ھوت قبیلہ نہ ایوک ءَ مکرانءِ بلکیں کلیں بلوچستان ءِ یک مستریں قبیلہ ئے ۔ایشیءِ بنزہ ءُُ کہنی ءِ شاھدی ءَ مکران ءُُ بلوچستان ءِ اے دگہ دمگاں دست کپتگیں دمباں چہ رست کنت۔اے ھما قبیلہ انت دپتر زانتاں ایشیءَ را وتی وتی دور ءُُ بارگ ءَ جتا جتا ناماں گوں نبشتہ کتگ چوکہ یوت یا یوتی،ارویتائی،زط،جاٹ یا جت ءُُ دگہ بازیں انچیں ناماں گوں راجدپتری کتاباں نبشتہی دروشم ءَ ما اے نام ءَ دیست کناں ۔چہ بندات ءَ بگر داں مرچی ءَ اے قبیلہ ءِ گیشتریں سیادی گوں مکرانءِ جاہ مننداں است بوتگ ءُُ اے قبیلہ ءَ داں بلاھیں مدتے ءَ اے ھند ءِ سرا ھاکمی کرتگ ،ھمے قبیلہ ءَ گوں اے دگہ قبیلہ آنی کمک ءَ بازیں دری ملکانی ارشکاری داشتگ انت آ تری یونانی لشکر بہ بیت ،عرب لٹ ءُُ پل بہ بنت چہ کرناں اے قبیلہ وتی ھد بندانی رکینگ ءَ پیش پیش بوتگ۔
۵۵۰ ق م ءَ وھدے ہخامنشیاں میداں چہ ھاکمی پچ گپت ءُُ مادستان ءِ نام بدل کت ءُُ نوکیں ملکے ءِ بن ھشت ایر کت کہ آئیءَ ایران یا فارس ءِ نام دات ۔اے وھد ءَ میدانی ھاکمی ءُُ اسر سک باز کم ترات،ءُُ میدانی یک بلاھیں بہرے یا وَ ایران ءِ ھوار بوت یاکہ بلوچستان ءِ اے دگہ دمگاں جاہ منند بوتاں۔ بنداتی دور ءَ ہخامنشی سردار دارا اول ءِ دور ءُُ باریگ ءَ ءُُ پدا یونانی ھاکمیءِ دور ءَ اے قبیلہ ءَ دگہ قبیلہ آنی گوما مکران ءِ ھدءُُ ابیلاں ھاکمی کت ءُُ ھما وھد ءَ کہ سکندر چہ مکران ءَ رودراتک ءَ چہ روبرکت ءَ روگ ءَ ات گڈاں اے قبیلہ ءَ میدانی گوما آئیءِ لشکر ءِ سرا ارش کت ءُُ سکندر ءِ لشکر سک باز تاوانی کت۔ ایشیءَ پد ھمے قبیلہ آنی اے ھند ءِ سرا ھاکمی بوتگ ءُُ سندھی(رائے ءُُ برہمن)آنی ارش ءُُ ھاکمی ءِ وھداں ھم مکران ءِ ھد ءُُ ابیلاں ھمیشانی ھاکمی بوتگ۔انچو کہ عرب ارشانی وھد ءَ بازیں راجدپتری کتابانی تہا ھمے دوئیں قبیلہ آنی بابت ءَ بازیں چیزے نبشتہ کنگ بوتگ۔اد ءَ چہ کہ ھما بوجیگ کہ اموی ءِ دور ءَ مکران ءِ تیاب دپ ءَ لٹ ءُُ پل کنگ بوتان عرب دپتر زانت ایشیءِ ذمہ وار مید قبائل ءَ گشنت۔ایشانی بابت ءَ راجہ داہر ءَ یک برے گشتگ کہ اے آئیءِ ھدءُُ ابیل ءَ در انت۔