مرچاں لبزانک ءِ تہا جدیدیت ءُُ کلاسیکل ءِ رھبندانی زورگ ءِ سر بلاھیں گپ ءُُ ترانے بوھگ ءَ اِنت کہ ایشی ءِ تہا بازیں لبزانت ءُُ زانتکارانی گشگ ھمیش اِنت کہ جدیدیت یاکہ نوکی پہ لبزانک ءَ زورگ مہ بیت بلئے لہتیں مردمانی گشگ اِنت کہ اگاں چیزانی تہا نوکی آرگ مہ بیت داں آ چیز وتی تہا کہن بے تام بنت ۔من ھمے گشگ لوٹاں کہ چیزےءِ نوک کنگ نوکی نہ اِنت بلکیں نوکیں ھیال ودی کنگ نوکی اِنت انچیں ھیالے کہ چد ءُُ ساری کس ءَ ندیستگ ءُُ نہ اِشکتگ۔ اے نہ اِنت کہ آ چہ بنی آدمی پگر ءَ در بہ بیت بلئے انچیں ھیالے اوں مہ بیت کہ ھیالے ءِ بدل ءَ بکواس ءُُ پوچکیں ھبرے بہ بیت۔
اگاں کسے آزمان ءَ کاگدے کنت ءُُ کیسگ ءَ مان کنت داں انچیں لوجکے ھم بدنت کہ ہرکس ءَ راباور بہ بیت کہ ھو! چو بوت کنت ،بلئے اِناں ما ایوک ءَ لبزانی انچیں بے سر ءُُ بے بُنیں ھسابے ءَ بیان کنگ ءَ را نوکی گش اَنت ،بزاں کوھانی ناچ کنگ،استالانی گُدگور ءَ دئیگ ءُُ ،دیوالانی بانزل پر کنگ ءَ را ما نوکی گش اَنت،بلئے اے نوکی نہ اِنت ،بقول منیر مومن ءِ کہ نوکی ءَ را دگہ کانٹے پر نیست، نوکی استیں لبزءُُ ھیالانی نوکیں درشانداب ءَ بیان کنگ ءِ نام اِنت،انچوکہ گلاب رک ،وَ باز رند ءَ گشگ بوتگ ءُُ نامداریں چہر ءُُ شبینے اوں زانگ بیت بلئے اے نوں کہن اِنت پرچکہ بازیں شائر ءُُ لبزانتاں بازیں رند ءَ اے چہرءَ را کار مرد کتگ پمشکا نوں ایشیءِ تام ءُُ لزت گار اِنت ،بزاں بے تام اِنت اگاں ھمے رک ءَ نوں کسے’’ سگار رک‘‘ بہ بکنت گڈاں اے نوک اِنت ءُُ مانا دار اِنت ھمیشی ءَ را نوکی گش اِنت۔
نوں دومی جست ایش انت کہ بلئے کلاسیک پرچکہ زورگ مہ بیت ؟ اے ھم جست بائد گیشوار بہ بیت تہنا اے گشگ کہ یکیں چیزءِ بار بار ءَ گشگ ءَ چہ ھما لبز ءُُ چیز بے تام ءُُ بے مزگ بیت بلئے مردمانی بستگیں نام وَ یک اِنت آچہ وتی بستگیں نام ءَ بیزار پرچہ نہ بنت ءُُ ھروچ وتی نام ءَ مٹ ءُُ بدل پرچہ نہ کن اَنت ؟ اسل جیڑ گ چے اِنت کہ ما کلاسیک ءَ یل بہ بکن اَنت ءُُ دگہ نوکیں چیزے ءِ شوہاز ءَ دربیائیں،!؟ اگاں نا انچو کہ گزران بوھگ ءَ انت ھمے وڑ ءَ بِل کہ وھد دیم ءَ روت ۔
