چہ پنجابءِ مردماں ابید ملکءِ ایدگہ قومانی مردم ءُ گچینی بلوچ راجءِ فرزند اگاں بُگوش اَنت گڑا سادءُ دار (پاہو) ءِ تُرند ترین سزاہانی حقدار بنت اِدا اے گپءَ ضرور یات کنگ بِہ بیت کہ اے ملکءَ ہزاراں بلوچ سالانی سال گار ءُ بیگواہ اَنت آہانی ماتانی دلانی آہ ءُ زاریاں عرشءِ آزمانءَ بِگر تہ زمینءِ دلبند جَکسیت۔ گار ءُ بیگواہیں مردمانی شوہازءَ بلوچءِ ملکءَ ہمک روچ ہڑتال یا آہ ءُ فریاد اِنت ، در بہ دَری اِنت ، کُوکار ءُ واہی اِنت ۔

بلوچ راجءِ پردگ داریں چُک ءُ جنین گار ءُ بیگواہانی درگیجگءَ تا اسلام آبادءَ سر بوتگ انت کہ بگندئے ملکءِ حاکماں بزّگ بہ بیت ءُ مارا مئے مردماں بِدنت۔ بلوچ ہڑتالی اے لوٹ ءُ طلبءَ کنگءَ نہ اَنت کہ مئے گنہگار ءُ بے گناہ دوئیں یکپارگیءَ چَہ جیلءُ بندیگاں کشّگءُ یلا دیگ بہ بنت ایشی ءِ جاگہءَ بلوچ بس ہمنچو لوٹنت کہ گاریں مردم دیما آرگ بہ بنت اگاں گہنگار اَنت ءُ سرکارے سیم ءُ تارے پروشتگے گُڈا ملکءِ آئین ءُ قانونءِ حسابءَ سزا دیگ بہ بنت ءُ اگاں بے گناہ اَنت مفتءَ ٹارچر سِلّانی تہا دارگءُ جانءِ گوشت ءُ پوستءِ پاچَگ ءُ ہڈّے دُروشگ مہ بنت بلے ” کہدا حُداداتءَ ،، چو کر ءُ کورا بلوچ ہڑتالیانی زار ءُ چیہانٹانی ہچ پرواہ نیست گوشءَ مورے نَوارتئےکہ بِکیچینیت ءُ سمائے بِہ بیت ءُ نہ عرشءِ آزمانءِ قہر ءُ عزاب ءَ تُرسیت ءُ نیکہ انصاف ءُ انسانیتءِ زبانءَ سرپد بیت۔

بلوچ مہلونکءِ اِینچو آہ ، زاری ءُ چیہانٹانی بے سُد ءُ سمائیءَ اَنچیں حالت ءُ مارشتے ودی کتگ چو کہ مرداں گُشتگ ” زمین جُنبیت بِہ جُنبیت ، گُل محمد نہ جُنبیت ” ظاہر اِنت کہ اے وڑیں حُدا نا تُرسیں کار ءُ کِردے آسری حبر نیک نہ بیت کہ ہر انسانءِ واستا تسّلائے سوب بہ بیت چوش بوت کنت کہ اے وڑیں حال ءَ باز مارشت داریں مردم چَہ مردمانی بَزّگی یا زار ءُ فریاتاں ءُ واجہانی ظلمانی آسرا چہ بے سُدّیں حاکماں دو گام دیماتِر ملکءِ عاقبت ءِ بابتءَ تکانسُر ءُ پِگر مند بِہ بنت ءُ بچارنت۔ حق ءُ حُداءَ یا ملکءِ سر ظاہریں راستیاں دیما بکنئے ءُ بچارئے گڑا پاکستان تہنا اے وہدءَ ناں بگندئے ہما دورءَ ہم پنجاب زانگ بوتگ کہ بنگال گوں وتی بَلائیں آبادیءَ پاکستانءَ ہوار بوتگ، آ دورءَ ہم ہر چی کہ بوتگ گوں پنجابءِ رضا ءُ واہگءَ کنگ بوتگ ۔مردمے اگاں بُلوٹیت گڑا گوشت کنت کہ ہر نیکیءِ کہ ملکءِ واستا بنگالیاں کتگ، آہاں قیمت گوں سُودے ہمبراہیءَ رستگ البت اِدا مردم اے حبرا گوشت کنت کہ انسانی چاگردئےءِ شکلءَ پنجابءِ باز ناں بلے آرتے تہا وادءَ چِہ کمتر مردم پہ زانتکاری یا پہ نزانتکاری ءُ سرگنوکیءَ یا چَہ ملکءِ عاقبتءِ تُرسءَ بُلوٹنت یا مَلوٹنت برے برے راست ءُ تچکیں حبر حبرئےءِ دَرشانءَ مجبور بنت ءُ ملکءِ جاور حال ءِ بابتءَ پنجابءِ چمے سرگنوک ءُ پگر منداں یکّءِ قائد اعظم یونیورسٹیءَ تاریخءِ پروفیسرے ڈاکٹر اِلہان نیاز صاحب اُردُو زبانءَ یک گپءُ ترانےءَ چوش گوشیت
