گرماگ تنیگا بنا نہ بوتگ بلے مکرانءَ گروکءِ جیڑھءَ چو سیاہ مارءَ وتی سر چست کتگ۔ مکران، گچینی تربتءَ گرماگءَ گرمی 54 سینٹی گریڈءَ کیت ءُُ مُرگ بال ءَ مر انت اے حاترا اے د مگءِ مردم اے موسمءَ چہ پاکستانءِ ایندگہ دمگءُُ مردماں گیشتر تکلیفءُُ جنجال بنت۔ 2014 ءَ وتی سوگند زوریءَ پد چہ کیچءَ سیادی داروکیں گوستگیں وزیر اعلیٰءَ جار پرّینتگ ات کہ آئیءِ حکومت سئے جیڑھانی گشواریءِ حاترا کار کنت۔ اولی مکرانءِ گوں ایرانءَ بیپار، دومی مکرانءَ ایرانءِ داتگیں گروکءِ گیشی تنکہ مکرانءَ لوڈ شیڈنگ ھلاس کنگ بہ بیتءُُ سیمی گوادرءِ آپءِ جیڑھ۔ مرچی سئے سال ءَ وزارت اعلیٰءِ سرا بوھگءَ پد اے سئیں جیڑھ چو تربتءِ کلاتءَ مک انت ناں گوادرءِ آپءِ جیڑھ گش ءُُ گیوار بوتگ، ناں ایرانءَ گوں بیپار بنا کنگ بوت۔ بلکیں رئیسانی حکومتءَ برجائیں ھما کسانیں بیپار ھم بند بوت۔ مکرانءَ ٹیلءِ بیپار کنوکاں ھمے سئیں سالاں وتی دراھیں گاڑیءُ ٹینکر لیلام کت انت اے سئیں مکران گروکءِ جیڑھءَ گشوار کنگءِ حاترا ھچ گامگیج زورگ نہ بوت۔ بازیں زانتکایں مردمانی گشگ انت اگاں کیچی وزیر اعلیٰءِ شہباز شریفءِ سنگتیءَ چینءِ ترءُُ تابءِ بدل اگاں ایرانءِ ترءُُ تاب یکبرے بکت انت گڈا تنیگہ مکرانءِ گروکءِ جیڑھ ھلاس بوتگ ات۔
پرچکہ مکرانءِ گروک چہ ایرانءَ کیتءُُ ایرانءِ گروکءِ ھچ وڑیں جیڑھ نیست، بلکیں ڈاکٹر عبدالمالک بلوچءِ وزارت اعلیٰ ءِ وھدءَ ایرانءِ حکومتءَ دو ءُُ سئے براں حکومتءَ گشتگ کہ اگاں حکومت گیش گروک زورگ ءَ دلمانگ انت گڈا ایرانءِ حکومت اے بابتءَ جازیگ انت، بلے سر پر نہ بیت کہ پرچا گوستگیں حکومتءَ گرماگءِ آھگءَ ساری چہ ایرانءِ حکومتءَ گروکءِ لوٹ نہ کت نوں گرماگءِ بنا بوھگءَ پیسر دراھیں مکران گروکءِ کمیءِ آماچ انت۔ اے درگتءَ ھندی مردماں یک دو براں ایکسین واپڈا کیچءُُ ڈی سی کیچءَ گوں گند ءُُ نند ھم کتگ بلے اے دوئیں واکدارانی نیمگامھلوکءَ را دل سدکیں پسو دئیگ نہ بوتگ، پمشکہ مھلوک سک تکانسر انت ءَ چد ءُُ پیش نہ مکرانءِ مھلوک بیش کاری یےءَ سر بگیپت بائدیں انوگیں وزیر اعلی نواب ثناء اللہ زھری مکرانءِ گروکءِ جیڑھءَ گوں ایرانءِ حکومتءَ گشءُُ گیوار بکنت تنکہ مھلوک آسودگ بہ بیت ءُُ ملک دگہ بیش کاری یےءَ بہ رک ایت، پرچا کہ اے وھدءَ گرماگءِ بنداتءَ مردمانی لیڈرءُُ رھشوناں سرگوز کنگ جوانیں سان ءُُ ناس نہ انت۔
