صوبہانی تہا گورنر ءِ ھند ءُ جاہ وفاق ءِ جہگیر ئیگ انت بلے صوبہ ءِ چست ءُُ ایرءُُ سوڈگانی ڈبہ ویزیر ااعلیٰ ئیگ انت پاکستان ءِ آئین ءِ رِدا گورنر ءَ صوبہءِ جیڑھ ءُُ جنجالانی تہا دزمانجی ءِ ھچ واک ءُُ اکتیار نیست چوکہ پاکستان ءِ کماش ءُُ صدر ئیگ اِنت کہ ایوک ءَ دستخطی واک دار انت بلے سوڈگانی چپ ءُ بدل کنگ ءَ ھچ واک ءُُ اکتیارے نیست اگاں پاکستان ءِ وزیر اعظم وتی سوڈگ ءِ سمری یے پہ صدر ءَ دیم بدنت گڑا صدر ءَ بید ءِ دستخط ءَ دگہ کار ءُُ روزگار ءِ نیست ۔ ہمے ھال برطانیہ ءِ شہہ بانک ’’ queen ‘‘ ئیگ انت برطانیہ ءِ ھچ سوڈگ بید ءِ شہہ بانک ءِ دستخط ءَ نبیت بلے پہ شہہ بانک ءَ المی انت کہ ھرچی پارلمینٹ ءُُ وزیر اعظم سوڈگ کن انت آئی ءِ سرا لازمی انت کہ دستخط بکنت ۔ھمے ھال پاکستان ءِ صوبہانی توگورنرانی انت ۔
اے ردیں گپے نہ انت کہ گورنر ءِ دارگ گوں سیاسی جیڑھانی ھمگرنچی ءَ بنت بلے گورنر ءِ ھند ءُُ جاہ ءَ نندگ ءَ پد گورنرءِ ھند ءُُ جاہ شرپ ءُُ میار ہمیش اِنت کہ ھچ لسانی ،گروہی ، راجی ءُُ ھندی ٹولیانی پلہ مرزی ءَ مکنت چو کہ پنجاب ءَ وھدے محمد سرور ءَ وتا بے ریا ءُُ رو کت نکت گڑا دزکشی ءِ جار جت ۔دومی نیمگ ءَ سندھ ءِ گورنر عشرت العباد ءِ نزیکی ءُُ سیادی گوں ایم کیو ایم ءَ انت بلے عمران فاروق ءِ کوش ءِ کیس ءُُ ایم کیو ایم ءِ کماش الطاف حسین ءِ بندیاں پد آئی ءَ گوں وتی اگدہ ’’ گورنری ‘‘ ءَ ھچ وڑیں بے ریاھی نیشت بلکیں پدرا کت کہ آ ایوکا ایم کیو ایم ءِ گورنر نہ انت بلکیں دراہیں سندھ ءِ گورنر انت بلے بلوچستان ءَ اے جیڑہ چپ انت بلوچستان ءِ گورنر ءِ بابت ءَ مردمانی لیکہ اولی روچ ءَ ہمیش ات کہ آ ایوکا یک لسانی ٹولی یے ءِ جہگیر انت بلے سرپدی ایں مردمانی گمان اَت کہ آ وتارا چہ اے پولنگاں دور دارات بلے سے سال ءِ میانجی ءَ ھندی تر ءُُ تاب (گورنر تنینگہ ھچ بلوچ دمگ ءِ ترء تاب ءَ نہ شتگ ) حالاں کہ گپ و تران ءَ بازیں صوبائی سوڈگانی بابت ءَ ایوک ءَ وتی پارٹی ءُُ لسانی ٹولی ءِ نپ ءُُ سیتانی پلہ مرزی ءَ را آئی ءِ بالاد مانگیشکی (متنازعہ ) کتگ۔
افغان لڈوکیں مردم بہ بنت (گیشتر ہمائی ءِ پارٹی ءِ ووٹر انت )یا چاکر خان یونیورسٹی ءِ نام ءِ جیڑہ ببیت ۔چاکر خان یونیورسٹی برجم کنگ ءِ سوڈگ گوستگیں وزیر اعلیٰ ءِ دورءَ زورگ بوتگ ات اے درگت ءَ اگاں یک لسانی پارٹی یے ءَ شک ءُُ پکے است ات باید انت کہ آہاں صوبائی پارلمینٹ ءَ گپ تران بکت انت یا بلّے دیما بیاؤرت انت بلے اے دوئیں کارانی نہ کنگ آہانی نزوریاں پیش دارانت ءُُ گورنر ءِ بالاد (شخصیت )ءَ را مانگیشیگی جوڑ کنگ ءَ انت ۔ ھمے افغان لڈوک ءُ مردم شماری ءِ بابت ءَ گورنر ءِ ھند ءُُ جاہ پدّر نہ انت کہ آئی ءِ بے ترک و تواری آئی ءِ پارٹی ءِ پلہ مرزی ءِ سرا ایر انت ۔
دومی نیمگ ءَ بلوچ پارلیمانی پارٹیانی ایوک ءَ حالانکی تران (خباری بیان )اے پدّر کن انت کہ آ ہوں سک نزور انت یا سک مجبور کنگ بوتگ انت ۔پرچہ کہ چد ءُُ پیسرءُُ انوں صوبہ ءِ چیف ایگزیکٹیو بلوچ راج دوست (قوم پرست ) بوتگ انت اگاں آہاں مجبوری یے یا نزوری یے دیستگ ات گڑا بایدیں کہ آہاں گوں وتی کارداراں (ورکراں) پہنیام مکنتیں ءُُ مہلوک ءِ دیم ءَ بیاؤرت انت پرچہ کہ بازیں جیڑہانی چیرگ دئیگ ءُُ اندیم کنگ ( وتی نپے بوت کنت ) پہ راج ءُُ سرڈگار ءَ مزنیں تاوانے بیت کہ منافقی ءُُ بے ایمانی ءِ شوندار انت۔ھمے درگت ءَ اپس زانت کہ منی واجہ جولاھگے !
