بُزرگ ءَ وتی لوگبانکءَ را گُشت کہ پہ من یک جوڑی یے ساپ ءُُ سلہیں گُد ساجو کن کہ من پہ نماز ءِ کنگ ءَ مسیت ءَ رواں ۔تہ بُزرگ ءِ لوگبانکءَ پسّہ دات کہ انّوں ڈنّءَ ھور بوئگءَ انت گُڑا تو وتی نمازءَ لوگ ءَ بکن۔ بزرگ ءَ جواب گردینت کہ من الّم پہ نماز ءِ کنگ ءَ مسیت ءَ رواں۔
بُزرگ ءِ لوگبانکءَ آئی ءِ گُد آؤرت ءُُ داتاں تہ آئی ءَ وتی گُد گوْرا کت انت ءُُ چہ لوگءَ دراتک کہ پہ نماز ءِ وانگءَ مسیت ءَ رواں ،بزرگ روان اَت اَڑاِت ءُُ کپت،گُدءِ پلیت بوتاں،آپدا واتر لوگءَ اتک۔ دگہ جوڑی یے گُدے گوْراکُت دیم پہ مسیت ءَ رہادگ گپت، روگ ءَ اَت یکبرے پدا اڑاِت ءُُ کپت گدئے پلیت بوتاں۔
بزرگ پدا واتر وتی لو گءَ شُت ،وھدیکہ بُزرگءَ سیمی رندءَ وتی گُد بدل کت انت ءُ دیم پہ مسیت ءَ رہادگ کپت تہ آپدا اڑ ات ءُ کپگی بوت کہ انا گاہ یک مردمے اتک ءُ بزرگ ءَ را چہ کپگ ءَ رکینت ءُُ آئی ءَ را دست ءَ ئے گپت ءُُ دانکہ مسیت ءَ رسینت۔بزرگ ءَ ھمے مردءَ را جست کت ، کہ تو کئے ؟ تہ آئی پسّو دات کہ من شیتان آں، من پمیشکا ترا سیمی رندءَ کپگ ءَ رکینت کہ تو وھدے اولی رندءَ کپت ئے تہ ھداوندءَ تئی درائیں گناہ شُشت ءُُ ساپ کت انت۔وھدے کہ تو دومی رندءَ کپت ئے ھاوند ءَ تئی لوگبانک ءِ گناہ ششتءُُ ساپ کت انت، اگاں تو سیمی رندءَ بہ کپتین ئے تئی میتگ ءِ تیوگیں مردمانی گناہ شودگ ءُُ ساپ کنگ بوتگ اتاں۔ اگاں تو چارمی رند ءَ بہ کپتین ئے تہ کُلّیں دنیا ءِ گناھگاریں مردمانی گناہ شودگ ءُُ ساپ کنگ بوتگ اتاں ءُُ ادا پہ من ھچ پشت نہ کپتگ اَت، گڑا منے شیتان ءَ را چرے دنیا ءَ لڈءُ بار کنگی کپتگ اَت۔۔۔۔!!!
****
