اے آرداد ءِ ’’ کماراں بہ بئے‘‘ کتاب فرانس ءِ مزن نامیں شاعر چارلس فیرے بودلئیر ءِ شاعری ءُُ زند ءِ سرا نبشتگیں رجانک انت ،کتاب ءِ پیش لبزءَ اے آر داد نبشتہ کنت’’ من اے لچہ گوں رجانکاری ءِ ازم ءِ منت ءَ رجانک نہ کرتگ انت بلکیں گوں اشک ءِ تکنیک ءَ کرتگ ءُُ اشک ءِ تکینک یکے نہ بیت ۔چارلس بودلئیر ءِ لچہ اردو ءِ تہ ءَ بازیں کسے ءَ ترینتگ انت بلئے من اے پترءِ تہا لیئق بابری کہ آئی ءَ چارلس بودلئیر ءِ لچہ ءُُ زند ھال ’’ پیرس کاکرب‘‘مجلس ترقی ادب لاہور ءِ نیمگ ءَ چاپ ءُُ شنگ کتگ ، کمک ءَ زرتگ بلکیں زند ھال ءُُ ’’ درملکی‘پیرزال ءِ پرشتہ دلی،کچکءُُ انترءِ شیشگ چہ ھمائی ءِ کتاب ءَ چہ زرتگ ترینتگ ،’’سپر آسر ‘‘چہ شپ خون الہ آباد ءِ تاک ءَ ترینتگ ’’ کماراں بہ بئے‘‘ جلیل ہاشمی ءَ چہ زرتگ ءُُ ترینتگ اے دگہ لچہاں چہ گیشتر ھما اَنت کہ مظہر مہدی ءَ ماں اردو ءَ ترینتگ ءُُ چندیں ھما انت کہ حادی محمد حسن ءَ ماں اردو ءَ ترینتگ اَنت‘‘
اے گپاں پدر بیت کہ واجہ اے آرداد ءَ پہ اے کتاب ءَ مزنیں جکانسری یے کشتگ اے آرداد ساچینک ءَ ھوار رجانک ءِ تک ءَ ھم بلوچی لبزانک ءَ مزنیں نامے ،بازیں مزنیں نام ءُُ کتاب آئی ءَ ماں بلوچی ءَ ترینتگ اَنت ءُُ بلوچی لبزانکی مڈی ءَ را گیش کتگ اے درچ ءَ آآ ایلیٹ ءِ نبشتگیں نبشتانک بہ بنت ارستو ءِ بوتیکہ ،بازیں جوانیں کتاب اَنت کہ واجہ اے آرداد ءَ بازیں ھذمتے ءَ پد بلوچی وانوکاں بکشاتگ اَنت ’’ کماراں بہ بئے ‘‘ منی حیال ءَ واجہ اے آر داد ءِ جہدانی ھمے درچ ءِ کڑی انت ءُُ ما امیت کشیں کہ واجہ اے آرداد وتی جہداں ھمے وڑا
برجا داریت ءُُ بلوچی لبزانک ءِ مڈی ءَ ھنچو گیش کنان بیت۔
کتاب کماراں بہ بئے دو بہر ءَ انت اولی بہر ءَ بودلئیر ءِ زند ءُُ ازم ءِ سرا سے نبشتانک اِنت ءُُ دومی بہر ءَ آئی ءِ شاعری انت کہ اے آداد ءِ گشگ ءِ ردا آئی ءَ چہ اردو ءَ ترینتگ اَنت دومی بہر ءَ ۱۹ شئیر اَنت کہ رجینگ بوتگ اَنت ۔نوزداھیں شئیر جوانی ءَ رجینگ بوتگ اَں ت بلئے انگریزی ءَ بودلئیر ءِ کساس ۱۷۳ شئیر رجینگ بوتگ اَنت بلئے بلکیں اے آر داد ءَ اردو ءَ دست نہ کپتگ اَنت آئی ءَِ شائری کتاب ءِ ’’
بدی ءِ پل‘‘ انت چارلس بودلئیر ایوک ءَ شاعرے نہ بوتگ آئی ءَ ایڈیگر ایلن پو رجانک ھم کتگ ،یک وھدے ءَ یک جوانین ریزمانکارے ءُُ نگدکارے ھم بوتگ ۔جہل ءَ ماں اے آرداد ءِ جوانیں بلوچی رجانکے گوں انگریزی شئیرے ءَ پہ وانوکان دئیگانیں کہ آ بچارانت کہ بلوچی رجانک گوں اسلیں شائری ءَ چنچو دپ وارت۔
