شاہ بیک وتی بیکاری ءُُ جان بڈیاں گوں سرجمیں بازار ءِ توکا نام ءُُ دپ ات پرچا کہ شاہ بیک وانگ ءِ نیمگ ءَ محروم ات کاہ ءُُ بوچی مردمے نہ ات آئی ءِ کار مدام ھمیش اَت کہ ھرجاگے جنینانی دیوان ات تابکاری ات ہمود ءَ شت ءُُ وتا ساڑی یے کت برے چلیم یے پر کت ءُُ آورت ءُُ برے برے وت ہم تابکاری یے کت جنیناں ہرچ کارے گشت ایشی ءَ اناں نہ کت الم کارے کت برے جنینانی واستا بازار ءَ MP3 ءُُ برے چمپل ءِ گرگ ءَ شت ءُُ یا برے گدانی ٹپہ جنگ ءَ ءُُ برے بندیک ءَ گرگ ءَ آئی ءِ مدامی کار ہمیش ات وانگجاہ ءَ بچک ءُُ جنک وانگ ءَ اتنت بلئے شاہ بیک ءَ اے شوق نیست ات آئی ءَ یکروچے اوں اسکول ءِ دیم نہ دیستگ ات پرچا کہ آوت سرات آئی ءَ ھکل ءُُ ھوکل کنوک نیست ات آئی ءِ پت درملکان ات آئی ءِ مات ءُُ پیرک ءُُ دو گہار ہمد ءَ ات ۔ موسم ساھیل ءُُ ساچان ات شاری ءُُ سدوک یک تگردے کوپگ ءَ اتنت شاہ بیک اوں ہمود ءَ نشتگ ات مانجائی کنگ ءَ ات سدو ءَ شاہ بیک ءَ راگشت کہ تو وانگ ءَ وَ نہ ونت بلئے وتی پیروک ءِ پساں اوں نہ روئے پرچا کار نہ کنئے نورل ،وحید ،مرود بخش ءُُ ساکم ءُُ بچار گوں کسانیں بالاد ءَ کار کنگ ءَ انت پسنی ءَ ماھے ھپت ءُُ ھشت ھزار گرنت ءُُ وتی پچ یے نوک کننت لوگ ءِ مردم اش اوں آسودد کتگ انت سود ءُُ ہمے گپانی اشکنگ ءَ گوں گشئے شاہ بیک بے دمیں مارے ءَ دن ات ءُُ بے گویاک بوت پہ نادلکشی پاداتک ءُُ لوگ ءَ شت لوگ ءِ مردم وَ چہ پیسر ءَ بیزاری اتنت ئی ءِ ناکو پیرل ءَ پیسر ءَ آئی پت ءَ راگشتگ ات کہ تئی چک نہ وانیت نیکہ پساں روت سجھیں روچ تریت کچکانی پاداں پروشیت اے گش ءُُ پراگس انت توا یشی ءِ ویزہ ءَ کش ہمانگووتی کر ءَ برے شرترانت آئی ءَ دل ءَ جیڑات کہ اد ءَ منی ھال کچکانی ھال انت من گڈا چی ءَ اد ءَ نشتگ ءُُ زند گوازینک ءَ اوں داں سے روچ ءَ شری ءِ سرا جیڑات ئے پدا یکروچے وتی گدے زرت انت ءُُ گاڑی یے ءَ سوار بوت ءُُ ایران ءَ شے سے سال ھمانگو نشت نلوگ ءَ کلدارے دیم نہ دات ئے ایران ءَ آئی ءِ ماھے پگار پنجاہ ءُُ ششت لکھ تو من ات کہ پاکستانی یک لکھ ءُُ سی ھزار بوتنت داں سالے آئی ءَ کلینڈری کت پدا وت ڈرائیوری در برت ءُُ ڈرائیری ءِ لائسنس گپت آ پہ زر ءِ بابت ءَ ہچ پریشان نہ ات نہ لوگ ءِ مردمانی غم ءَ ات اگاں پگرے است ات ئے گڈا آبانل ءِ یات ءُُ ھیال اتنت بانل آئی ءِ دوستدار ءُُ دل ءِ ارمان ات وہد گوزان بوت لوگ ءِ مردماں ھروہد ءَ آ ٹیلفون کت کہ ترا دیر انت نوں بیا ترا سور دیاں برے گشت اش کہ بیا تئی ویزہ اتکگ بلئے شاہ بیک نیاتک چہ وتی ملک ءُُ دیار ءَ دلے چو کانچ ءَ پرشتگ ات ۔وہد ءِ پجیگ ءَ برے وہدے آ بانل ءِ یاتاں بے تاھیر کت ءُُ نہ نندگی بوت ءُُ نیکہ کاری بانل آئی ءِ دل ءِ سرا نقش ات آئی ءِ ءِ بارگیں ڈیل ،کمانیں بروان ،شیپگیں پونز،آسکی گردن ءُُ شلیں مچاچاں ،شاہ بیک شیداکتگ ات ۔
آئی ءَ چہ وتی کار ءِ مستر ءَ دہ روچ ءِ موکل گپت ءُُ لوگ ءَ اتک بازار ءِ مردم یک پہ یک آئی ءِ چارگ ءُُ گند گ ءَ اتک انت ہمے وڑا سہب بیگاہ بوت واریگ ات کہ کدی بانل آئی ءِ لوگانی دیم ءَ گوزیت بلئے آئی ءِ اے ارمان ءَ پورہ بوگی نہ ات پورہ نہ بوت آ ہیران ات کہ من سے سال ءَ پد واتر اتکگوں بلئے مرچی بانل ءَ وتی دیم پیش نہ داشت دل ءَ جیڑات ئے کہ بلکیں نوں چہ من شموشکار انت بلئے اے ھیال آئی ءِ واب ءُُ کرار شت بانل ءَ سے ماہ ات کہ سورے کتگ ات نوں شاپ بیک ءِ دل ءَ نہ روچ گوست انت نیکہ شپ پنچ روچ وتی میتگ ءَ پہ مصیبتے نشت ءُُ پدا لوگ ءِ مردمان ءَ رکست کنگ ءَ پد وتی راہ ءَ شت۔