ھما جاہ ءَ کہ راجدپتری کتابانی تہا بلوچ ءُُ سندھ ءِ بابت ءَ بیان انت آھود ءَ ھوت ءُُ مید قبیلہ آنی بابت ءَ ھم الم نبشتہ کنگ بوتگ گوں ۔یازدھمی ءُُ دوھازدھمی کرن ءِ بندات ءَ مکرانی ءِ روبرکتی گوریچانی ھنداں بزاں کیچ ءَ ھوت قبیلہ ءِ ھاکمی ءِ مہر ءُُ مہکمیں شاھدی ءُُ گواھی دست کپیت۔ابید چہ ایشیءَ ھما مہرانکی داستان کہ آئیءِ بابت ءَ ھمک مردم زانت ءُُ سرپد انت کہ آئیءَ را ’’سسی ءُُ پنوں‘‘ نام ءَ زانت۔اے داستان ءِ بابت ءَ کلاں ساری پنجاب ءِ یک صوفی شاعرے ’’ ہاشم شاہ ‘‘ ءَ بیان کتگ ۔ہاشم شاہ ءَ وتی دراجیں کشیں لچہ ءِ تہا سسی ءَ را بھنبور بزاں سندھ ءُُ پنوں ءَ را کیچ مکران ءِ گشتگ۔ءُُ آئیءَ را کیچ ءِ ھاکم میر عالی ھوت ( ہاشم آئیءَ جام عالی ہوت نبشتہ کنت) ءِ چک گشیت۔ہاشم شاہ ءِ اے لچہ زوت اے دگہ ھلک ءُُ دمگاں نامدار بوت ءُُ ھمک مردم ءِ دپ ءَ ات۔اگاں ہاشم اے داستان ءِ وھد ءُُ باریگ ءِ بابت ءَ نبشتہ نہ کنت۔آئی ءَ رند برصغیر ءِ برزگیں صوفی شاعر شاہ عبدالطیف بھٹائی ءَ ھمے واکیا ءَ را وتی شعرانی تہا جاگہ دات ءُُ اے داستان ءَ را ابد مان کت۔شاہ عبدالطیف بھٹائی ءَ ھم میر عالی ھوت ءَ را جام ءِ پنام داتگ ات۔ایشیءِ تہا دگہ شک ءُُ اجلت ءِ ھچ گمان نیست پرچکہ سندھ ءَ چہ ازل ھاکمءُُ سردار ءِ نام ءِ دیم ءَ ’’ جام ‘‘ ءِ لبز کار بندگ بیت۔اسلامی وھد ءُُ باریگ ءَ سندھی آنی پنام ’’ جام ‘‘ بوتگ انچو کہ بلوچستان ءِ ھاکمانی پنام’’میر‘‘ بوتگ۔شاہ لطیف ءُُ ہاشم ءَ کہ عالی ھوت ءَ را جام ءِ پنام داتگ ات ایشیءِ بزانت ھمیش انت کہ آ یک سردارے بوتگ۔پنوں ،کیچ ءِ ھاکم ھالی ھو ت ءِ زھگ بوتگ بلئے ہاشم ءِ ڈول ءَ شاہ لطیف ءَ ھم اے داستان ءِ ماہ ءُُ سال لچہانی تہ ءَ بیان نہ کتگ۔ہاشم شاہ ءِ لچہ ءِ سرا شفیع عقیل ءَ پولکاری کتگ ءُُ ھمے آسر ءَ سر بوتگ کہ پنوں کیچ ءِ ھاکم ءِ زھگ بوتگ ءُُ کلاں کستریں ءُُ لاڈوکیں چک بوتگ آئیءَ ۔ابید چہ ایشیءَ سندھ ءِ پولکار پروفیسر ڈاکٹر بنی بخش ءَ ھم ھمے واکیا ءِ بابت ءَ بازیں پولکاری یے کتگ آئیءِ پولکاری اے ھاتر ءَ ھم ارزشت دار انت کہ آئی ءَ وتی پولکاریءِ تہا ماہ ءُُ سالانی بابت ءَ ھم نبشتہ کتگ،آئیءِ رد ءَ اے داستان کم ءُُ گیش دوھازدھمی کرن ءِ بوتگ۔