یک رندے لہتیں مردم یک لانچے ءَ مشکت ءِ یک ھشکاوگیں دمگے ءَ گوں اے نزانت کاری ءَ ایر کپ انت کہ اے دبئی انت ۔مردماں ترا زرتگ پہ دبئی ءُُ آئی یے نزیکں میتگےءِ درگیجگءِ واستہ کہ اگاں دبئیءِ پولس ءَ آہاناں ءَ دستگیر کت گڈا آ الم ءَ بندیگ کنگ بنت نکہّ واتر پہ وتی ڈیھہ ءَ راہ دئیگ بنت۔دوئیں پیم ءَ آھانی ازابی انت۔ اش ۱۹۷۴ ءِ زمانگ انت ءُُ ھمادور انت کہ مکران ءَ چہ ابید پٹھان ھم ھمے راہ ءَ دبئی ءَ روگ ءِ واستہ ماں رتکگ انت ءُُ اے درگت ءَ پنجابی ھم دیم پہ کیچ ءَ رھادگ انت کہ ڈنی ڈیھ آں بروانت ءُُ وتی واستہ دھندہ یے دربیگج انت اش درگت ءَ درائیں آپ بند ءُُ بندن گوں کیچ ءُُ اندگر نزیک گورے جاھاں چوشیں مردم ءَ پرانت۔ادا من نوزدہ سد ءُُ ششت ( ۱۹۶۰) ءِ نوبت ءَ کمیں پہ برزے گپانی شاھد ءِ وڑا دیم ءَ کاریں کہ مئے دمگ ءَ بزاں کیچ ءُُ مکران ءِ اندگر میتگاں زرکہ بازیں براں کلدارے گوشنت باز کم انت ءُُ بازیں دمگے ءَ اشی کارمرز کنگ ھم کس ءَ نزانتگ ءُُ بازیں دمگے ءِ بلوچ مہلونگ ءَ زر ءِ شگل ہم جاہ نیاورتگ ۔نوزدہ سد ءُُ ششت ءَ پیسر ءَ چہ اش نوبت ءَ داں مئے دمگ ءِ دراھئیں سودائی جنس ءِ بدل جنس چوش بگوش کہ دان ءِ بدل ءَ گد ءُُ پچ ءُُ ناہ ءِ بدل ءَ ماھیگ ءُُ بانکلینک ،ھرچی کہ پکاریگ بوتگ یک چیزے گوں دومی ءَ مٹ ءُُ بدل کتگ بہاگپتگ ۔گڈا نوزدہ سد ءُُ ششت ءِ ءِ نوبت ءَ مئے دمگ ءَ مارں رتک یک پٹھانے ءِ کہ چد ءُُ پیش انچو پٹھان مئے دمگ ءَ اش درگت گندگ نہ بوتگ نوں پٹھاناں مئے دمگ ءَ ھم ھما سوداگری بنا کت ھما وڑا کہ جنس ءِ مٹ جنس ۔بلئے اشانی وڑ یک دگہ رنگ ءُُ ڈولے ات ۔کہ اشاں رزان پہ کلنڈمٹ ءُُ بدل کت کوھین پیتی ءُُ لوھئیگ زرت ءُُ نوکیں ازبات دات اش سوداءِ نیام ءَ ھم زر ءُُ کلدار نیست ات بلئے یک ءُُ دوسال ءَ یک اشاں گد ءُُ گڈ پہ بڈ ءُُ سر آورت ءُُ سرجمین دمگ ءَ ھمک ڈک ءُُ گس ءُُ میتگاں ودی بوھگ بنا کت ۔پٹھان دمگ نوبت نوزدہ سد ءُُ پنجاہ ءُُ ھشت (۱۹۵۸) ءَ پد بزاں نوزدہ سد شست ءِ دور ات کہ ایوبی زرنچ ءَ ( آمریت) درسیں دمگ ءَ سودا گر ءُُ بیپاری کت رزان درت انت ھیرانیں چماں ما دیست کہ جر ءُُ گد پٹھاناں بے جست ءُُ بیپرس ءَ دمک پہ دمک،بازار پہ بازار ،میتگ پہ میتگ ءَ پہ وام داتگ دیمئے سال ءَ تکہ شش ماہ ءَ پد آ اتک ءُُ وتی وام داتگیں گد ءُُ چیزانی زرے لوٹ ات انت اش درگت ءَ دان ءِ ناہ/ھورماگ ءِ کہ بھابوت مہلوک ءَ اش زران ءَ پٹھان ءِ واستہ ایر کت انت کہ آہاں گد وام کتگ ات۔بلئے مئے دمگ ءِ شریک ءِ بہر انکدگ نئیت کہ آ پٹھان ءِ وام ءَ زمستانی شپاں وتی ءُُ زھگانی لاپ ءَ ولینت بکنت۔ زر نسیت ات ءُُ پٹھان ءِ وام ھم درنئیتک انت نوں چون بیت ءُُ پٹھان وتی واماں پہل نہ کنت ۔چہ ایش نوبت ءَ پیش ھمے مہلوک ءَ گوں ادے دکاندار ءُُ بیپاریاں کہ بکال وگور و سوداگر بوتگ ات گوں مہلوک ءَ شریں وڑے ءَ دست کمکی اش وڑ کتگ کہ ھروھدی مال دست کپیت گڈا منی واماں بدئے ءُُ بلئے نوں بکالانی جاہ ءَ پٹھان ودی بوتگ انت کہ اش دمگئے مہلوک ءِ واستہ نوکیں تہرے ودی بوھگ ءَ ات ۔نوں بلوچ مہلوک ھیران ات انت کہ پٹھان وا مرتگیں وامدارے کبر ءَ ( قبر) لٹ جن انت کہ منی وامانی دئیگ ءَ ساری چیا مرتگئے ۔نوں دمگ ءِ مہلوک ءَ زر پکار ات ۔زر چہ کجا کئیت ءُُ چوں کئیت اش یک انچیں جست ات کہ ایشی ءِ پسو کسی گور ءَ نیست ات بلئے گنجیں گوادر کہ مئے مہلوک ءِ گڈٰ آسرات کہ چہ آود ءَ گد ءُُ سگریٹ ءَ بازیں لوگی کارمرزی سار ءُُ سامان دست کپگ ءَ ات وس ءَ چہ درات کہ درانی ڈیھ چیز چہ ادا شپکی بوھگ ءَ ات انت۔ بلئے پٹھانانی درگت ءَ چو نہ بیت۔اولی سوب اش ات کہ بکال مئے دمگ ءِ مکرمی جہمنند بوتگ انت ءُُ پیمش ءَ مہلوک ءَ گوں رتک ءُُ ریچ گپت ءُُ گیری ،نند ءُُ نیاد ءَ پجاروکی بوتگنت ءُُ بکالاں ادے بلوچ مہلوک دود ءُُ ربیدگ ءُُ تر ءُُ گرد ءَ سرپد بوتگ انت دومی نیمگ ءَ پٹھان درآمد ءُُ دراں جہتی ئے سوب ءَ گوں جہمندیں مردمانی نمرتگیں ندیستگیں نند ءُُ نیاد ءَ مدام ھور ءُُ توار نہ بوتگ تانکہ سرجمی ءَ یکئے دومی ءَ گوں رتک ءُُ ریچ مہ بیت۔نوں ماچار ات کہ پٹھانانی رتک ءُُ ریچ باز وھد جنت ءُُ اش سال ءِ یک رند ءُُ دو رنداں اے دمگ ءَ اتک ءُُ شتنت ءُُ اش سوب ات کہ گوں جہمندیں مہلوک باز دیراں اشانی گون ءَ نزیکی بوت کنت اش درگت ءَ بازیں نباشداں وتی نام مٹ کت ءُُ گد زرت ءُُ بازینی ءَ دگرے نام ءَ وام کت بلئے چہ درساں مستریں دریگت اش ات کہ سال ءَ داں پوریاتگریں مہلو ک ءَ وام دزنئیک انت آئی ءِ سوب اش ات کہ چہ ڈگار واھنداں انچو ک بڈ ءُُ مزوری بزگر ءَ ترس ایت کہ آ زھگانی لاپ ءَ بوالینت ءُُ پٹھان ءِ ھم وام ءَ بدانت ءُُ پٹھان ھم کس ءَ گوں چو رتک ءَ ریچ نئیست کہ آ کم وھدے واستہ دستہ بدار انت ءُُ واماں مہتل بکن انت ۔نوں کہ پٹھان واماں الم ءَ گپت پہ اش دریگت ءِ ھاترا ءَ دمگ ءِ پوریات گر ءَ زرے شوہازگ ءِ جست ءُُ پرس بنا کت۔ اش ھما نوبت انت کہ عمانی سرکار چہ گوادر ءَ ھم واتر بوتگ ات ءُُ ھرمردم ءِ کہ گوادر ءَ ات عمانی سرکار ءَ اش جار ءَ پرینت کہ کسے مشکت ءَ لوٹیت آ مشکت بیاانت بازیں مہلوکے گوں ھمیش جار ءَ لانچاں سوار بوت ءُُ مشکت ءَ ( مسقط) وَ شت ءُُ بازیں پشت کپت۔ ( ۔۔۔روان اِنت۔۔۔)