“دیکھیں آجکل لوگ ایک اصطلاح استعمال کر رہے ہیں کہ پاکستان ایک پولی کرائیسز میں ہے اُس میں سیاسی بحران بھی ہے ، اس میں اقتصادی بحران بھی ہے اس میں اور بھی بہت ساری چیلنجز ہیں فارن پالیسی کے، سیکیورٹی کے، ماحولیات کے، آبادی کے، یہ سارے اگلے پانچ چھ سال میں اُس نقطے پر پہنچ رہے ہیں یا ان سے ہم کسی نہ کسی طریقے سے نمٹ لیں گے یا وہ پھر ہمیں فارغ کر دینگے”
ہمے گپ ءُ تران ءِ دیمتری بہرے ءَ ڈاکٹر اِلہان نیاز صاحب چوش ہم گوشیت کہ بوت کنت کہ پاکستان اقوام متحدہءِ نقشہءَ وتارا مُلکےءِ شکلءَ بِداریت ءُ پشت بِہ کپیت بلے آئیءِ تہا یک ذمہ دارین ءُ جمہوری مُلکےءِ خوبی ءُ خاصیت یا نشانی پشت نہ کپ اَنت چو کہ ووٹ ءُ الیکشن پہ جمہوری راہ ءُ رہبندانی سرا نہ بنت ، عوام ءِ نمائندگ زورین بنت ، آئین ءُ قانونءِ سرا عمل نہ بیت ، مذہبی فرق ءُ تفاوت ودی بنت، قومانی تہا گِروکش بندات بیت ءُ ملک ءُ عوام ءِ حیال داروک نہ بیت کہ کسے کار ءُ روزگار ، وانگ ءُ زانگ ، جان سلامتی ، آبادی ، سیلاب ءُ طوپانانی تباہکاری یا بُرزءَ گُوشتگیں کُلّیں گپّانی تک ءُ پہناتانی نیمگءَ دلگُوش بِدنت چہ ڈاکٹر اِلہان نیازءَ ابید زاھد حسین صاحب ہم ” بلیک ہولءِ” یک پروگرامےءَ گوں ڈاکٹر ہود بھائی ءُ مجلسءَ نندوکیں مردماں ہمے گپّاں کنت کہ پاکستان ہما راہ ءُ رہبنداں رہادگ اِنت کہ چہ ملکءِ کامیابیءَ دو گام پُشت ناکامیانی نیمگءَ رؤ انت اگاں پٹ ءُ پول بکنئے ءُ بچارئے گڑا دگہ بازیں زانت کارانی گپ ءُ تران دستءَ کپ اَنت ءُ اے تک ءُ پہناتءَ مردمءِ رہشونیءَ کن اَنت ، چو کہ حسین حقّانی، اعجاز حیدر ، ڈاکٹر عائشہ صدیقہ ، ڈاکٹر قیصر بنگالی ، حامد میر ءُ دگہ بازیں زانتکار ءُ قلمکار است اَنت کہ وہدے تب ءُ مئیل ئے شر بیت گڈا ملکءِ بنیادی جنجالانی بابتءَ برے برے حبرے حبرے کن اَنت بلے ایشانی گپّاں ملکءِ حاکم کجا سرپد بنت کہ وتی کشک ءُ راہءَ بدل ءُ تچک بکن اَنت اے ملکءِ جیڑہ ہمیش اِنت کہ ملکءِ حاکماں حقّیں حبر چو سُوچنءَ توریت اگاں کسے زیادہ بہ کنت، تنگ کنگ بیت اگاں پنجاب ءِ بہ بیت چہ ملکءَ تاچینگءُ بلوچے بہ بیت گڈا گار ءُ بیگواہ کنگ بیت یا دیماترا کوشگ ءُ دَؤر دیگ بیت بلے ملکءَ نندگ ءُ زند گوازینگءِ قابل نہ بیت ،
اعجاز حیدر صاحب” نیا دور” ءِ یک دیوانےءَ ملکءَرا ٹی ٹی پی ءُ بلوچ سرمچارانی کار ءُ کردے بابتءَ تران کنانءَ چوش گوشیت کہ ملکءِ اختیار دارانی واستا ٹی ٹی پی ءُ بلوچ سرمچارانی تہا فرقءُ درک کنگ اَلّمی اِنت بلوچ سرمچار وتی حقّانی واستا بِزاں بلوچستانءِ ساحل ءُ وسائلاں چہ ملکءِ حاکم ءُ واجہانی دستءَ پَچ گِرگ ءُ وتی دستءَ آرگ لوٹنت بزاں ظلم ، زور ءُ نا انصافیانی حلاپءَ جنگءَ اَنت اے ہم