بلوچی لبزانک ءِ تہا داں انوگا باریں چنت سد کتاب ،تاک ،ماھتاک ،تاکبند چھاپ ءُُ شنگ بوتگ اَ نت بلئے پدا اوں بلوچی ءَ پہ وتا آ جاہ ودی کت نہ کتگ کہ آئیءِ بوھگی بوتگ ۔ایشیءِ سوب چے اِنت؟ اے دراھیں کتاب ءُُ تاک کہ چھاپ ءُُ شنگ بوھگ ءَ انت اے درست بے نپ ءُُ بہ سیت انت یاکہ ایشانی تہا آ مواد تنی وھدی ایر گیجگ نہ بوتگ انت کہ بلوچی زبان ءُُ دنیاءِ اے دگہ زبانانی کیل ءَ سر بہ بیت ۔اے منی وتی جندئے ءِ کم بزانتی ءِ اِنت کہ بلوچی لبزانک ءِ تہا ایوک ءَ فکشن ءُُ شئیر ءُُ شاعری ءَ ابید دگہ کتاب ءِ چھاپ کنگ ءِ بابت ءَ کس ءَ وتی ند کارمرد نہ کتگ ،اگاں بوتگ گڈاں ایوک ءَ چندے پولکاری کتاب چھاپ بوتگ بلئے آ اوں گیشتر ھما مواد انت کہ چد ءُُ ساری مجلس ءُُ دیوانانی ھاتر ءَ نبشتہ کنگ بوتگ اَنت یاکہ وتی ایم فل ءُُ پی ایچ ڈی ءِ تھیسسز انت ، ایشانی تہا کس ءَ جتائیں پولکاری کارے نہ کتگ اگاں کتگ کہ گڈاں آ پولکاریءِ بدل ءَ باریں چے یے بوتگ،من کسی یے ءِ نام ءَ گپت نہ کناں کہ مرچی مئے لبزانک ءِ تہا نوکیں گالے نامدار انت آ انت ’’لوبیینگ‘‘ بزاں گروپ بازی ، نوں اگاں من کسے ءِ نام ءَ بگراں گڈاں من ءَ اوں یک گروپے ءِ تہا تور کنگ بیت ،پمشکا منی اے نبشتانک ءَ پہ لبزانک ءِ اے سکیں پدمنتگی ءِ دورءِ کنگءِ ھساب ءَ چارگ ءُُ وانگ بہ بیت ،من پیسر ءَ ھمے گشگ ءَ اتوں کہ مئے لبزانک ءِ تہا کس ءَ پہ جند ءِ ھیال ءُُ مارشتانی ھساب ءَ نبشتہ ءِ کنگ ءِ جہد نہ کتگ ،یاکہ انچیں ھیال ءُُ پگرے دیم ءَ آرگ ءَ بے سوب بوتگ انت کہ چہ آئی ءَ دگہ مردمے جیڑایت بہ کنت ،مئے لبزانک ءِ تہا بازیں ندکار ءُُ لبزانت است بلئے شاہ زانت یکے اوں نسیت پرچہ؟ اے اوں جیڑگے ھبرے کہ مئے انچو کتابانی نبشتہ کنگ ءَ پداوں میان استمانی جاہ ءَ ما وتی یک کتاب اوں دیم دات نہ کناں کہ دنیاءِ اے دگہ ندکارانی کتابانی کچ ءُُ کیل ءَ سر بہ بیت ،مئے سرجمیں لبزانک ءِ تہا چشیں یک کتابے درنئیت ۔