بلوچانی سر ءَ باز براں ھمے بہتام مششگ بیت کہ شما نہ وانندگ ءُُ جاہل ءِ اے گپ ھم راست انت کہ بلئے وانگ ءِ ھاتر ءَ وانگجاہ لوٹیت کہ ھچ حکومت ءَ بلوچ قوم ءَ دات نہ کتگ ۔نہ بلوچستان ءَ جوڑیں اسکولے است ،نہ کالج ءُُ یونیورسٹی ،اے ھم بلوچانی ھدادادیں گنج انت کہ آھاں گوْمے نہ ھچیں وانگجاہ آں وانتگ ءُُ دنیا ءِ گوما ھمگامی کنگ ءَ انت۔سرجمیں پاکستان ءِ تہا کلاں کم وانگجاہ آنی کچ ءُُ کساس بلوچستان ئیگ انت ،سرجمیں بلوچستان ءَ ایوک ءَ دو جنرل یونیورسٹی است انت یک یونیورسٹی آف بلوچستان کوئٹہ ءُُ دومی تربت یونیورسٹی کہ وتی نورک دومی ءِ تہا انت۔انگت نیم سرجم انت ،ماگشت کناں جنرل یونیورسٹی ھمے یکین انت ءُُ ھمے یکیں یونیورسٹی ءَ ھم حکومتی جہگیر جوانی ءَ آسراتی دات نہ کناں گپ بلا بلاھیں کناں بلئے کار ءُُ کرد ایشانی گندگ نہ بنت ، ھمے رنگ ءَ ۲۰۱۴ ءُُ ۲۰۱۵ ءِ سال پہ یونیورسٹی آف بلوچستان کوئٹہ ءِ ھاتر ءَ نیک پالیں سالے منگ بیت پرچکہ اے سالانی تہا یونیورسٹی ءِ تہا مزن مزنیں بدلی گندگ بوت یک نوکیں مردمے کہ آئیءَ یک دو سال پیسر ءَ کہ یونیورسٹی دیستگ آ نوں بئیت ءُُ ایشیءَ بچار ایت آ ھیران بیت کہ اے ھما یونیورسٹی انت ۔بزاں ماڑی ءُُ درچکانی لیٹنگ ءُُ پادراہ(فٹ پاتھ) ءءِ جوڑ کنگ ءُُ اے دگہ نوک نوکیں در ءُُ دریگانی بدل کنگ ءُُ دیوالانی سرءَ تار ءُُ کنٹگ جنگ ءَ بگندیت آ ھیران بیت۔بلئے ھمے مردم ءَ بگش کہ بیا یکبرے نودربرانی وانگی آں بچار،بیا یکبرے استادانی وانینگ ءِ دروشم ءَ بچار،بیا یکبرے وانگ ءُُ زانگءِ وڑ ءُُ پیم ءَ بچار گڑاں تو دیست کنئے کہ یونیورسٹی ءِ تہا ھچی بدل کنگ نہ بوتگ۔کل ھما انت۔ ھمے یونیورسٹی ءِ تہا یک کنڈے ءَ بلوچی زبان ءُُ لبزانک ءِ ھم بہرگے پہ نہ دلکشی جوڑ کنگ بوتگ ات بلئے اے بہرگ ءَ ھردور ءَ وتی کرد ءَ گوں یونیورسٹی ءِ دلگوش وتی نیمگ ءَ آرتگ ءُُ پیشداشتگ کہ اے بہرگ چہ یونیورسٹی ءِ ھچ بہرگ ءَ کمتر نہ انت ایوک ءَ آسراتی لوٹیت کہ دئیگ بوھگ ءَ نہ اَنت۔ھمے بہرگ ءِ سرکماشی عبداللہ جان جمالدینی ءَ گون بوتگ ،ڈاکٹر زینت ثناء گون بوتگ ،ڈاکٹر عبدالصبور گون بوتگ ءُُ نوں اے بہرگ ءِ سر کماشی ءَ واجہ رحیم بخش مہر کنگ ءَ انت ۔ من اے دگہ واجہ کارانی باریگ ءَ نہ دیستگ بلئے اشکنگ ءَ ھمے بوتگ کہ ایشاں بلوچی ڈیپارٹمنٹ ءِ بن ھشت ایر کتگ ءُُ ھمیشانی برکت انت کہ مرچی بلوچی ڈیپارٹمنٹ ءَ را یونیورسٹی ءَ نامے است ،بلئے دو باریگ من گوں چماں دیستگ ءُُ یکے برجم ءُُ جاری انت ۔بزاں ڈاکٹر عبدالصبور بلوچ ءُُ واجہ رحیم بخش مہر ءِ باریگ ،ھردو واجہ کاراں نہ ایوک ءَ بلوچی ڈیپارٹمنٹ ءِ تہا وتی کرد ءُُ کتہ کاری پیش داشتگ انت بلکیں بلوچی لبزانک ءِ تہا اوں ھمے واجہ کارانی کتہ کاریانی سوب ءَ بازیں چیزے ءِ گیشی اتکگ ،۔ زی بلوچی لبزانک ایوک ءَ شاعرانی کوپگ ءَ بوتگ ءُُ ھماآں اے زبان ءُُ لبزانک ءِ گران باریں بار وتی کوپگاں زرتگ ءُُ ایشیءَ را چہ گاری ءَ رکینتگ مرچی ھما کار واجہ عبدالصبور بلوچ ءُُ رحیم بخش مہر ءِ سوب ءَ نوک ورنائیں نودربر ءُُ پولکارانی بڈ ءَ داتگ انت۔