ءُُ ھما روچ ءَ کہ سسی ءُُ پنوں بیران بنت آ ۱۱۶۷ ء بیت۔بازیں عرب راجدپتر زانتاں منگول ارشانی وھد ءُُ باریگ ءَ مکران ءِ سرا ھوت قبیلہ آنی بابت ءَ بازیں چیزے نبشتہ کرتگ ءُُ ایشاناں ہوت ،یاکہ الہوت نبشتہ کتگ ءُُ بازیں جاھاں زط یا الزط ءَ لبزھم کارمرز کتگ ءُُ اے نام بے گمان ءَ ہوت ءِ دروشم انت۔نوکیں پولکاری ءِ رد ءَ اے گپ پدر بوتگ کہ ھوت قبیلہ یک مردمے ءِ پنام نہ بوتگ بلکیں یک سرجمیں قبیلہ یے ھاس کن تیاپدپی مکران ءُُ بیلہ ءِ کہنیں مردمانی یک کٹمے بوتگ کہ یونانی دور ءَ یونانیاں ایشاں یوتی ،یااوریتائی نبشتہ کتگ ءُُ کہنیں فارسی آں ایشاناں مردانِ مکران یاکہ کوچ ءُُ بلوچ نبشتہ کتگ۔ھمیشاناں عرباں الہوت ،الہوتی،زط ،الزط ءُُ ایرانی فارسی آں ایشاناں جت ءُُ رو برکتی دپتر زانتان ایشاناں جٹ یا جاٹ ءِ نام داتگ۔ھندی مردماں ایشاناں جدگال یا جاموٹ ءِ نام داتگ۔لبز جدگال کہ براہوئی زبان ءِ گشوک ایشاں جغدال گشنت بزاں ایشی ءِ مانا جتکی زبان ءَ گپ جنوک ،ءُُ دومی لبز جاموٹ بے شک ءُُ گمان جام ہوت ءِ نام انت ءُُ ایشیءِ مانا انت ہوتانی سردار پرچکہ جام داں مرچی ءَ لسبیلہ ءِ ھندی ھاکم ءِ پنام انت۔سسی پنوں ءِ واکیا دپتر زانتانی رد ءَ دوھازدھمی کرن ءَ بوتگ وھدے اسلام عباسی آنی خلافت ءِ تہا ات ءُُ ترک بازیں اسلامی ھندانی سرا ھاکم بوتگ ات انت۔سلطنت ءِ عثمانیہ ءِ دور ءُُ باریگ ءَ ھم مکران ءِ بازیں ھند ءُُ دمگاں ہوتانی ھاکمی ات ءُُ ھمے قبیلہ ءِ باسک کلمتی(کلمتی ،بندرگاہ کلمت ءِ سو ب ءَ کلمتی گشگ بنت ءُُ انگت ءَ ایشاں کلمتی گشنت ،یونانی آں ساحلِ مکرانءِ یک بندرگاہ ئے ءَ را کلما نبشتہ کتگ۔اسل ءَ اے ھم کہنیں ہوت قبیلہ انت کہ ھند ی جاھی آنی سوب ءَ کلمتی گشگ بوتگ) ءِ اے ھندءَ ھاکم ات ۔ھمے کلمتی کہ ایشاں مکران ءِ تیابدپ چہ پرتگیزی ارشکاراں چہ رکینتگ ات۔ھمے ھون واریں جنگانی تہا مکران ءِ مزن نامیں پسگ ’’ھملِ جیئند‘‘ ءِ نام دپتری تاکانی تہا نمیران انت۔ھمل جیئندکلمتی اسل ءَ ہوت قبیلہ ءِ آ وھدءِ ھاکم بوتگ ۔