میجر مجید

بلوچ گْوشیت:

دلسریں کاڑ ءُ دلجمیں اولاک

پہ ہوس پیداگ نہ بنت ہر روچ

دلجمیں اولاک پہ گبر باز اِنت

دلسریں کاڑانی بدل گار اِنت

زالبولانی کرد ءِ بابت ءَ اے بلوچ ءِ فلسفہ اِنت

بلوچ شاعرے گْوشیت۔

مہرنگ دزگْوہاراں جم کن

ماہیں سمّیاں ہمراہ کن

بُرزیں کَنڈگاں بُرّان کن

دیم پہ منزل ءَ جُنزان کن

انچوش گْوش اَنت کہ وہدے حاوند ءَ حضرت آدم جوڑ کُت۔ آ اولی انسان اَت ءُ مردین آدمے اَت۔ بہشت ءَ یلہ اَت۔ حور، طہور ءُ گِلمان آئی ءِ ہمک لوٹ ءُ حاجت ءِ پیلہ کنگ ءَ یک پاد ءَ اوشتاتگ اِت اَنت۔ شہد ءُ طہورانی جوہانی سر ءَ نشتگ ءُعیش ءُ عشرت ئِے کُت۔ بلے انگت ایمن نہ اَت۔ پرچا کہ آئی ءِ جُتک (جوڑی) نیست اَت۔ گُڑا حاوند ءَ مار اِت کہ آدم بے چاڑ اِنت۔ پہ وتا مَٹّے لوٹیت۔ گُڑا حاوند ءَ بی بی حوا جوڑ کُت۔ وہدے کہ حضرت آدم ءِ چم پہ حوا ءَ کپت اَنت۔ چہ گل ءَ بال بیت۔

چرے گپ ءَ پدرا بیت کہ انسانی زند ابیدء زالبول ءَ ناسرجم اِنت۔ من چوناہا زالبولانی کرد ءِ بارہ ءَ باز نبشتگ۔ بلے مرچی منی سرحال بلوچ زند ءُ دودمان ءِ سے دُردانگانی بابت ءَ اِنت کہ ایشاں راجی جنز ءُ بلوچ تپاکی ءِ ڈُبّہ وتی کوپگاں زُرتگ۔

1- شہید شیرزال کریمہ بلوچ

2- شیرزال ڈاکٹر مہرنگ بلوچ

3- شیرزال سمّی دین بلوچ

اے سئیں شیرزالاں بلوچ زندمان ءُ دودمان ءِ اندر ءَ وت ءَ نمیران کُتگ۔ انچوش کہ بازیں زالبولاں میان استمانی حلکواں داد گپتگ۔ ہمے داب ءَ مئے اے سئیں زالبولاں ہم میان استمانی داد گپتگ۔

1.شیرزال شھید بانک کریمہ

100 women 2016

2۔ شیرزال بانک مہرنگ

100 women 2024

3۔ شیرزال سمی دین بلوچ

frontliner definder 2024

اے میان استمانی داد اَنت کہ کم مردم اود ءَ سر بیتگ۔ بلوچ زالبولانی کرد چو رُژنائیں استال ءَ تْرپیت۔ مرچی بلوچ شیرزالانی سر ءَ راج پہر بندیت۔ اے بلوچ جہدکاراں بلوچ ءِ پونز بُرز کُتگ۔ بلوچ ءِ مندِیل ءُ چِلبُرّ ءِ چوڑ پلگارتگ۔ اے دابیں انسان راجانی اندر ءَ بدلی ءُ سدلی کار اَنت۔ راجانی غلامی ءِ مُہریں سانکلاں پْروش اَنت۔ اجتمائی ءُ چاگردی نزوریاں تمرد ءُ توانا کن اَنت۔

مرچی مئے شیرزالان ءُ جہدکاراں راج ءَ را دیدانکے داتگ کہ دشمن ءِ دل ءُ لاپ روک اَنت۔ ایشانی یک توارے ءَ گوں لکّھانی حساب ءَ مردم درکپِیت۔ ایشاں راج ءَ را زانتے داتگ کہ ما غلامیں۔ بلے مارا وت ءَ مُلکے است۔ مارا وت ءَ بندفترے است۔ مارا وت ءَ لبزانک ءُ دود ءُ ربیدگ است۔ بلے مارا زورگیراں پہ زور غلام کُتگ۔ زانتکار گْوش اَنت کہ

“کجام یک راجے  کہ بہ ماریت کہ آ غلام انت گُڑا آ غلامی دیر نہ جنت” ۔مرچی مئے شیرزال گوں دژمن ءَ جیگ ماں جیگ اَنت۔ مرگ ءَ نہ تُرس اَنت۔ قید ءُ بند، دشمن ءِ ظلم ءُ زوراں نہ ترس اَنت۔ وتی راج ءَ پہ وزمے آگاھ کنگ ءَ اَنت۔ بازیں وہداں بلوچ شیرزالاں وتی زند پہ راج ءَ قُربان کُتگ۔ آ ہما شیرزال بوتگ اَنت کہ آہاں زند ءِ تہ ءَ ہچ کمّی نہ بیتگ۔ آسودگین ءُ آرامیں چاگردے ءَ بیتگ اَنت۔ ادا زانگ بیت کہ غلامی ءِ درد ءُ مارشت چہ دنیا ءِ کُلّیں درد،اڑ ءُ جنجالاں گیش اَنت۔ ہرچ وڑیں آسودگیں زندمان یا زرّ ءُ مال غلامی ءِ درداں کم کت نہ کنت۔ غلامی ءِ علاج آجوئی اِنت۔

دلگوش:- مئے بازیں نبشتہ کار، شاعر ءُ قلمکار مئے ہمے شیرزالانی نام ءِ دیم ءَ “کامریڈ” نبشتہ کن اَنت کہ سکّیں ردیں لبزے: “کامریڈ” ءِ جاہ ءَ “شیرزال” شرتر اِنت۔ باید اِنت کہ ما وتی مُرواردیں لبزانی قیمت ءُ کارمرز کنگ ءَ بزانیں۔ “کامریڈ” ءِ لبزءَ بلوچ زالبولانی واسطہ کارمرز کنگ بلوچ ءِ دود ءُ ربیدگانی تب ءَ نہ کپیت۔

تپاکی آجوئی ءِ مانزمان اِنت

بلوچستان آجو بات