اے حبر بلکیں بازیں مردما ں بازیں دیوان ءُُ مردمانی دیم ءَ گشتگ ءُُ ہمک مردم چہ اے دانک ءَ سرپد انت کہ مروچیگیں نوبت پولکاری ئیگ انت ۔درائیں چیز گوں دلیل ءُُ پولکاری ءَ کنگ بنت ۔تحقیق ءُُ ریسرچ مرچیگیں دور ءِ بنکی لوٹ انت بید چہ پولکاری ءَ مرچی ہچ وڑیں کتاب ءُُ گپ راست منگ اوں نہ بیت ۔درائیں ندکارانی دپ ءَ درائیں نودربرانی درگاہاں ایوک ءَ ریسرچ ءُُ پولکاری ءِ تران انت ۔ پٹ ءُُ پول بنی آدم ءِ حون ءَ ھواریں چیزے من گشت کن اَنت بنی آدم داں استی ءَ اتکگ ہما اِنت پٹ ءُُ پول کنگ ءَ انت آ دمانے اوں بے پول نہ بوتگ بزاں دائم ہمے پولکاری ءِ چک ءُُ پدان انت۔اے ہبر اوں راستے کہ مروچیگیں دور ءَ اگاں پولکاری ءَ بید گپے جنگ بہ بیت آئیءِ سرا باز کم مردم بیسہ کنت ۔بلئے منی جست ایش اِنت کہ آیا بید چہ پولکاری ءَ آ دگہ درائیں گپ ءُُ حبر بے مانا ءُُ بکواس اَنت؟؟؟؟؟
پولکاریءِ ارزشت ءُُ بستار وتی جاہ ءَ بلئے دگہ یک چیزے کہ آئیءِ نام اِنت ساچشت آئی ءَ گوں پولکاری ءَ ہچ سیادی نیست مروچی آئیءِ سرا اوں اوشت جنگ بوتگ نیست چشیں ندکارے کہ وتی ساچشت ءَ بید چہ پولکاری ءِ پولنگ ءَ دیم ءَ تئیل د ات بہ کنت ابید چہ فکشن ءِ پڑا۔ بلئے فکشن ءَ ابید اے دگہ نبشتہی ساچشتانی تہا پولکاری ءِ وڑ ءُُ پیم ھوار مہ بنت گڈا آ اوں زورگ نہ بنت۔ ۔بزاں یک ندکارے اگاں وتی ساچشت ءِ تہا نبشتہ بہ کنت کہ دنیا ءِ دیم چو موسم ءِ ڈول ءَ بدل بوحان اِنت‘‘ ۔اے گپ ہما وھد ءَ چہ راست منگ نہ بیت داں وھدے تو دہ ءُُ بیست کتابانی تہا ہمے گپ ءَ شوہاز نہ کن ات ءُُ آھانی گپاں یک کتار نہ کن اِت شوہاز کاری ءُُ پولکاری ءَ مرچی ایوک ءَ مادگرمردمانی کتاباں چہ وتی گپ ءِ پدری سرپد بوتگ اَنت بزاں اے گپ کہ من جتگ ہمے گپ فلاں واجہ ءَ وتی کتاب ءَ چو نبشتہ کتگ ،یاکہ فلان ندکار ءِ کتاب ءَ اے گپ است ءُُ موجود اِنت ۔مئے ریسرچ ایوک ءَ ہمے حد ءُُ ابیلاں سر بوتگ ،دگہ ہچی نیست ایشی تہا۔
اے نہ اِنت کہ پولکاری ردیں چیزے ءُُ بہہ کنگ مہ بیت بلکیں پولکاری اوں بہ بیت بلئے ہمانوکیں چیزانی کہ بہہ کس ءَ ندیستگ ءُُ نہ اشکتگ ،اے نہ اِنت کہ استیں چیزانی ءِ دم پہ ساعت مچ کنگ کہ ریسرچ ءِ مانا ہمیش اِنت کہ استیں چیز ءِ دوبر شوہاز کنگ اِناں منی دلءَ اے مانا ءَ ما انگت ءَ رد وانگ ءَ انت ۔ حئیر من دگہ نیمگے شتاں اے نبشتانک پولکاری ءِ زورگ ءِ بابت ءَ نہ انت بلکیں اے راستیں ءُُ سکیں ارزشت داریں بنگپے ءِ بابت ءَ اِنت دریگتے اے حبر منی ڈولیں نابودے ءِ بدلہ ءَ دگہ جوانتریں ندکارے ءَ نبشتہ کتیں شر ات بلئے نیستی ءَ شمبو گہہ اِنت ۔
