بلوچ ہرچ کجا کہ نشتگ ءُُ آباد انت گڈا الم ءَ گژنگی ءُُ بزگی آئی ھرروچیگی گُزران اِنت ءُُ آئی ءِ بھت ءِ تالھ چو مدامی وڈا شکون اِنت باریں پرچہ۔۔۔؟
یک گپے پدر اِنت کہ بلوچ وتی ڈیھ ءِ سرا گُلام اِنت ءُُ آھاں کہ گُلام داشتگ گڈا آھانی چم پہ بلوچ لس مہلوک ءَ کور اَنت ءُُ آ ایوک ءَ اودے گواچن ءُُ مڈیاں چو ھڈّکی ایں کچک ءِ وڈا گند اَنت بس۔۔۔اے وَ پدریں حقیقتے کہ سامراج ھچ وڈا لگتمالیں راج ءِ دیمروی ءِ باروا پگر نہ کننت ءُُ آئی ھر وھد ا جہد ھمئے بیت کہ کجام وڈا یردستیں راج ءَ لگتمال بکناں ءُُ ھر پڑا پد منتگی آھانی مزنیں دیمروئی بہ بیت۔ھمئے پیم ءَ گوادر یک پدریں حقیقتے چیاکہ انیگیں وھدءَ ھرکسی دپ ءَ ایوک ءَ ھمے گپ اِنت کہ گوادر ءِ دیمروئی سرجمیں بلوچستان ءِ دیمروئی اِنت بلئے دومی نیمگا اگاں چم پچیں مردم وتی چماں شانک بدینئیت گڈا الم ءَ آھاناں گوادر ءِ بزگیں مہلوک چو البرز ءِ مِکیں کوہ ءَ گندگ ءَ کاینت کہ پہ ترمپے آپ ءِ واستہ بیست ءُُ یکمی کرن ءَ تلوسگ ءَ انتءُُ آھانی نُک چو تلار ءَ ھشک اَنت ۔پہ درور پیش ءَ دُزیءِ کنگ پہ مہلوک ءَ نوکیں گپے نہ بوتگ بلئے وھدے ماں ھالتاک ءَ اتکگ اَت کہ گوادر ءَ چہ یک لوگے ءَ آپ دُزگ بوتگ گڈا الم ءَ مہلوک اجکہ بوت کہ آپ بے بہائیں چیزے ءُُ کسی گت ءُُ گمان ءَ نہ بوتگ کہ آپ ھم دُزی بیت بلئے چے کنئے کہ نُک ھم تر کنگی اِنت۔۔۔!
گوادرءَ ۔۔۔پرچہ چونام کشیتگ ءُُ میان اُستمانی مزنیں جیڑہ ءَ چہ یک جیڑہ ھم زانگ بیتءُُ پاکستان ءُُ چین ءِ سنگتی ءِ بُن ھشت ھم گوادر ءِ سرا ایر اِنت ۔۔۔ءُُ بے ابرمیں استان وتی باندات ءِ وش ھالی ءَ ھم گوادر ءِ تہا پٹ ءُُ لوٹ کنگ ءَ انت۔۔۔وش ھالی ۔۔۔تُنگی ۔۔۔دوجتائیں گالبند اَنت۔۔۔تُنگی مدام بلوچ ءِ پدا گوادر ءِ لس مہلوک ءِ بھت ءَ بوتگ ءُُ تُن ءِ پروشگے واست ءَ مئے گہار اں ھون ھم ریتکگ چُشکہ ازگل بہ بیت یا یاسمین۔۔۔بلئے بے ابرمیں استان نزاناں وش ھالی ءِ شوہاز ءَ کجام دگ ءَ راھی اِنت ۔۔۔اگاں ھما دگ کہ اودا ازگل ءُُ یاسمین ءِ ھون ریتکگ اَنت گڈا الم ءَ آ جاہ تنی وھدی لگُشتانک اِنت ءُُ بے ابرمیں استان ءِ واستہ سوب بے سوبی ءَ ابید ھچ نہ بیت۔وش ھالی ءُُ تُنگی چہ اَزل ءَ یکے دومی ءِ بدواہ اَنت پدا بھت ءَ بچار ھمئے دوئیں یک برے پدا ماں گوادر ءِ دگ آنی سرا دوچار کپگے نزیکی ءَ سر بوئگی اَنت۔۔۔سوب ھر وھدا تُنگیں مردمے دامن ءَ کپتگ چیاکہ بزگی ،لاچاری،واری،تنگیءُُ ایدگہ ویل ءُُ ازاب آئی مدام دیستگ انت ءُُ نوں کہ وھدے تُن ءِ پروشگ ءَ درکپتگ گڈ ا �آئیءِ دیم ءَ کس اوشتات نہ کنت چیاکہ آ باز تُرسناک ءُُ بیمناک اِنت۔