ءُُ آئیءِ گوما دگہ یک نامداریں کمک کارے ’’ الن ہوت‘‘ کہ پرتگیزیاں ایشی ءَ را ’’ النوتی‘‘ ءِ نام ءَ توار کتگ۔مکران ءَ چہ رودراتکی دمگاں لڈ ءُُ بار کنگ ءِ وھداں اے قبیلہ پیسر ءَ سندھ ءَ ءُُ رند ءَ پنجاب ءِ نیمگ ءَ روان بوتاں ۔راجدپتر ءِ پولگ ءَ چہ ھمے زانگ ءَ کیت کہ ہوت قبائل ءِ بازیں باسکے چوکہ ٹالبریا تالپور،ءُُ دودائی آں سندھ ءُُ پنجاب ءَ ابید خیبر پختونخواہ ءِ بازیں ھند ءُُ دمگانی سرا ھاکمی کتگ ۔انچو کہ سندھ ءُُ پنجاب ءَ ہوت قبیلہ ءِ ھاکمیءِ شاھدی رسنت ھمے رنگ ءَ بلوچستان ءِ بازیں تہی ھندءُُ دمگاں ھم ہوتانی بازیں دمب وت ایشیءِ شاہدی ءَ بس انت کہ اے جاھاں ہوتانی ھاکمی بوتگ انچو کہ نوشکی ءِ نامداریں ریکزاری ٹُل(ٹیلہ) کہ ایشی ءَ را’’ ہوتانی ریک‘‘ گشنت۔ھمے مزن بازیں ریکزار ءِ بابت ءَ نامدار انت کہ ایشیءِ سینگ ءَ یک بلاھیں آباتی یے کل انت۔ ھمے ریکزاری ٹُل ءِ تہا بازیں جاھاں چیزے پرشتگیں دیوالے ءِ شاھدی ھم گندگ بوتگ انت۔اگاں ایشیءِ بابت ءَ کتابانی تہا ھچی نبشتہ نہ انت بلئے ھمود ءِ لس مردمانی چم دستیں کسہ اش کنگ ءَ کائینت۔ھمیشانی گشگ انت اے ریکزاری ٹُل ءِ جہل ءَ یک بلاھیں ھلکے کل انت کہ یک وھدے ءَ اے کلاتے بوتگ۔ ھمے ریکزارے ٹل ءِ بابت ءَ بلوچستان اسٹڈی سینٹر ءِ ۲۰۱۳ ءِ جرنل ءَ یک نبشتانکے ھم چھاپ بوتگ کہ ایشیءِ تہا اولی رند ءَ ھمے ریکزاری ٹُل ءِ بابت ءَ سرجمیں رنگے ءَ نبشتہ کنگ بوتگ۔ بلوچی ءِ تہا رندانی شاعری ءِ تہ ءَ ہوت قبیلہ ءَ را باز مزنیں جاہ ءُُ مکامے دئیگ بوتگ کہ یک شاعرے گشیت کہ
’’ ہوت نندیں مکران ءَ کھوسغ ما کیچ ءِ ھا
ہوت و کورائی اواراں اے ماں لاشار گھڑئنت
دریشک و ہوت ومزاری اے رند ءِ یک سرئنت‘‘
ھمے ھزاراں شعرانی تہا بلوچانی ھمے قبیلہءِ بابتءَ راجدپتری تاکاں دست کپیت۔ھوت قبیلہ کہ نوکیں دور ءَ مکران ءُُ بیلہ ءَ ابید سندھ ءُُ پنجاب،ءُُ ہندوستان ءِ بازیں شہراں آبات انت۔ہوت ءُُ میدانی اگاں چہ مکران ءِ تہا بلاھیں دورے ءَ ھاکمی بوتگ بلئے راجی دپتری تاکاں ایشانی سیاسی وڑءُُ پیمانی بابت ءَ ھچی دست نہ کپیت۔ بلئے دپتر زانت ایشانی جنگجوئی ءُُ بیرگریءِ بابت ءَ جوانی ءَ بیان کناں ۔ ھاس کن عرب دور ءَ اے قبیلہ آنی بابت ءَ بازیں چیزے نبشتہ کنگ بوتگ۔عرب ارشانی بندات ءَ بگر داں بلوچستا ن ءِ قبضہ کنگ ءَ چہ ہوت ءُُ میدانی بابت ءَ الم چیزے نہ چیزے ایشاں نبشتہ کتگ۔تاریخ خلیفہ،فتوح البلدان،ءُُ دگہ انچیں راجدپتری کتابانی تہا مکران ءُُ بلوچستان ءِ تہا ہوت ءُُ عربانی نیام ءَ بازیں ھون گواریں جنگانی بابت ءَ ھم جوانی ءَ نبشتہ کنگ بوتگ۔ ھمے میان ءَ گوں میداں ایشانی جنگانی بابت ءَ ھم بازیں چیزے دئیگ بوتگ گوں۔ہوت قبیلہ ءِ بابت ءَ اے ہم زانگی انت کہ اے قبیلہ یک کہن ءُُ زورآوریں قومے ءَ زانگ بوتگ۔ اگاں چہ اے قبیلہ ءِ بن ءُُ بنزہ ءِ بابت ءَ تنی وھداں جوانیں پولکاری نہ بوتگ۔بلئے اے کسانین نبشتانک ءِ تہا کمو باز اے قبیلہ ءِ دپتر ءِ بابت ءَ سرپد ی ءِ جہد کنگ بوتگ کہ اے قبیلہ مکران ءُُ لسبیلہ ءِ کہن ءُُ کدیمیں مردم بوتگ انت کہ دنیا ءِ اولی دپتر نویس ہیروڈوٹس ءَ یوتی ،میکوئی ،میکرونی ءُُ رودراتکی ایتھوپیائی نبشتہ کنگ بوتگ۔وھدیکہ ایرانیان ایشاں اوریتائی نبشتہ کتگ۔اے قبیلہ سندھ ءُُ پنجاب ءَ بگر داں ہندوستان ءِ بازیں جاھاں آبات انت بلئے ھما ملک ءَ کہ اے جاہ مہ نند انت ھما ملک ءِ زبان ءَ گپ جنت۔پنجاب ءَ ہوتانی بازیں ھاندانانی لڈ ءُُ بار ءِ بابت ءَ ھمود ءِ نامداریں دپترزانتانی کتابانی تہا جوانی ءَ گوں نبشتہ کنگ بوتگ ءُُ داں مرچی ءَ چہ لکھانی ھساب ءَ بلوچ پنجاب ءَ آبات انت ۔ انچو کہ جاھے ءَ تاریخ ءِ فرشتہ ءِ ندکار نبشتہ کنت کہ
’’رجانک،:۔
’’ھمے روچاں کہ ملک سہراب کہ سمعیٰل خان ءُُ فتح خان ءِ پت ات۔وتی اسل قوم ( بزاں ہوت) ءِ ھمرائی ءَ کچ(بزاں کیچ) ءُُ مکران ءَ چہ لڈ ءُُ بار کنان حسین شاہ لنگاہءِ کش ءُُ کرا جاہ منند بوتاں ۔حسین لنگاہ ءَ ایشانی گوں دل ءَ وش آتک کت ءُُ وتی کلات کرروسے چہ دھنکوٹ ءَ درستیںھند ایشاناں بکشات۔ایشیءَ پد بازیں بلوچے ملتان ءَ اتک ءُُ اے وڑ ءَ حسین لنگاہ ءِ لشکر ءِ تہا اوں گیشی اتک۔پمشکا آئیءَ بلوچانی کمک ءَ سند ھ ءِ بازیں ھندے گپت ءُُ مکران ءِ بلوچاناں گپت ءُُ دات ۔اے وڑ ءَ میزان میزان ءَ سنیت پور ءَ چہ دھنکوٹ ءِ درائیں ھد ءُُ ابیل بلوچانی دست گیر ی ءَ اتک انت۔‘‘
