بلوچ سیاستءِ تہا اے وھدءَ نیبءِ میرانی ڈیم ءِ زدگانی مزّانی پش درءِ کرپشنءِ پشتءَ بے ترک ءُُ تواری بازیں جستءُُ بسیّتّے پیداک کنگان انت گوستگیں وزیر اعلیءَ چمءِ زاہرءَ بازیں کارے ریاستءِ حقءُُ پلہ مرزیءَ کتگ بلے چیر ءُُ پہنیامی اے دراھیں کار ریاستءُُ وفاقءِ دلگیریءَ شتگ انت ءُ مھلوک ءِ دلءَ ریاستءِ سرا مزنیں کستءُُ کینگے ودی بوتگ کہ ریاست ایوکالہتیں مردماں وش ءُُ آباد کنگ لوٹ ایت ءُُ ایندگہ بلوچاں گارءُُ بیگواہ کنگءِ پدا انت ھمے جیڑھاں یکے میرانی ڈیم زدگانی مزانی ئیگ انت۔ میرانی ڈیم گوستگیں وزیر اعلیءِ تحصیل تربتءِ ھند” میرانی گورم”ءِ سرا بستگیں ڈیمے کہ گوستگیں وھدءَ وھدے ڈسٹرکٹ کیچءَ نیشنل پارٹی ءِ حکومت ات گڈا ڈیم بندگ بوت 2007ءَ ڈیم سرجم بوھگءَ پد چو کہ کیچ کورءُُ نہنگءِ آپءَ راہ ءُُ درنیست ات گڈا 6یونین کونسلاں کم چہ کم 30ہزار مردم گوں وتی مال ءُُ ملکت، جاہ ءُُ جائیداد ءُُ فصل ءُُ مچکدگاں اے ڈیمءِ آماچ بوت انت۔
آ وھدءِ ڈسٹرکٹ حکومتءَ وتی ردی منّ ات ءُُ آ دورءِ چیف ایگزیکٹیو جنرل پرویزمشرفءَ وت ڈیمءِ تروتاب کت ءُُ پہ ڈیم زدگاناں بازیں مزّ ءُُ مالےءِ جار جت بلے گوستگیں بازیں سالاں ڈیم زدگانی مز ءُُ حق مھتلیءِ آماچ بوتگ انت۔ گوستگیں وزیر اعلیٰ ءِ گچین کاریاں بہر زورگءِ مستریں اوگام ہمیش ات کہ آ وتی تحصیلءِ ڈیم زدگانی مزّ ءُُ حقاں چہ حکومتءَ گپت ءُُ دنتءُُ تحصیلءِ مردماں ہمے اوگامءِ پشتءَ آئیءِ پارٹیءَ را ووٹ دات پرچاکہ ڈیم زدگانی گیشتری بہر وت گوستگیں وزیر اعلیٰءِ سیادءُُ عزیزانی ات ءُُ ایندگہ بھر آئیءِ پارٹی ووٹرانی بلے گوستگیں وزیر اعلیٰ گوں وتی نزیکیں عزیز گوستگیں ڈی سی ضلع کیچءِ ھمراھیءَ ڈیمءِ مزّ ءُُ حق ایوکا وتی سیادءُُ عزیزاں بہرءُُ بانگ کت انت۔ اے درچءَ ناصرآباد، نودز، چربک، گوڈی، کلاتک، خیرآباد، شئے کہن، سولبند، للین ءُُ ایندگہ یوسیانی غریب ءُُ نیزگاریں حق دار چہ وتی مزّاں اے وھدءَ زبہر انت اے درچےءَ مردماں مزنیں زھر شانی یے درشان کتگ باریں مردماں وتی حق جنیءِ سرءَ نیب ءُُ ایف سی ھندی کمانڈرءَ کاگدءُُ کراچ ہم نبشتہ کتگ بلے پاکستانءِ پاک ءُُ ایمانداریں فورسزاں ھوار اے وھدءَ نیب ھم بے ترک ءُُ توار انت۔
دمگءِ مھلوک ابکہ ءُُ حیران انت کہ نیب کجام لب ءُُ ملامءَ اے MEGAکرپشنءِ پشتءَ بے ترکءُُ توار انت۔ اے ھندءِ دراہیںیوسی چیرمینانی ردءَ آھاں گوستگیں ڈی سی ضلع کیچءِ اے ناروائیں کارانی پشت درءَ نیبءَ نبشتہ کتگ بلے ھچ وڈیں پسّہ یا کارے دیمءَ نہ یتکگ۔ نوں اے ردءَ مھلوکءِ دلءَ پہ نیبءَ مزنیں جست ءُُ گپے ودی بوھگان انت کہ نیب اے واستہ جوڑ کنگ نہ بوتگ کہ مھلوکءِ ذرءُُ مالانی چہ ملام واریں آفیسران جست ءَ بکنت بلکیں اے حاترا جوڑ کنگ بوتگ کہ ریاستءِ پشتءَ وتی سیاسی مخالفاناں زیر کنگ بہ بیت پمیشکہ نیبءِ ھزانگءِ سکریٹری 63کروڑءِ کرپشنءَ را چہ ھزانگءِ کاراں گیش مشتاق رئیسانی ءِ گوستگیں سیکریٹری مائنزءِ ردءَ چارگ بوھگان انت اگاں ناں اے وڑیں پدرائیں کرپشن پاکستانءِ کجام ھندءُُ جاہءَ بوتگ کہ یک کوٹی یے ھاترا 11لکھ کلدارءُُ 11کوٹی ءِ حاترا یک لکھ کلدار دئیگ بہ بیت؟گپ ایش انت کہ ڈیم زدگانی اے MEGAکرپشن چہ نیبءِ چماں چیر انت؟ اگاں ناں گڈا نیبءِ اے بے ترکءُُ تواریءِ معنا چے انت ءُُ اے درگتءَ ڈیم زدگ اگاں وفاقءُُ ریاستءِ بابتءَ لیکہ یے دار انت گڈا آ رد انت۔