گوادر پمیشکہ ارزشت داریت کہ گوادر پورٹ پاکستان ءِ تہا سیمی مزنیں پورٹ اِنتءُُ آبنائے ہرمز(Strait of Hurmuz) ءَ چہ کساس 642 نوٹیکل کلومیتر دور اِنتءُُ آبنائے ہُرمز ءِ رودرتکی نیمگ ءَ انت کہ آبنائے ہرمز دُگنیا ءِ یک مزنیں تیلءِ کشکے کہ اودا چہ ہر روچ کساس ۱۳ ملین بیرل تیل گوازیت اِنتءُُ گوادر سے(۳) ارزشت داریں ھندانی لوٹاں پیلو کنت بزان میڈل ایسٹ (کہ دُگنیا ءِ تہا تیل ءِ سوب ءَ نام دار ءُُ ارزشت دار اِنت)،زرباری ایشیا ،سنٹرل ایشیا ءُُ روبرکتی چینءِ۔۔۔چائنہ پاکستان اکنامک کوریڈور(CPEC)ءَ چہ گوادر پورٹ سنٹرل ایشیاءِ ملکاں،زرباری ایشیا ءِ ملکاں ،گلف مُلکاں ءُُ چین ءَ ھوار ادگہ ملکاں یکے دومی ءَ گوں ھمگرنچ کنت۔گوادر پورٹ ءِ بازیں آسراتی ھم است انت چُشکہ مزنیں انبار(گودام)،آبی گراب ءِ مٹ ءُُ سٹ(Transshipment)،ٹرانسپورٹ،تیاب دپی بیپاری(Coastal Trade)،بیپاری ءُُ انڈسٹریل ءِ آسراتی پہ میان اُستمانی بیپاری ءَ ۔۔۔ھاس پہ افغانستان ،سنٹرل ایشیا،زرباری ایشیا،عمان،یو اے ای،سعودی عرب،قطر،عراق،ایران،چینءُُ دگہ بازیں ملکانی واست ءَ ۔۔۔بلئے چین ءِ چماں گوادر پمیشکہ ارزشت دارایت چیاکہ چین ءِ تہا یک چوشیں پورٹ ئے نیست کہ سرجمیں سال ءَ آئی چہ کار گرگ ءُُ کارمرز کنگ بہ بیتءُُ شنگائی پورٹ چہ چین ءِ انڈسٹریل ھند ءُُ دمگاں کساس 4500کلومیٹر دیر اِنت پمیشکہ آھاناں اودا باز وھد درکار بیت ءُُ مزنیں ھرچ ءُُ درچ ئے لگیتءُُ ایشی نسبت ءَ گوادر پورٹ چہ چین ءِ انڈسٹریل ھند ءُُ دمگاں کساس 2,500کلومیٹر دیر اِنتءُُ سرجمیں سال ءَ گوادر پورٹ ءَ چہ کار گرگ ھم بیت چیاکہ ایشی آپ گرم اِنت ءُُ نہ بَد یت۔کاشغر چہ چین ءِ رودرکتی تیاب ءَ کساس 3,500کلومیٹر دیر انت ءُُ کاشغر چہ گوادر ءَ 1,500کلومیٹر دیر اِنت پمیشکہ چین ءَ ھَڈک ءَ کُتگ ءُُ پدا لنگڑیں کُچکے ءَ پہ چانو زندگ داشتگ ءُُ سنگتے کُتگ بلئے پہ چانو زندگ بوئگ سک گران اِنت چیاکہ پہ چانوگ یک مردمے مُدتے ءَ داں زندگ بیت کنت پدا یک ملکے کجا وت ءَ زندگ داشت کنت۔وھدے اے کسہ ءَ گوادر ءِ مید ے گوں وتی چُک ءَ کنت گڈا الم ءَ چُک وتی پت ءَ را جُست کنت ،”ابا اینکا آسراتی کہ گوادر ءَ بیت گڈا مارا آپ ھم پہ سیرا رسیت۔” گڈا پدا پت ءِ پسو المءَ یک پُرشتگیں بچکندے بیت کہ آئی تہا کرنانی کسہ پہ ماروک ءَ پہک ءَ پدر ءُُ سہرا بنت۔
