روتاک آزادی ءِ سپر ءَ دیر نہ اِنت بلے حالکاری ءِ پِڑءَ ماں بلوچستان ءَ اے وہد ءَ مزنیں نامے ءِ واھُند اِنت ۔ وتی کم واکی ءُ کمیں آسراتیاں ابید ہم روتاک آزادی بلوچ ، بلوچی ءُ بلوچستان ءِ جیڑھاں دیم ءَ آراگ ءُ آہانی گشواری ءِ حاترا چہ کَسّ ءَ پدا نہ بوتگ اے وہدی روتاک آزادی بلوچستان ءِ حالکاری ءِ پِڑاءَ سنگین ءُ گرانیں روتاکے ءِ جہت ءَ زانگ بیت دومی دست ءَ بلوچستان ءِ اولی روتاک اِنت کہ بلوچی ہپتگی تاک’’ ساچینک ‘‘ ءَ شنگ کنگان اِنت کہ نہ ایوک ءَ پہ بلوچی زبان ءِ دیمروئی ءَ پاد کَلّے بلکیں بلوچی زبان ءَ رسانک در ءِ یک نوکیں درے کہ چہ چرائی ءَ بلوچی نبشتہ کنوک ءُ وانوک نپ ءُ کَٹ گرگان اَنت۔
روتاک آزادی ءِ مول ءُ مراد بلوچ ، بلوچی ءُ بلوچستان اِنت ءُ روتاک ءِ اے واھگ اِنت کہ داں ہرچ بلوچ ءَ سر بہ بیت تنکہ نوکیں عہد ءَ آ وتی جیڑھاں بزانت ءُ سر پد بہ بیت۔ نوکیں دور الیکٹرانک رسانک ءِ دور اِنت نوں بازیں روتاک ءُ ماہتاک الیکٹرانک رسانک ءِ در ءَ سر بوتگ اَنت ہرجاہ ءَ کہ روتاک ءُ ماہتاک سر نہ بنت ، انٹرنیٹ ءِ باپُشت ءَ سیٹلائیٹ ءِ سر ءَ چارگ ءُ وانگ بوھگان اَنت ۔ اے درگت ءَ روتاک آزادی ءَ ہم اے مار اِتگ کہ دُور ءُ دراج ءُ درمُلک ءَ نشتگیں بلوچاں روتاک آزادی ءِ سر بوھگ ءِ در ءُ راہ ہمیش اِنت کہ انٹر نیٹ ءُ موبائل ءِ سر ءَ شنگ ءُ تالان کنگ بہ بیت ۔ اے درچ ءَ مزنیں جکانسری یے ءَ پد روتاک’’ آزادی ‘‘ءُ ہپتگی تاک ’’ ساچینک ‘‘ انڈرائیڈ موبائل ءِ سر ءَ آرگ بوتگ اَنت روتاک آزادی ءِ ایپلیکیشن درائیں دنیا ءَ موبائل ءِ سرءَ چہ پِلے اِسٹور ءَ ڈاؤن لوڈ کنگ بوت کنت کہ چر آئی ءَ ہرجاہ ءَ روتاک آزادی ءُ آئی ءِ ہپتگی تاک ’’ ساچینک ‘‘ وانگ بوت کن اَنت ۔ شور ءُ سلاہ ءِ حاترا گوں ما اے ڈَس ءُ نشان ءِ سرا سیادی بدار اِت۔