( من ایوک ءَ ردانکی کتابانی ءَ بابت ءَ گشگ ءَ اوں ) گشگ بوتگ کہ ھمک بلوچ کہ ودی بیت آ یک شاھرے ،اے ھبر راست ئے پرچکہ مئے لبزانک ءِ تہا انچو دیمروئی شاعری کہ کتگ دگہ لبزانکی پڑے ءَ کت نہ کتگ ،مرچی اگاں شاعری ءِ گپ بہ بیت داں مئے لبزانک ءَ تہا چیزے نام است بوتگ ءُُ است اِنت کہ ما آھانی ناماں پہ پہر گپت کناں ءُُ مئے شاعری ڈنی ملکانی یاکہ اے دگہ دنیائی شاعراں چہ ھچ رنگ ءَ جہل گندگ ءَ نیا انت بلئے ھردے کہ گپ ردانک ءُُ رم نویسی ءِ کئیت یاکہ پولکاری ءُُ زبان زانتی ءِ تک ءَ کیت گڈاں ما اوشت آماچ بنت ،مئے گور ءَ نہ ایوک ءَ زبانزانتی ،فکش ءُُ پولکاری نہ سرجم اَنت بلکیں مئے شرگداری اوں نہ سرجم ءُُ نیم شلونگ اِ نت ماانگت ءَ ایوک ءَ دری ندکارانی لیکہانی بیان ءَ کنگ ءَ انت ءُُ ماچدءُُ دیم ءَ شت نہ کتگ ءُُ وتی جندئے شرگداری شوہاز ات نہ کتگ،اگاں چہ مئے لبزانک ءِ گیشتر یں کتاب بلکیں کم ءُُ گیش دراھیں کتاب ھمے پڑانی ئیگ انت ءُُ انچو کتابانی بوھگ ءَ پد اوں مئے لبزانک میان استمانی جاہ ءَ سر نہ انت ۔ منی دل ءَ اگاں ھمے ھساب ءَ ما وتی نبشتہ کنگ ءِ وڑ ءُُ پیمانی تہا بدلی نیارات گڈا یکے روچے کیت کہ مئے زبان چہ پدمنتگی ءِ ھساب ءَ درکئیت ءُُ گار ءُُ بیگواھی ءِ نیمگ ءَ درکپ ایت ۔بلکیں بازیں زبان زبانزانت اے اوں گش اَنت کہ آوکئیں یک ءُُ دو سالانی نیام ءَ دنیا ءِ بازیں زبانے گار ءُُ بیگواہ بیت کہ ایشانی بلوچی زبان ءِ ھم نام ھوار بوت کنت۔اگاں ما لوٹاں کہ مئے زبان ءُُ لبزانک اے رد ءَ ھوار مہ بیت گڈاں مارا وتی نبشتہ کنگ ءِ پڑانی تہا بدلی آرگی کپ ایت ءُُ مارا دنیاءِ دگہ تہرانی سرا اوں نبشتہ کنگ کپیت ،پرچکہ مئے گور ءَ رجانکاری آں یل کن چنچو شاہ زانتی کتاب است،چنچو لس بنگپی بزاں چاگردی جیڑگانی سرا کتاب است انت ،جنس ءُُ پگری چنچو کتاب اِنت ،میڈیکل ،سوشل جیڑگانی سرا چنچو کتاب انت،اندری مارشتانی چنچو کتاب است انت،گواچن ءَ اگاں چارگ بہ بیت داں ایشانی تہا یکے اوں نسیت،مئے لبزانک ءِ تہا ایوک ءَ لہتیں فکشن ءِ کتاب اَنت ،گیشتر رد ءُُ بندی کتاب اَنت،یکے کپ ئے شرگداری ءُُ پولکاری کتاب انت دگہ برز نبشتہ کتگیں یک کتابے پہ چم ء چارگ نیست انت ۔بلوچی زبان کہ وت ءَ دنیا ءِ کہن تریں زباناں شمار کنت ،وتی دودمان ءَ دنیاءِ کہن تریں دودمان گشیت،آوتی ڈکش ءُُ لبزیات ءِ توسیپ ءَ کنت گڈا پرچہ آئی ءِ گور ءَ لس بنگپانی سرا یک کتابے اوں نیست کہ دگہ مردمے ونت یے بہ کنت۔ مئے گور ءَ ایوک ءَ لبزانکی کتاباں ابید دگہ کتاب نیست اگاں یک مردمے ءَ را گوں لبزانک ءَ سیادی نیست آئی ءَ پہ بلوچی کتاب بے نپ انت ،اے گپ ءِ ھرچند کسے انکاری بہ بیت بلئے راستے،!!!! بلوچی کتاباں ایوک ءَ بلوچی لٹریچر ءِ مردم وان انت یاکہ نبشتہ کن انت دگہ مردماں پہ اے بے نپیں کتاباں اگاں ھمے لڑ ءَ چوبریٹنڈر رسیل،کرشن چندر ،ویل ڈیورنٹ،ملک ماروق ،سبط حسن ،مبارک علی ،ٹی ایس ایلیٹ، ءُُ بازیں دگہ نبشتہ کارانی وڑ یں کتاب بوتیں گڈا دگہ یک لس وانوکے ءَ اوں آ کتاب زرت انت کہ باریں مئے ندکار چے جیڑگ ءَ اَنت ۔آ بلوچی زبان ءُُ ادب کی تاریخ‘‘ ءِ کتاب ءِ جاہ ءَ روت ’’ لوگوں کو سوچنے دو‘‘ اے کتاب ءَ زورایت ،آ ’’بہشت ءُُ دوزح ‘‘ءِ بدل ءَ روت ’’ How to be happy‘‘ یاکہ ’’ میری نظر میں ‘‘ وڑیں کتابے زوریت ،پرچہ؟ پرچکہ آ ئی ءِ ھب گوں اے کتاباں بندوک انت ،نوں یک اکنامکس ءِ نودربرے ،’’بلوچی ٹیکی ،بنزہ،اوپار،کمار بہ بئے،فاضل ءِ ازم،گروکی شہم،شدکیں ھار،بتل ،گشتن گالوار‘‘ ، ءِ ڈولیں کتاباں چون کنت ، اگاں چہ اے کتاب آئیءِ بلوچی لبزانک ءِ زانت ءَ گیش کنت بلئے پہ آئیءَ بے نپ انت ،آ گیشتر اردو نبشتہ کارانی یاکہ انگریزی ندکارانی کتابان وانیت ،آ’’ صوفی کی دنیا ‘‘ءَ وان اَنت،آ رؤت ’’فرائیڈ کی حیاتِ زندگی‘‘ ءَ زوایت وتی چاگردءِ بابت ءَ جیڑگ ءَ آئیءَ موہ ریست آ لینن، ءَ وانیت دانکہ چاگرد ءِ تہا بووکیں جیڑگانی بابت ءَ زانت بہ کنت ،اگاں مئے وتی لبزانک ءِ تہا چشیں بنگپانی سرا کتا ب نبشتہ کنگ بہ بیت گڈا آ وتی جند ءِ زبان ءَ ھمے چیزاں وانیت ءُُ لبزانک ءِ تہا اوں بے بہاھئیں بدلی یے ودی بیت ءُُ ما ھم وتی لبزانک ءِ پڑ ءُُ ریشگاں دنیاءِ دیم ءَ پہ پہر درشان کت کناں ۔
گیش ھبر کنگ ءُُ نبشتہ کنگ ءِ ھاتر ءَ زانتکار باز انت ایوک ءَ ھمے دانکاں گوں نبشتانک ءَ آسر کناں کہ مئے لبزانک انگت باز تنیگ اِنت ءُُ ایشی ءِ تن گوں ایشیءِ پڑ ءُُ ریشگانی ودّینگ ءَ پیلو بیت۔پمشکا یکے دومی ءِ سرا ایراد گر گ ءُُ پاد چکی ءَ ما بائد بند بہ کناں ءُُ ھرکس کہ جوان نبشتہ کنگ ءَ انت آئیءِ توسیپ ءُُ دلبڈی ءَ بہ کناں پرچکہ چہ ھمیشی ءَ مئے لبزانک ءِ پد منتگی دور بوت کنت۔