اسل ءَ ایشیءِ سوب ایش انت کہ مئے ھیال ءُُ سسا ساچی سنچ ھلاس بوتگ،ما دگہ نوکیں چیز ے جوڑ کنگ ءَ نہ انت بلکیں ھما کہنیں چیزانی گیگانی ءَ کنگ ءَ اِنت۔پمشکا سرپہ دیمیں کاراں گوں گلائش اَنت ،اے تہنا مئے لبزانک ءِ تہا نہ انت بلکیں درائیں لبزانک ھمے جیڑگ ءَ گوں دوچار اَنت ،من یک لس درورے پہ وتی تران ءِ گیشواری ءَ کناں کہ مروچاں ہرکس ءَ بچار تامر جوڑ کنگ ءَ گوں گلائش انت آئیءِ تامر چارگ ءُُ دوستدار گ بنت ،بلئے ھمے تامرانی تہا چنت تامر لس مہلوک ءُُ شرگداراں دوست بنت ،ایشیءَ تامر جوڑ کنوک بے زانگ انت ،مرچی تامرانی تہا نوکیں کسہ ءُُ ھیالے ھم گواہ نہ انت پمشکا تامرانی سیکول جوڑ کنگ بنت ۔ پرچہ ؟؟؟؟؟
اگاں انگریزی تامراں ما بچاراں آھم انچوش اَنت بزاں تامرانی پارٹ ون ،ٹو ،تری ،پور ءُُ باز انچیں تامر اوں است انت دہ دہ پارٹاں ھم سر انت بلئے آسر نہ بنت،ہندی تامرانی تہا اوں ھمے وبال کپتگ، آھم پارٹ ون ،ٹو، ءُُ تری تامر جوڑ کنگ ءَ انت پرچکہ نوکیں ھیالے وَ نیست پمشکا یکیں کسہ ءَ وتسر دیم تاب دئیگ ءُُ نوکیں پارٹے جوڑ کنگ بیت ،ہندوستان ءِ تہا سالے سد ءَ برز تامر جوڑ کنگ بیت بلئے ایشانی تہا ایوک ءَ یکے دو انچیں تامر بنت کہ آھانی کسہ نوک انت ءُُ نوکیں ھیال ءُُ چاڑے آئیءِ تہا گندگ بیت بلئے ایدگہ درستانی کسہانی تہا ھیال ھما یکین اِنت کہ دم پہ ساھت نبشتہ کنگ بنت نوں ایشاں ما کہن ءُُ کلاسیک نہ گوشاں بلکین ھیال ءِ کمی گشیں اِنت اے نہ گوشیں کہ اے تامر وتی کلاسیک ءَ گوں بندوک انت یاکہ ھما ریچ ءَ پیداک انت اِنا ں بلکیں اے سرجمءَ ھیال ءُُ سسا ءِ کمی انت ،پمشکا ایشانی چارگ اوں مرچاں وش نہ انت۔پدا بیا وت بلوچی ساز ءُُ زیمل ءِ دنیا ءَ کہ مرچییگیں گشندہ چو ن کنگ ءَ اَنت آھانی گور ءَ نوکیں ترز ءُُ شئیر نیست انت یاکہ آھانی ترز چہ در ملکی شئیرانی ترز اَنت یاکہ ھما ساری ءِ ترز اَنت کہ پیشی ءَ چہ گشگ بوتگ انت،شائرءُِ شئیرانی ھال ھم ھمیش اِنت ایشانی شئیرانی تہا آ تام ءُُ لزت یاکہ ھیال ءِ نوکی نیست اِنت بلکیں کہنیں بند ءُُ گال اَنت ایوک ءَ دیم ءُُ پشت کنگ بنت یاکہ انچیں لہتیں بے سریں گپاں کہ شئیر ءِ نام دئیگ ءُُ گشگ بنت ،یک وھدے بوتگ کہ شئیر پربندگ ءَ رند نوں آ گوں زیمل ءُُ ترز ءَ سینگار کنگ بوتگ بلئے مرچی پیسر ءَ یک ترز ءُُ سازے جوڑ کنگ بیت پدا ھما ترز ءُُ ساز شائر ءَ دئیگ بیت کہ ایشی ءِ سرا لبزاں جوڑین ،اگاں ھمے شئیرانی ساز ءُُ زیمل در کنگ بہ بنت داں ھشکیں بے سریں گپ پشت کپت من باز درور دات کناں بلئے ندیاں اے ھاتر ءَ کہ منا کسی نام پہ تران ءَ شات نہ بیت۔