تاریخ و تمدن ‘‘ نامیں کتابے ءِ نبشتہ کار اخلاق احمد قادری ھم وتی کتاب ءَ انچش نبشتہ کنت ۔میر چاکر کان رند ءُُ سہراب خان دودائی ءِ نیا م ءَ جنگ ءِ بابت ءَ ندکار نبشتہ کنت کہ محمود شاہ لنگاہ ءِ وھد ءُُ باریگ ءَ یک نامداریں سردارے چہ سبی بلوچستان ءَ چہ ملتان ءَ کیت ۔اے نامداریں سردار میر چاکر ات ، سبی ءِ سردارءُُ بلوچانی ھاکم ات ۔ھمائی ءَ بلوچانی تہا یکوئی ءُُ تپاکی آرگ ءِ تہا مستریں دست ءُُ تہی ھوار ات۔ بلوچی زبان ءُُ لبزانک ءِ تہا میر چاکر رند ءِ بابت ءَ بے کچ ءُُ کساس نبشتہ کنگ بوتگ ءُُ ھمائی ءِ نام ءَ بازیں شعر نبشتہ کنگ بوتگ انت۔ھمے نیام ءَ رند ءُُ لاشارییانی نیام ءَ سی سالی جنگ ھم بوتگ ات ،ھمے میان ءَ گمان بیست ءُُ پنچ جنگ کنگ بوتگ ات اے تک ءَ لاشاری آنی کماشی میر گہرام لاشاری ءِ دستاں بوتگ ات۔ھمے جنگاں پانزدہ براں رنداں ءُُ دہ براں لاشاری سوب مند بوتگ انت ،اے جنگ ءِ سرد بوھگ ءَ پد میر چاکر ءَ وتی کتگیں جنگ ءُُ اے ھون واریں زمین ءَ چہ اژم اتک ءُُ آ چہ ھلک ءَ لڈ ءُُ باری بوتءُُ دیم پہ پنجاب ءَ یک نوکیں آباتی یے جوڑ کنگ ۔کلاں ساری آ ’’اُچ‘‘ نامیں ھندے ءَ سر بوت،ءُُ آئیءَ بخاری ءُُ گیلانی سادات وڑیں بزرگانی زیارت ءَ شت ءُُ مخدوم سید عبدلقادرثانی ءِ گوما گند ءُُ نند کت ۔اُچ ءِ ھنداں آ وھد ءَ جام ابراہیم ءِ ھاکمی ات ۔گوں میر چاکر ءَ آئیءِ جوانیں سیادی یے است ات۔ میرچاکر رند ءَ وتی لشکر ھمائی ءِ باھوٹ کت ءُُ وتی ھردو چک میر اللہ داد ءُُ میر شہداد ءِ ھمرائی ءَ ملتان ءَ شت۔ھمود ءَ آئیءَ محمود شاہ لنگاہ ءَ دست بندی کت کہ اگاں آ میرچاکر ءَ وتی کمانداری ءَ بدار ایت گڈاں آ ملتان ءِ ریاست ءَ داں دہلی ءِ ھد ءُُ ابیل ءَ سر کنت ءُُ پیشدار ایت((اِد من گوں ندکارءِ گپاں کمو ناتپاکی درشان کناں پرچکہ میر چاکر یک سردارے ءُُ پدا بلوچ سردارے است بوتگ آ بوت کنت حسین لنگاہ ءِ دربار ءَ شتگ بلئے آئیءَ ھچبر حسین لنگاہ ءِ دیم ءَ آئیءِ کمانداریءِ دست بندی نہ کتگ پرچکہ میرچاکر انچیں