کہ پہ بلوچ راجءِ بے اختیاریءِ حلاپءَ ءُ بلوچانی واکءُ اختیارانی حاترا جُہد ءُ کوشست یا جنگءَ اَنت کہ اے وہدءَ بلوچ راجءِ جاگہءَ پنجاب ءِ دستءَ اَنت پدا اے ہم کہ ماں اے ملکءَ پہ جمہوری راہ ءُ رہند، جُہد ءُ کوشست ءَ تا محشرءِ روچءَ بلوچ راجءِ دستءَ نہ بنت اِدا اے گپ ہم وتی جاگہءَ تچک ءُ راست انت کہ بلوچاں جمہوری ، قانونی ءُ پارلیمانی جُہدءِ بےآسری ءِ سوبءَ اے راہ گپتگ ءُ رہادگ بوتگ اَنت اگاں نَا گڑا پاکستانءِ دفتر وت اے راستیءَ پَدّر کنت کہ گوستگیں دورءِ بلوچ سروک دانکہ نواب خیر بخش مریءِ جند ءُ آئیءِ چُک ہم ملکءِ جمہوری ءُ پارلیمانی جُہدکارانی ہمبراہ ، ہم کوپگ ءُ ہم دست بوتگ اَنت ءُ جہد اِش کتگ اے دورءَ ہم بلوچ جُہدکار بلوچستانءَ کُلّی شکلءَ وتی حق ءُ اختیارءَ لوٹنت اے گپّانی مجگ ءُ معنا ہمیش اِنت کہ بلوچاں اگاں واک ءُ اختیار دیّگ بہ بنت پنجاب ءُ مقتدرہ ئے بالادستی یا مستری ءُ کماشی اگاں دارگ یا کم بہ بنت ءُ بلوچ بلوچستانءِ واک ءُ اختیارءِ وت واجہ ءُ واہُند بہ بنت ءُ انسانی بنیاداں گوں بلوچاں انصاف بِہ بیت گڑا بلوچستانءِ مسئلہ ءُ جنجال ءِ راہ ءُ درے در اتک کنت وہدے کہ دومی نیمگءَ اگاں بچارئے گڑا ٹی ٹی پی ئے لوٹ ءُ غرض یا دلءِ واہشت ءُ جُہدءِمقصد ہمیش انت کہ آ سرجمیں پاکستانءِ سرا قبضہ بِہ کن انت ءُ پاکستانءَ ہما راہ ءُ رہبنداں بِبارت ءُ پاکستانءَ ہما تہرے نظام ءُ طرزے حکومتءِ بیاریت کہ افغانستانءَ اے وہدءَ است اِنت ءُ ہر کس وتی پچیں چمّاں دیستءِ کنت کہ ٹی ٹی پی ءِ ہم پگراں افغانستان کجام سیم سراں سر کتگ ءُ آ بندرا چے لوٹنت ؟ اے ہم کہ وانگءُ زانگ کہ اے دور ءِ اَبدی ضرورتے ، مہ بیت؟؟ اگاں کسے وانیت گڑا آ مدرسہاں بُوانیت ،دین ءُ مذہبءِ بابتءَ درببارت بلے سائنس یا حیلکاری ءُ ہنرءِ بابتءَ کس موانیت ءُ ہچ مَزانت کہ گنہگار بیت ءُ محشرا دُوزحی بیت
اے گپّانی معنا ہمیش انت کہ اے وڑ ءُ پیم کہ مئے ملکءِ واجہ ءُ حاکماں دستءَ گِپتگ ءُ کِشکاینت اے پیما مُلکےءِ وتارا دارگ ءُ دیمروئی کنگ نیکہ تہنا گران اِنت بگندے گرانیءَ چہ گیش تر حق ءُ حُداءَ ممکن ہم نَہ اِنت پرے حاترا بائدیں کہ ملکءِ حاکم وتی کار ءُ کرد یا پالیسیاں بدل بِکن اَنت ءُ گوں بلوچاں انصافءِ گوما کشک ءُ راہے بِہ کش اَنت ۔

اے ہم کہ تہنا گوں بلوچاں راہ مہ کش اَنت بگندئے گوں پشتون ءُ ملکءِ ایدگہ نزوریں قومانی گوما کشک ءُ راہ ئے در بگیجنت ءُ ملکءَ چَرے قیامتءِ عزابءَ در بکن اَنت پنجابءَ ہفتاد ءُ ہفت سالءَ کماشی یا لُٹ ءُ پُل کُتگ سیر ءُ آباد یا فربہ بوتگ نوں بائدیں کہ پنجاب واجہیءُ کماشیءَ یلا بد انت کہ چو بنگالءِ شکلءَ ملک دگہ جنجالےءَ مہ کپیت اگاں چوش مہ بیت گڑا دیمے وہد ءُ دور بگندئے ملکءِ حاکماں موقعءُ مُہلت مہ دنت کہ پہ وتا کشکءُ راہ ئے دربگیج انت