واجہ عبدالواحد بندیگ ءِ چہ بلوچی اکیڈمی ءِ کماشی ءَ دزکشی اے حاترا جوانیں حالے نہ ات کہ ایشیءِ پشدر ءَ مستریں سوب آئی ءِ نادرائی ات واجہ عبدالواحد بندیگ وتی نادراھی ءُُ ناجوڑی ءِ سوب ءَ انڈیا ءَ ھم شتگ ات ۔انڈیا ءِ آھگ ءَ پد آ کسانیں حدے ءَ دراہ ءُُ جوڑ بوتگ ات بلئے آئی ءِ جند گمان ھمیش ات کہ آ گرامیں ءُُ مزنیں ڈبیے ءِ کوپگاں چد وگیش زرت نہ کنت پمشکا آئی ءَ بلوچی اکیڈمی بندو بوجی دیوان ( ایگزیکٹوباڈی ) وت توار جت کہ آئی ءِ تہا آئی ءَ وتی دست کشی نمدی دیم ءَ آورت اشکنگ ءَ بندو بوجی دیوان ءِ درائیں باسک آئی ءِ اکیڈمی کماشی ءِ دزکشی ءِ ھک ءَ نہ بوتگ انت پدا آئی ءِ بندرباسک ءِ دزکشی ءِ سرا باز منت گیری کرتگ کہ آ وتی بندری باسکی ءَ چہ اکیڈمی ھلاس مہ کنت ۔ اشکنگ ءَ اے درچ عبدالواحد بندیگ ءِ لیکہ اے بوتگ کہ اگاں آ پہ اکیڈمی کار ءُُ ڈبہ یے ءِ زرت نہ کنت گڑا ھشکیں باسکی ءَ مانا نیست یک حدے ءَ آئی ءِ گپ راست انت ھم کہ باسکی ءِ مانا مدام ھمیش انت کہ پہ ادارہ ءَ مردم کارے کرت بکنت بلئے اے گپ جوازت اے وڑا پشت نہ کپ ات کہ عبدالواحد بندیگ ءِ پہ بلوچی اکیڈمی ءَ کار ھذمت چہ کس ءَ پد ءُُ چیر نہ انت عبداواحد بندیگ اکیڈمی ءِ ھما باسکاں ھوار بوتگ کہ آھاں وتی وھد ءِ گیشتریں بہر پہ اکیڈمی ندر کتگ ایشیءَ ھوار عبدالواحد بندیگ اکیڈمی گرانٹ ءُُ آئی ءِ نیک نامی ءِ ھاترا شپ ءُُ روچ کار کتگ کہ دگر باسکے بلکیں کت بکنت ۔عبدالواحد بندیگ ءِ ھمے دور ءَ بلوچی اکیڈمی ءِ گرانٹ چہ درستاں گیش وداتگ کتاب چاپگ ءِ بہر گیشتر بوتگ کتابانی سند ءُُ واناکی ھم گیشتر بوتگ ۔اے درائیں کار ءُُ ھذمتانی پشت ءَ اکیڈمی عبدالواحد بندیگ ھمنچک منت گیری ءَ بکنت کم انت اے درگت ءَ اشکنگ بلوچی اکیڈمی ءِ باسک ءُُ اگدہ داراں اکیڈمی ءِ پیسریگیں کماش ءِ کار ءُُ ھذمتاں منتگ ءُُ اکیڈمی بلکیں زوتان پہ پیسرتگیں کماش ءِ منت واری ءَ دیوانے برجم بداریت بلئے چد ءُُ پیش لہتیں نادانیں دوست ءُُ دانائیں دژمناں اے درائیں جاورحال ءَ را دگہ رنگ ءُُ دروشمے دئیگ ءِ جہد کتگ کہ دوستانی نادانی ءُُ دژمنانی شیواری ءُُ منافقی ءُُ پلینڈی ءِ شون ا نت عبدالواحد بندیگ ءِ دست کشی ءَ پد ھما وڑیں گپ ءُُ ترات کہ روتاک ءُُ چاگردی رسانک در( social media) ءَ دیم ءَ آتکگ انت آھانی ناں اخلاقی جوازت ھست ءُُ نیکہ بلوچی میار ءُُ انسانی رھبندانی ردا توجیلے ھنچو گمان بیت کہ چرے دست کشی ءَ بلوچی اکیڈمی ءُُ عبدالواحد بندیگ ءِ وشنیاتک شادمان ءُُ گل بوتگ انت ءُُ وتی ھمے گل ءُُ شادانی آ چہ اخلاقی سند بلوچی میار ءُُ چاگردی رھبنداں چٹ پراموش بوتگ انت ءُُ اے بیھال انت کہ دگرے ءِ سرا بے سر ءُُ بنیں بھتام جنی ءِ پشدر ءَ اسل ءَ آھانی جند ءِ شخصیت پدر ءُُ سہرا بوان انت پرچکہ بلوچی اکیڈمی باسکانی نیمگ ءَ بار بار اے گشگ بوھگان انت کہ عبدالواحد بندیگ چہ اکیڈمی ءِ کماشی ءُُ بندری باسکی ءَ چہ اکیڈمی ءِ نیمگ ءَ ھلاس کنگ نہ بوتگ بلکیں آئی ءَ وتی نادراھی ءِ سوب ءَ وت دزکشی ءِ بارجتگ ءُُ اے چشیں مزنیں گپے نہ انت ملک ءُُ پارٹیانی کماش ھم وتی اگدھاں دزکش بوتگ انت ءُُ بنت اگاں بند پتر ءَ اولی رند ءَ بلوچی اکیڈمی ءِ کماش ءَ دزکشی ءِ جارجتگ گڑا کجا ھونے چہ آزمان ءَ رتکگ ءُُ مردم چیا بگلک انت ۔۔۔۔اے چو
نہ انت کہ ’’ کنگ ءِ شکار آپ ءِ لرد ءَ انت‘‘