یک بلوچے بوتگ کہ کسی دیمءَ وتی دستے ٹال نہ کتگ ایشیءِ مستریں شاھدی بلوچی ھہدی شاعری ءُُ سی سالی جنگ ءَ چہ زانگ دنت اگاں چاکر انچیں سستیں مردمے بوتیں داں آئیءَ جنگ نہ کت ءُُ دومی ایش کہ چاکر انچائیں مردمے نہ بوتگ بلکیں یک ھاکم ءُُ سردارے بوتگ نوں پہمگی ھبر ایش انت کہ یک سردارے پہ کمانداری ءَ چوں دومی دیمءَ دست شہاری کنت)) بلئے سلطان محمود ءِ وزیر ملک سہراب( ہوت بلوچ) ءَ وتی جند ءِ گم ات پمشکا آئیءَ سلطان ءِ دیم ءَ میر چاکر ءِ گوستگیں ھونی ایں جنگانی کسہ کتا ءُُ گستگ کہ آ مردم کہ وتی جند ءِ براتاں گوں جنگ ءَ سی ہزار مردم کشت کنت آ ھچبرمئے وپادار بوت نہ کنت۔ھمے گپانی پدءَ سلطان ءَ میرچاکر ءَ را گشت کہ ’’ تو وت برو دہلی ءِ سرا ارش بہ کن ۔‘‘
ایشیءَ پد لہتیں وھداں پد ھمے قبیلہ ءِ لہتیں بہر ءُُ تہراں سندھ ءُُ پنجاب ءِ تہا وت ھاکمی کت انچو تالپور ءُُ دودائی ہوت۔
آسر تران:
پمشکا بے شک ءُُ گمان گشگ بوت کنت کہ ہوت اسل ءَ ھما بلوچانی ھما قبیلہ انت کہ آئیءَ را یونانی دپتر زانتاں اوریتائی ءُُ یوتی نبشتہ کتگ،عرباں ایشیءَ وتی گالوار ءَ زط ءُُ الزط ءِ لبزاں گوں توار کتگ۔دومی ’’جاموٹ‘‘ اسل ءَ ’’جام ہوت ‘‘ءِ ردیں گال انت کہ سندھی آں وتی ھند ءِ ھاکمانی ھاتر ءَ کامرز کتگ۔چوکہ ہوت قبیلہ ءِ ھاکم مکرانی بوتگ انت پمشکا سندھی دپترزانتاں ایشاں لس زبان ءَ ’’ جام ہوت ‘‘ گشتگ ءُُ ھمے گال ردی واری ءَ چہ ’’جاموٹ‘‘ جوڑ بوتگ۔ پمشکا اے راستی ءَ گشگ بیت کنت کہ جاٹ یاجاموٹ قبائل اسل ءَ بلوچستان ءِ کہنیں قبیلہ ہوت ءِ گوما بندوک انت ءُُ ایشیءِ بہر تہر دنیا ءِ اے دگہ بازیں ملکاں ھم است انت۔ہوت قبیلہ ءِ راجدپتری بنزہ ءِ شوھازی ءَ انگت ءَ پولکاری پکار انت ءُُ مکران گوں کلیں بلوچستان ءَ ایشیءِ دپتر ارزشت دارایت پرچکہ ایشیءِ دپتر ءَ چہ نہ ایوکءَ مکران،بلوچستان ءِ اے دگہ قبیلہ ءُُ سندھ و پنجاب ءَ بگر داں اے دگہ بازیں ھندانی دپتر ھم زاھر بوت کنت۔ھمے دپتر اے ھند ءُُ ملک ءِ راستیں دپتر زانگ بیت۔چہ ایشیءَ بازیں دپتر ردی ھم دور بوت کن انت اگاں ایشیءِ دپتر جوانی ءَ پولگ بہ بیت۔
******
