۱۹ ءُُ ۲۰ مئی ءَ ڈسٹرکٹ کونسل ھال پنجگور ءَ دو روچی لبزانکی مراگش برجم دارگ بوتگ کہ ایشی ءِ تہا کوئٹہ کراچی ءُُ پنجگور ءِ جتائی ھند ءُُ دمگانی مردماں بھر زورت ۔اے مراگش ءِ دو بہر ءَ کنگ بوتگ ات۔ ۱۹ مئی ءِ بیگاہ ۵ بج ءَ سیمنار انت کہ آئیءِ بنگپ ’’ بلوچی لبزانک ءَ ردانک ءِ سفر‘‘ ءُُ ایشی ءَ جار چینی ءَ ظہور خان زیبی ءَ گون ات ۔اے سیمنار ءَ چہ کراچی کوئٹہ ءُُ پنجگور ءِ ندکاراں وتی پیپر ونت انت اے مراگش ءَ واجہ رمضان بامری،رحیم مہر ،اے آرداد ،اسحاق خاموش،سیعد عزیز اللہ ،بشیر شہزاد ،ءُُ مجاہد بلوچ ءَ وتی پیپر ونت انت اے مراگش ءِ تہا واجہ فقیر عنبر حاجی حیاتان ،حاجی حسن گچکی ، اویس قبال،الطاف بلوچی بشیر بیدار ،نور محمد نورل ءُُ صادق رہچار ءُُ دگہ بازیں ھندی ءُُ دری ندکار ھوار انت ۔ اے مراگش ءِ کمک کار ءُُ پاگواجہ صوبائی وزیر جان سلامتی رحمت صالح بلوچ ات آئیءَ مہماناں وش آتک کرت ءُُ اے امیت ءُُ واھگ ءِ درشان کرت کہ عزت اکیڈمی ھمک وھد ءَ اے وڑیں مراگش برجم دارایت منی مدت ءُُ کمک ہر وھد ءَ گوں عزت اکیڈمی ءِ گوں انت سیمنار ءِ گڈی ءَ واجہ رحمت صالح بلوچ ءَ پیر وانوکاں ءَ یاتگاری شیلڈ دات اے مراگش شپے ءِ ۹ ءَ آسر بوت ۔ ۲۰ مئی ءَ اے مراگش ءِ دومی بہر انت اے مراگش دوبہر ءَ بہر کنگ بوتگ ات اولی بہر شعری دیوانءُُ دومی ساز ءُُ زیملی مراگش سہب ءَ شعری دیوان بندات بوت اے مراگش ءِ جارچینی ءِ ڈبہ حفیظ ءُُ اسحاق خاموش ءَ گون ات اے مراگش ءَ چہ درءَ آوکیءں پنجگور ءِ ھندی بازیں شاعراں وتی شعر دیوان ءِ دیما وانت انت بشیر بیدار ،اسحاق خاموش ،اے آرداد ،صادق رہچار ،اقبال زہیر ایوب شوہاز اکرام ذاکر ءُُ دگہ بازیں شاعراں وتی شعروان انت پنجگور ءَ مدام اے گشگ بوتگ کہ مذہبی انہتا پسندی باز انت بلئے اے روچ من وت حیران بوتاں کہ جمعہ نماز وھد نزیک ات بلئے کلاں گوں آرام ءُُ سکون ءَ وتی شاعرانی شعر وانت انت بلکیں بازیں حافظ قرآن ءُُ مدرسہ فارغ بوتگیں طالباں ھم وتی شعر دیوان ءِ دیم ءَ وانت کہ ایشی ءِ ھمے پدر بوت کہ پنجگور مردماں گوں وتی زبان ءُُ لبزانک ءَ باز مہر واھگ است بلئے آھاں آ چاگرد دئیگ نہ بوتگ نوں اگاں عزت اکیڈمی وتی فرض ءَ پیلو بکنت پنجگور ءَ لبزانک پدا ردوم زوریت ۔ اے مراگش کساس نیم روچ ءِ ۲ بج ءَ ھلاس بوت ایشیءَ پد وش نیور ءِ اینکر الطاف بلوچ ءَ بلوچی لبزانک ءَ ردانک ءِ بنگپ ءِ سرا مراگشے ریکارڈ کرت کہ آئیءِ تہا رحیم مہر ،اے آرداد ،اسحاق ،اویس قبال ءُُ بشیر بیدار ءَ بہر زرتگ ات ۔ اے مراگش ءِ گڈی بہر ساز ءُُ زیملی بہر ات کہ اے مراگش ءِ جارچینی ءِ ڈبہ ذاکر ءِ کوپگان انت اے مراگش ءِ بندات بیگاہ ءِ شش بج ءَ بوت کہ ایشی ءِ تہا ھندی ءُُ گشندھاں بہر زرت اے مراگش ءِ تہا استاد نور ل ،نعیم رحمدل ،لیاقت ،رسول جان ءُ دگہ بازیں گشندھاں بہر زرتگ ات۔ اے مراگش ءَ انچو باز مردم آتکگ ات کہ مردماں نندگ ءَ جاہ نہ بوت بلکیں مردم وتی پادانی سرا اوشت انت اے مراگش دلگوشی ءَ گوش داشت ءَ وتی ازمکاراں داد دات چہ اے مراگش ءِ سرجمی ءَ داں اے ھبر پدر بوت کہ پنجگور ءِ مردماں لبزانک ءِ گوما دوستی است انت پرچکہ مراگشانی تہا کماش ،ورنا، نودربر ءُُ زند ءِ ھمکا پڑ ءِ سیادی داروکیں مردماں بہر زرت ۔ ا ے مراگش کسا شپ ءِ دہ ءَ ھلاس بوت ۔ ایشاں ابید بلوچی اکیڈمی ،استین ،مہردر ءِ کتابانی میلہ ھم بوت کہ آئیءَ تہا مردماں بازیں کتاب بہا زرت گڈی ءَ من ھمے امیت ءَ کنان ء عزت اکیڈمی ءِ سنگت ھمک وھد ءَ اے وڑیں پر مڑائیں لبزانک مراگش برجم دار انت داں کہ مئے زبان ءُُ لبزانک دیمروئی بکنت۔
