صوبا ئی کابینہ ءِ اجلاس ءَ نواب زہری ءِ پاگواجہی ءَ کوئٹہ ءَ بوتگ ات ءُُ ایشیءِ تہا اے گپاں ابید کابینہ ءِ تہا صوبائی حکومت ءَ ھما گلہ کہ ۲۰۱۰ ءُُ ۲۰۱۲ ءِ نیام ءَ کہ رون ءُُ موش کتگ انت اے دراھیں کوگ ءُُ کرماں برتگ انت ،پمشکا ایشانی بدل ءَ نوکیں اسٹاک قوم ءَ را دئیگ بہ بیت ءُُ کہنیں دراھیں اسٹاک ءَ پہ دلوتانی ھاترا ءَ دئیگ بہ بنت اے لس مردمانی ھاتر ءَ بہا کنگ مہ بنت پرچکہ چہ ایشی ءَ بازیں نکس ءُُ تاوانے رست کنت ۔اے باز جوانیں ھبرے کہ حکومت ءَ را لس مہلوک ءِ جان دراہی ءِ ھیال گور ءُُ گیر انت ۔ءُُ اے ھم شریں ھبرے کہ ھرابیں گلہانی دور ءِ دئیگ ءِ بدلہ ءَ دلوتانی دئیگ ھم جوانیں ھبرے۔
بلئے اے دراھیں جیڑگ ءِ تہا دو المیں گپ دلگوش کرزنت کہ یکے ایش کہ حکومت ءَ را قوم سرپد کنگی انت کہ چنچو گلہ ھراب بوتگ ءُُ چنچو گلہ ءِ تہا کوگ ءُُ کرم بوتگ انت ءُُ ایشانی کچ ءُُ کساس چنچو بوتگ ءُُ ایشانی سرجمیں مالیات چے بوتگ ءُُ مستریں ھبر کہ ایشیءِ ذمہ وار کئے انت اے تک ءَ دو مردم ءَ را گیش جست ءُُ پرس کنگ بہ بیت یکے سیکریٹری ورد ءُُ وراک ءُُ دومی ڈائریکٹر ۔حکومت ءَ را نہ ایوک ءَ اے ھرابیں گلہانی ذمہ وار شوھا ز کنگی اَنت ءُُ اے ھم درجنگی انت کہ اے ھراب گلہ پرچہ آرت بہا کنوکاں دئیگ بوتگ انت ؟ اے ھم حکومت ءِ ذمہ داری انت کہ آ اے ھرابیں گلہ ءُُ آرتاں ایوک ءَ دلوتانی ورگ ءَ کارمرز بہ کنت ءُُ لس مہلوک ءِ دسترسی ءَ چہ دورے بہ کنت۔اے ھم المی ھبرے کہ زانگ بہ بیت انچوکیں مزنیں کچے ءَ پرچہ اے گلہ ھراب بوتگ انت۔
SILOs ءَ پہ ابرمی توپانی ءُُ زمین چنڈانی وھدءَ لس مہلوک ءِ آسراتی ءِ ھاتر ءَ چشیں گلہانی مزن مزنیں اسٹاک جوڑ کنگ ءِ جار جتگ ءُُ اے اسٹاک بلوچستان ءَ ھم جنگ بوتگ اَنت حکومت ءَ را قوم سرپد بہ کنت کہ اے ھرابیں گلہ ھما اسٹاک ءِ تو نہ اَنت،حکومت ءِ اے دراھیں کاراں ابید اے ھم آئیءِ ذمہ داری ءِ تہا کئیت انت کہ آ بلوچستان ءِ تہا جوہ ءُُ گلہانی در ملکاں برگ ءُُ دزی کنگ چشکہ ایران ءُُ افغانستان ءَ برگ ءِ سرا دارگ بجنت ءُُ ھما مردم کہ اے دزی ءَ گرگ بہ بیت آئی ءَ را دسگیر کنگ ءُُ سزا دئیگ بہ بیت۔
