جامعہ بلوچستان ءَ ۲۰۱۲۔۱۰۔۱ ءَ شعبہ بلوچی ءِ نیمگ ءَ چہ واجہ عبداللہ جان جمالدینی ءِ یاتگیری ءَ یک دیوانے جم دارگ بوتگ اَت ۔دیوان ءِ تہا واجہ ءِ زند ءُُ ازم ءِ بابت ءَ بلوچی زبان ءِ کواس ءُُ زانتکارانی وتی وتی ھیالانی درشانی کت ہمے دیوان ءِ تہا بلوچی زبان ءِ مزن نامیں ندکار واجہ اے آردادؔ ءَ جار چینی ءِ بہر دئیگ بوتگ اَت ءُُ دیوان ءِ پاگواجہی جامعہ بلوچستان ءِ کارمستر واجہ جاوید اقبال ءَ کتگ اَت ۔ دیوان ءِ تہا اے دگہ گشتانک دیوکانی تہا واجہ عبدالصبور بلوچ،منیر احمد بادینی ،جئیند جمالدینی ،سحال کاکڑ ،شاہ محمد مری،ڈاکٹر معصوم ءُُ واجہ جاوید اقبال ءَ وتی وتی ھیال درشان کت اَنت۔
دیوان ءِ بنداتی تران ڈاکٹر عبدالصبور ءَ کتگ اَت آئی ءَ وتی گشتانک ءِ تہا واجہ جمالدینی ءِ زند ءُُ آئیءِ کردانی بابت ءَ چمشانک داتگ اَت آئیءِ گشگ اَت کہ شعبہ بلوچی ءِ رھشون ءُُ بندات کارانی تہا یکے عبداللہ جان جمالدینی بوتگ ہمائی ءِ کرد ءُُ کتہ کاریانی سوب اِنت کہ مرچی بلوچی ڈیپارٹمنٹ است اِنت اگاں آروچی اے واجہاں وتی گامزوری مہ کتیں بگندے مرچی بلوچی ڈیپارٹمنٹ مہ بوتیں۔چو کہ دیوان ءِ درائیں گشتانک اردو زبان ءَ دئیگ بوتگ اَت انت ءُُ دومی گشتانک دئیوک واجہ کاکڑ ءَ وتی ھیال ریچی کت اَنت آئیءَ گشیتر جمالدینی ءِ زند ءِ ہما چیریں بہرانی دیم ءَ رژنائی دات کہ بلکیں لہتیں مردم چہ ایشاں بے زانگ بہ بنت آئیءِ گشگ اَت کہ واجہ عبداللہ جان جمالدینی ءَ نہ ایوک ءَ بلوچی ،اردو ءُُ انگریزی زبانان زانت ءُُ زانگ بوتگ بلکیں آئیءَ را پشتو ءُُ درسی فارسی زباناں اوں بے مٹیں زانت ءُُ زانگ بوتگ آئیءَ نہ ایوک ءَ اے زبان زانتگ اَنت بلکیں اے زباناں جوانی ءَ نبشتہ اوں کت کتگ ۔
دیوان ءِ تہا جئیند خان جمالدینی ءَ اوں وتی ھیالانی درشان کت بلئے گیشتر گوں ارساں پرچکہ واجہ عبداللہ جان جمالدینی ہمائی ءِ لوگ ءِ کماش بوتگ ءُُ ہمے زوتاں آئیءِ لوگ ءَ بیرانی یے بوتگ اَت پمشکا آئیءَ گیش گپ کت نہ کت۔آئیءَ چہ رند شاہ محمد مری ءَ چیزے انچیں چیر اندریں گپ جمالدینی ءِ بابت ءَ کت کہ چد ءُُ ساری ھچ تاک ءُُ ماھتاک ءَ چاپ نہ بوتگ اَنت ءُُ نیکے کسے ءَ اے بابت ءَ زانت آئیءِ گشگ اَت کہ جمالدینی نہ ایوک ءَ یک لبزانکی مردمے بوتگ بلکیں آئی ءِ سیاسی جہد چہ لٹ خانہ ءِ جوڑ کنوک ءُُ پہ وانوکیں سنڈے پارٹی ءِ جوڑ کنوک ءَ ابید آ یک راجی کامریڈے اوں بوتگ آئیءَ گوں ھدامرزی خیر بخش مری ءِ ہمرائی ءَ چیر اندری گوریلہ جنگ اوں وھدے ءَ کتگ ءُُ داں زند ءِ گڈی نوبتاں گوں ہمے پگر ءَ اوشتوک بوتگ ۔آئی ءَ مدام یکوئی ءُُ پتاکی ءِ گپ کتگ ءُُ وتی راج ءُُ قوم ءَ را چہ نسل ءَ در یکجائی ءِ سکین داتگ آئیءَ مدام ہزارہ ،پشتو،بلوچ،ءُُ اے دگہ قومانی یکجائی ءِ گپ کتگ اگاں آئیءِ دیم ءَ کسے ءَ یک قومے ءِ نسل ءِ ایر جنی کتگ گڈاں آئیءَ را اے ھبر سک بوتگ ءُُ آئیءَ را لانت ءُُ ملام بار کتگ ۔
گڈی گشتانک دئیوکانی تہا واجہ منیر احمد بادینی ءَ وتی ھیال ہما گداری دروشم ءَ بیان کنگ ءُُ جمالدینی ءِ نوکیں ساچے سازگ ءِ بابت ءَ تران کت آئیءَ دیوان ءِ تہا اے کول اوں کتگ کہ آ جمالدینی ءِ سرا یک گدارے پنام’’ Father‘‘ نبشتہ کنت ءُُ ایشیءِ بابت ءَ آئی یک نقشے اوں جوڑ کتگ ات ،آئی ءَ واجہ شرپ ءُُ اخلاخیات ءِ بابت ءَ اوں وتی جند ءِ دروشم ءَ بیان کتگ اَنت۔دیوان ءِ گڈی سری تران جامعہ بلوچستان ءِ کماش واجہ جاوید اقبال ءَ کتگ اَت آئیءَ جمالدینیءِ مہری تک ءُُ پہناتانی سرا تران کت ءُُ شعبہ بلوچی ءِ سوجکارانی زور دئیگ ءَ آئیءَ جامعہ بلوچستان ءِ مزن کتابجاہ بزاں لائبری عبداللہ جان جمالدینی ءِ نام ءَ کنگ ءِ جار جت آئیءِ گشتگ واجہ جمالدینی ءِ گوں زبان ءُُ لبزانک ءَ ھمگرنچی ءِ بابت ءَ ات اِنت۔
گوں جاوید اقبال ءِ تران ءَ یک روچی دیوان ءِ ھلاسی ءِ جار جنگ بوت۔
