ ایشیائی بے پرواہ ءُ بے ریائیں سامراجی مُلک چِین ءَ کہ وتی دست مانجہی ماں دنیا ، مال ، دولت ءُ کَٹاّنی پُل ءُ لوٹ ءَ مانگیتکگ بلوچستانءِ بے ایمنی ھوار بلوچ تیاب دپ ءِ میدءُ دریا ورد ھم شپ ءَ ھم شام ءُ روچ ءَ ھم ناری بوھان اَنت ۔ دَری ماھیگیرانی گَجّو جنگ ءُ بلوچ ماھیگیراں چہ آہانی روزگار ءَ زِبہر کنگ ءُ آہانی چُکاں ھم شام ءُ ھم ناری کنگ دیریں برجم اِنت ۔ بلے نوکیں نوبت ءَ نوں وھدے چِین وتی سامراجی ھَوسناکیاں ابرستگ گڈا بلوچ تیاب ءَ مید ءُ دریا ورد تکانسراَنت کہ وتی برھنگیں زھگ ءُ شدیکیں لاپ ءَ کجام ساھگے ءَ چیر بدئینت۔ اے بے دَریں مید ءُ دریا ورداں ناں واکے ءُ ننکہ رھشونے ۔۔۔۔۔۔ گوادر ءِ پدی زِرءَ ریل ءَ دگ جوڑ کنگ ءِ کار بِنا کنگ بوتگ ٹریکٹر ءُ ٹرالر یکشل ءَ ریک ، سِنگ ءُ ھاک پہ ریل ءِ دگ ءَ جوڑ کنگ ءِ حاترا دز گلائش اَنت ۔ بلے پدی زِر ءِ ھمے تیاب ءَ کہ مید چہ ھزاراں سالاں نشتگ ءُ وتی لاپ والینگ ءَ اَنت آہانی بابت ءَ گوْستگیں ءُ انوگیں وزیر اعلیٰ ءِ گوْرا ھچ وڑیں پیش بندی نیست اے درگت ءَ پدّر اِنت کہ بلوچ وتیگ ءِ گِلّہ ءَ کنت بائدیں ڈاکٹر عبداُلمالک بلوچ ءَ وتی دورءَ اے کارانی بِنا کنگ ءَ پیسر پہ گوادر ءِ ماھیگیر ، واڈھ ، مید ءُ تیاب ءِ کَش ءُ گوْرا نشتگیں مردمانی چارگ بکتیں ، بلے آئی ءَ نہ کت نوں بائدیں کہ نوکیں وزیر اعلیٰ نواب ثناء اُﷲ زھری (کہ در آمدے نہ اِنت ) اے دِرچ ءَ گامگیج بُزورایت پرچکہ اے وھد ءَ مید پدی زِرءَ ریل ءِ دگ ءَ جوڑ کنگ ءِ تُرس ءَ سک ءَ تکانسر ءُ پریشان اَ نت پرچکہ ریل ءِ دگ ءَ جوڑ کنگ ءَ گوں میداں اے تیاب دپ ءَ ھچ وڑیں جاہ ، راہ ءُ دَرے نہ بیت کہ آ چوں دَرے برو اَنت ؟ تیاب ءَ چوں وتی بوجیگاں آپ بدئینت ؟ واڈھ وتی دار ءُ ازباباں کجا ھیر بکن اَنت ؟ دومی نیمگءَ بلوچ وت دلیں راج دوستیں ( قوم پرست ) ھَندی رھشون اے تُرس ءَ بے تِرک ءُ توار اَنت کہ آہانی بُرزی رھشون ءُ کماش چہ آہاں دِلگران مہ بنت کہ آہانی وتی کارے حراب مہ بیت دومی دست ءَ جماعتِ اِسلامی ءُ جمعیتِ علماءِ اِسلام گامگیج بُزور اَنت پرچکہ آہاں دلگران ءُ ناراز کنگ ءَ بُرزی سند ءَ کس نیست اے رھشون بائدیں اے بابت ءَ زھرشانی یے بکن اَنت تننکہ اے جیڑھ داں رسانک درا سر بہ بیت ءُ بلکیں چِین ءِ بے پرواءُ بے ریائیں حکومت گودر ءِ میدانی بزّگی ءُ لاچاری ءَ دلگوش بہ کنت ۔
