آرمی چیف جنزل راحیل شریف ءَ وھدے گوستگیں ھپتگاں ماں بلوچستان ءَ گوں ایف سی ءَ سیادی داروکیں لہتیں واکداراں چہ آھانی واک ءُُ زوراں زبہر کتگ ات گڈا مردماں گمان بوت کہ ملک ءَ ملام واری ءِ ھلاپ ءَ مزنیں جنزے دیم ءَ آھگی انت بلئے اے گمان ءِ تہا اے شک ھم ھوار ات کہ بلکیں پیسر حکومتی کارانی ردا اے رند ءَ ھوں ھما کھورانی گانڈو دزجنگ بنت کہ گوں حکومت ءَ کنتی اَنت بلئے پدا اسلام آباد ءِ اے حال ءَ مردمانی گوش کر کت انت کہ بلوچستان ءِ ایمرجنسی ءُُ میرٹ ءِ حکومت ءِ نام ءَ ۴۶ ارب ءِ ملام واری ءِ ڈوھ انت ۔چد و پد کوئٹہ ءَ اے حکومت ءِ باسکانی پاسپورٹ کارگس ءَ مشیت ءُُ مکونڈیاں اے شک ءُُ گمان برزگ ءِ بان ءَ برت ءُُ سر کت اَنت ۔اے درچ ءَ گپ ھما وھد ءَ چہ ھلوت ءَ گوست وھدے کوئٹہ ھزانگ ءِ سیکریٹری ءِ لوگ ءِ سرا چا پہ جنگ بوت ءُُ چہ آئی ءِ لوگ ءَ حالانی ردا ۶۳ ارب کلدار درکنگ بوت کہ آئی ءِ پش در ءَ بلوچستان ھزا نگ ءِ مشیر خالد لانگو ءَ چہ وتی اگدہ ءَ دست کشی ءِ جار پرینت کہ وت پاکستان ءِ تہا ھچ وزیرے ءَ پہ چسیں بہتامے ءَ را چہ وتی اگدہ ءَ دزکشی جار نہ جتگ ۔اے بابت ءَ گوستگیں ھزانگ ءِ وزیر ءِ بابت ءَ پارٹی بومیا ءُُ رھشونانی گشگ ایش انت کہ ھزانگ ءِ وزیر ءَ آھانی گشگ ءِ سر دست کشی جار جتگ بلئے پارٹی ورکرانی گلہ ایش انت کہ ھمے راھشون وت ھم اسمبلی ءَ نشتگ انت اشاں وت پرچہ چہ اسمبلی ءُُ سینٹ ءَ ھوار پارٹی ءِ اگدھانی سرا دست کشی ءِ جار نہ جتگ؟؟؟ پارٹی ورکرانی نیمگ ءَ گوں وتی راھشوناں اے گپ ءُُ جست مزنیں بستار ءُُ ارزشت داریت اے گپ ءُُ جست ءُُ بہتام وتی جاہ ءَ برجاہ انت بلئے بلوچستان ءِ ھزانگ ءِ وزیر ءِ دست کشی ءِ جار پاکستان ءِ بن دپتر ءِ نوکیں درے ۔
اے درگت ءَ بلوچستان حکومت ءِ گوستگیں دوسال نیم ءَ حکومت ءِ سر ا۴۶ ارب ءِ ملام واری ءَ پد حکومت ءِ باسکانی کوئٹہ پاسپورٹ کارگس ءِ دیم ءَ مشت ءُُ مکونڈی ءِ احوال ھم بازیں شک ءُُ بدگمانی ودی کنت چریشی ءَ زانتکارانی لیکہ ایش انت کہ اے کہ پاسپورٹ کارگس ءَ گندگ بوتگ انت اے مردم مشتاق رئیسانی ءِ کار ءُُ کزاھاں سہی ءُُ سرپد بوتگ انت بلئے بلوچستان ءِ نیب ءِ پہ وھد ءُُ مولم اے ملام واریانی سرا کار ءُُ گامیگج ءؒ اے مردم گیشیں شیواری ءَ نشیت انت بلئے نوں بلوچستان ءِ اپوریشن ءِ نیمگ ءَ اے جار دیم ءَ پیداک انت کہ بلوچستان ءَ ملام واری ءِ حلاپ ءَ جوانیں گامیگج زورگ بیت اے درگت ءَ اپوزیشن رھشون مولانا واسیع ءَ دراھیں اپوزیشن پہ ملام واری ءِ شک ءُُ تان ءِ ھاتر ا دیم ءَ آورتگ ءُُ گشتگ کہ آ وت پہ چک ءُُ تان ءَ تیار ءُُ ساڑی اَنت ۔اے درگت ءَ اپوزیشن ءِ لوٹ ایش انت کہ ۴۶ ارب ءِ ملام واری کیس ءَ ھوار یں مردم درملک ءَ روگ ملک بہ بنت ءُُ ایشانی نام ای سی ایل ءَ مانگیجگ بنت ءُُ دومی نیمگ ءَ آھانی لوٹ ایش انت کہ چک ءُُ تان چہ ۱۹۸۸ ءَ بنا کنگ بہ بنت ۔اے بابت ءَ اپوزیشن ءَ جوانی پدر کتگ کہ گوستگیں دور ءَ ترڈ ایجوکیشن بلوچستان اایجوکیشن ،ہیلتھ ڈیپارٹمنٹ ءُُ ورلٖڈ بینک ءِ ۱۹۹۳ ءِ فنڈانی چک ءُُ تان کنگ بہ بیت ۔اے نوبت ءَ اگاں اپوزیشن ءِ نہ ترسیں گامگیج دیم ءَ آرگ بوت ءُُ ماں بلوچستان ءَ ۱۹۸۸ ءَ چہ ملام واری ءِ چک ءُُ تان بنا کنگ بوت گڈا ملک ءِ بازیں دز ءُُ مالے چہ در ءَ کیت ایشیءَ ھوار ۲۰۱۳ ءَ پد حکومت ءَ کہ بولچی مہلوک ءُُ وفاق بلوچ مہلوک ءُُ ریاست ءَ نیامی ءَ کہ یک دوری یے ودی کتگ۔گوستگیں ۲ سال ءُُ نیم ءِ حکومت ءَ بلوچ ءَ چہ بلوچستان ءِ حکومت ءَ اے مارشت درتگ کہ وفاق ماں بلوچستان ءَ وشحالی ءُُ امیری ءُُ دیمروئی ءِ ھاترا ایوک ءَ لہتیں کٹم ءُُ قبیلہ در چتگ انت ءُُ
ایندگہ نیزگار ءُُ غریبیں بلوچ پہ مرگ ءُُ بزگی ءَ دور داتگ انت نوکیں جاوراں وفاق ءُُ بلوچستان حکومت ءَ نواب ثنا اللہ زہری ءِ ھاترا اے ھژدری انت کہ بلوچ مہلوک ءِ تہا یا مارشت ءَ ودی بکنت کہ وفاق ریاست دراھیں بلوچاں یکیں چم ءَ چار انت ءُُ وفاق ءِ مول ءُُ مراد ایوک ءَ لہتیں کٹم ءُُ قبیلہانی دیمروئی ءُُ وشحالی نہ انت بلکین دراھیں بلوچستان ءُُ بلوچ ءِ وشحالی ،نیک نامی ءُُ دیمروئی اِنت۔