نوکیں دور ءِ لوٹ ءُُ واحگ انچو کہ پیسر ءَ گشگ بوتگ ات کہ پولکاری اِنت بلئے پولکاری ءَ مرچی مارا انچو گنوک کتگ کہ پولکاری ءَ چہ آ دیم ما وتی ساچشت ءُُ اندری مارشت سرجم ءَ وئیل کتگ اَنت پمشکا مئے ادب ءِ تہا ’ ’ آگہی سے آگے‘‘ ڈولیں بے دروریں کتاب نبشتہ کنگ نہ بیت اے کتاب ءِ تہا زندگی ءُُ زندگانی بابت ءَ چاگرد ،دود، جنگ ءُُ اندری مارشت ءُُ اے دگہ بازیں چیزانی بابت ءَ وتی حیالانی درشانی بوتگ یک سرشونے اوں ھوار نہ اِنت بلئے مئے لبزانک ءِ تہا اندری مارشت ایوک ءَ فکشن ءُُ کسہی لبزانک ءِ تہا یاکہ شاعری ءِ تہا درشان بنت پمشکا مئے لبزانک ءَ انگت ءَ دیمروئی نہ کتگ ۔ اگاں چہ پولکاری وَ بوھگ ءَ اِنت بازیں کتابے اوں پولکاری ءِ چاپ ءُُ شنگ بوتگ اَنت بلئے سوبمندی چنچو بوتگ زبان ءُُ لبزانک ءَ را اے اوںیک جستے؟ بائد اے جست دیم ءَ آرگ بہ بیت ۔ مارا اے اوں چارگی اِنت کہ آیا ما انچیں پولکاری کنگ اَنت کہ زبان ءُُ لبزانک ءِ تہا گیشی بیئت یاکہ ایوک ءَ تاکانی سیاہ کنگ اِنت ءُُ دومی مردمانی سرشون زورگ ءُُ کتابے سرجم کنگ اِنت ۔ اگاں چہ اے حبر تورناک اِنت بلے راست اِنت چنت چشیں پولکاری بوتگ کہ چد ءُُ پیش آ تک ءَ کس ءَ تران نہ کتگ مئے لبزانک ءَ ( بزاں بلوچی لبزانک ءِ تہا) نیم ءَ چہ برز ’’ زند ءُُ ازم ‘ ‘ ءِ بابت ءَ پولکار کنگ بوتگ۔ اگاں شائری ءِ سرا پولکاری بوھگ ءَ انت گڈاں بنگپ مئے اے ڈول انت کہ فلان شائر ءُُ نوکی ،فلان شائر ءُُ ساختیات ابید چہ ایشیءَ اگاں نثری یا ردانکی پولکاری بیت گڈا بنگپ نوکیں ردانک ءُُ کہیں ردانک ءَ پرک ،نوکیں آزمانکی تب پدا حیرانگی گپ ایش انت کہ لس روچاں ہما ندکار ءِ نبشتگیں چیزاں گوں تپاک دارگ نہ بیت چار مردم ءِ تہا آ مردم ڈوبارگ ءُُ آئی ءِ کتاب عیب دئیگ بیت بلئے پولکاری ءِ وھد ءَ درائیں مواد ءُُ سرشون ہما مردم ءِ کتاب ءَ زورگ بنت چشیں دو نمبریں کار ءَ چہ جوان اِنت کہ مردم پولکاری ءِ بدل ءَ ساچشتے کارے بہ کنت چیریشیءَ لبزانک ءُُ وانکاں نوکیں چیزے وانگ ءَ وَ دست کپیت۔لہتیں روچ پیسر منا واجہ اے آرداد صاحب ءَ تین دن کی زندگی نامیں کسانیں گدارے دات گدار ءِ کسہ ایش اَت کہ یک ماسٹرے گوں وتی یک نودربرے ءَ چون ءُُ چتور یک گارے ءِ تہا چہ یونان ءَ ارسطو ءُُ افلاطون ءِ دور ءُُ نوبت ءَ سر بیت داں سے روچ ءَ ہماہانی دنیا ءَ بنت ءُُ ہما ہانی لیکہانی سرا گپ ءُُ حبر بیت ۔اگاں چہ ارسطو ءُُ افلاطون ءِ سرا مرچی ہزارں کتاب نبشتہ کنگ بوتگ بلئے ساچشتی حساب ءَ اے مردءَ آئیءَ را گدار ءِ دروشم ءَ دیم ءَ آورتگ کہ نوکیں چیزے کہ آئیءِ وانگ وانوک ءَ تاحیر دنت ۔
نوں مئے لبزانک ءِ تہا نیکہ چشیں پگر ءُُ سسا ءِ پداں گدار نبشتہ کنگ بیت نیکہ ساچشتی اے دگہ انچیں چیزے کہ مارا جیڑگ ءَ لاچار بہ کنت ءُُ پگر کنگ ءِ وڑ ءُُ پیم ءَ را بہ سترنیت ۔ما وتی لس زندگیءِ تہا چنچو جنجالانی آماچ انت لوگی جیڑگاں بگر داں مالی جیڑگ،دزگہاری جیڑگاں بگر داں یار ءُُ دوستانی جیڑگاں بگر بیا زمانگ ءِ جیڑگاں اے درائیں جیڑگانی سرا کسے پولکاری بہ کنت گڈاں پولکاری ،پولکاری انت ،اگاں یکے اے جست ءَ بہ کنت کہ ادبی مردمے ءَ را گوں چاگردی جیڑگاں چے کار ،بلئے آئیءَ را زانگ لوٹیت کہ ادب اوں چمے چاگرد ءَ چہ نبشتہ کنگ بیت ءُُ چشیں ہزاراں ادبی مڈی است انت کہ آہانی بنزہ چاگردی جیڑگ اَنت ۔اے یک حیالے کہ ایشیءِ سرا اوں جیڑگ بائد بہ بیت۔