ابید چہ ایشیءَ واجہ مہر صاحب ءَ یک نوکیں دودے ءِ بنگیج ھم کتگ کہ چد ءُُ ساری اے ڈیپارٹمنٹ ءِ تہا نہ بوتگ ات کہ بلوچی زبان ءُُ لبزانک ءِ کجام یک کواس ءُُ ندکارے کہ سرکپتی پہ شال ءَ کہ اتکگ گوں آئیءَ یک نیادے الم ءَ ڈیپارٹمنٹ ءَ کنائینتگ بزاں ھما ندکار ءَ را ھم دلبڈی یے رستگ ءُُ بلوچی نودبرانی ھاتر ءَ یک سکینے بوتگ ۔ اے وڑیں چست ءُُ ایر ھروھد ءَ برجم دارگ بہ بنت بائد انت کہ چہ ایشیءَ نیام ءِ دور ی ھلاس بنت ءُُ بلوچی لبزانک ءِ کار دیم ءَ روان کن انت۔بلوچی ڈیپارٹمنٹ ءِ گوں لبزانک ءَ یک مزنین سیادی یے بندوک انت یکے وَ اے ھاتر ءَ کہ بلوچی ڈیپارٹمنٹ ءَ بلوچی زبان ءُُ لبزانک وانینگ بیت ءُُ دومی اے ازم کدگ ءِ تہا بلوچ نودربراں پہ زبان ءُُ لبزانک ءُُ پولکاری ءِ کارانی ھاتر ءَ تیار کنگ بنت دانکہ آوکئیں وھداں آ پہ زبان ءُُ لبزانک ءَ جوانتریں کارے کت بہ کنت ۔اے تک ءَ بلوچی ڈیپارٹمنٹ وتی کرد ءَ پیلو کنگ ءَ انت ۔بلئے چاپ بہہ یک دست ءَ توار نہ کنت اگاں رحیم مہر ءَ ڈیپارٹمنٹ ءِ تہا چندے نوکیں کارانی بند ءُُ بوج کتگ چوکہ عہد بستگی داد ءُُ گل خان نصیر چئیر، ءُُ اے دگہ کار آئیءَ ایوک ءَ نہ کتگ بلکیں آئی ءَ را بلوچی زبان ءُُ لبزانک ءِ مزن نامیں رھشونانی ھم کمک ءُُ مدت گون بوتگ گشگ ءِ مول ایش انت کہ واجہ مہر صاحب ءَ جوانیں باسکانی کمک ءُُ مدت گون بوتگ ءُُ آئیءَ وتی رھشونی ءَ بلوچی لبزانک ءِ ھرچند کہ آئیءِ دست ءُُ وار ءَ بوتگ آئیءَ کتگ اے تک ءَ نودربرانی کرد ھم ڈالچار کنگ نہ بیت کہ ھمک گام ءَ گوں ڈیپارٹمنٹ ءَ گوں بوتگ انت ءُُ من وتی جندءِ دوئیں سالانی درور ءَ دیاں کہ انچو مراگش ءُُ دیوان کہ مئے دوئیں سالاں ( ۲۰۱۳،۲۰۱۴) ءَ بلوچی ڈیپارٹمنٹ ءَ بوتگ ات کہ دگہ سالاں نہ بوتگ ات۔ھمے مراگشانی تہا بلوچی ءِ زبان ءِ ھما مراگش ھم ھوار انت کہ وھدے رحیم مہر ءُُ ڈیپارٹمنٹ ءِ باسک ءُُ نودربرانی یک چکاسے بوتگ ات کہ وھدے بلوچستان ءِ درائیں شائر گل خان نصیر ءِ روچ ءَ آرگ ءُُ جم کنگ بوت انت ءُُ اے یک دپتری روچے ات کہ بہہ بلوچی لبزانک ءِ تہا چشیں نوبت نیتکگ ات کہ دراھیں شاعر ءُُ لبزانت ءُُ ندکار یکیں پتر ءِ سرا نندوک بہ بنت۔اے شرپ ھم مئے سال ءَ را نسیب بوتگ ات۔ گڈ سرا ھمے گشگ لوٹاں کہ بلوچی لبزانک ءِ تہا اے نوکیں دور ءَ ھرچند کہ دیمروئی کتگ کہ ایشیءِ تہا یک مزنیں دستے بلوچی اکیڈمی کوئٹہ ءُُ بلوچی ڈیپارٹمنٹ کوئٹہ ءِ ھوار انت،کہ کس چہ اے گپ ءَ انکاری بوت نہ کنت ،مئے سروک ءُُ ھکومتی جہگیر گپ وَ باز کناں بلئے ایشاں لوٹیت کہ ھمے گل ءُُ کدّگانی زور ءُُ تاگت ءَ گیش بہ کن اَنت دانکہ آ گیش ءَ چہ گیش زبان ءُُ لبزانکءِ ازمت ءَ کت بہ کن اَنت بلئے گندگ چش بوھگ ءَ نہ انت وھدے بلوچستان ءِ تہا،بلوچانی توکءَ ،بلوچستان ءِ یکیں یونیورسٹی ءَ ،بلوچانی سروکی ءُُ حکومت ءَ ،بلوچی ڈیپارٹمنٹ اے رنگ ءَ ڈالچار کنگ بوھگ ءَ انت ،ایشی ءِ تہا میار کس وت ءَ نہ کنت۔