مئے لبزانک ءِ تہا اوں انچو بوھگ ءَ انت مئے ھیال ءُُ سساساچ ھلاس بوتگ انت ماایوک ءَ ھما ساری ءِ چیزان بدل ءُُ سدل ءُُ گاجیل کنگ ءَ گلائش اِنت۔ ھمے ھال ٹیکنالوجی ءِ دنیا ءِ تہا اوں بازبراں گندگ بیت بلئے انچو نا کہ اے دگہ جاگہ آھاں کنگ بوھگءَ اِنت ،منی وتی گپ ءِ پہک کنگ ءِ ھاتر ءَ موبائل فون ءِ درور ءَ دئیگ لوٹاں کہ یک وھدے ءَ ھما کہنیں لینڈ لائن پون بوتگ انت بزان ھما کہنین فون کہ تارانی کمک ءَ کال کنگ بوتگ ،پدا ایشیءَ رند ءَ نوکیں دور ءَ ڈیجیٹل لینڈ لائن جوڑ کنگ بوتگ انت کہ آئیءِ تہا نمبر ھم درا بوتگ اَنت دگہ نوکیں چیزے وھد ءَ رند نوکیں دور ءَ سادہ موبائل جوڑ کنگ بوت کہ ایشیءِ تہا گوں وویزاں کال کنگ بوتگ اَت اے سکیں نوکیں چیزے ءَ کہ کس ءَ گمان اوں نہ کتگ رند ءَ ھمے سادہ موبائل ءَ بندات ءَ کیمرہ پر کنگ ءُُ نوک کنگ بوت رند ءَ میموری ھوار کنگ ءُُ نوک کنگ بوتت پدانوکیں دور ءَ بٹن ءِ بدل ءَ ٹچ اسکرین فون بزاں smart phon جوڑ کنگ بوت انت کہ ایشیءِ تہا سرجمیں دنیا مردم ءِ دست ءَ دئیگ بوت اے فون ءِ جوڑ کنگ دیمروئی ءُُ نوکیں دنیا ءِ مستریں چیدگ اَت بلئے ایشیءِ بنکی کار وَ بدل کنگ نہ بوتگ بزاں ’’کال کنگ‘‘۔اے وَ دیمروئی بوت بلئے ھمشی ءِ نیام ءَ لہتیں ھیالانی کنٹی ھم گندگ بیت بزاں ھمے یکیں موبائل سٹ ءِ دگہ دہ ءُُ بیست سٹ جوڑ کنگ بلئے ایشانی تہا ایوک ءَ نامانی بدلی ءَ ابید دگہ درائیں چیزانی یکے وت ھیال ءِ ھلاسی ءَ درشان کنت۔ انچو کہ نوکیا X1,X2،X35,X22 اے درائیںnokia ءِ سٹ انت بلئے ایشانی ناماں ابید دگہ درائیں کار یک اَنت،ھمے وڑ ءَ اسمارٹ فون ھم انچوش انت دراستانی کار یک انت ایوک ءَ نام بدل انت ءُُ انگت ءَ سمارٹ فوناں چہ دیم ءَ روگ نہ بوتگ،آں باز بزاں ایشانی جتائی ءِ ھاتر ءَ اے اوں نبشتہ کنگ بیت ایشیءِ تہا میموری کم اِنت ایشیءِ تہا گیش اِنت نوں اے بدلی نہ انت انوں سینگار ءِ تہا گیشی گشی گشگ نہ بیت اسل گیشی ھما ات کہ فون ءِ تہا انچیں چیزے ھوار بوتیں کہ دگہ ھچ فون ءِ تہا ھوار مہ بوتیں گڈان گیشی یے اَت ءُُ ھما نوک اَنت ۔
ھئیر اے بلاھیں درور ءَ باریں شمئے ءِ پہم ءَ منی اسل بنگپ اتک یانا، بلئے اے گشگ الم لوٹاں کہ چیز ءِ نوکی الم انت بلئے ایوکیں نامانی نوکی مہ بیت بلکیں انچیں نوکی یے بہ بیت کہ چد ءُُ ساری ءَ کس ءَ ندیستگ ۔چشیں چیز ءِ جوڑ کنگ ءَ مئے ھیال ءِ آزمان انگت ءَ سَنٹ اِنت۔
