دوشی شپ ءِ نیّت بد اَت
گوں ملکموت ءَ گپ گپ اَت
زانتگ تہاری ھون بیت
اے شپ گوزیت ءُُ چون بیت
وپتاں درائیں ورنائیں چم
کس ءَ نہ بوتگ گیگ ءُُ گوْم
لہتیں گوں واباں گار اِت اَنت
لہتیں گوں گپ ءُُ تران اِت اَنت
ناگہاں اے تیراں توار کت
دروشم چو ھور ءَ ھار کت
بمب تراک بوت چو گرندے ءَ
یکے سر ءُُ دو رندے اَت
چنچو نزاناں گوں کپت
چنچو نزاناں ٹپی اَت
کس ءَ نہ بوت سد کسگی
ہرکس وتی اَت انشپی
تیرانی شل اوں برجم اَت
ھونانی کورے جہندم اَت
اے رتگیں ھون کئی اِت اَنت
یک براتے ءِ یک چکے ءِ
یک ماتءِ تاسُپیں بچے ءِ
یک نوک بوتگیں اباّ ئے
یک سورکرتگیں زھگے ءِ
یک دوستے ءِ دو سنگت ءِ
اے ریتگیں ھون کئی اِت اَنت
جونانی امبارے جم اَت
ھونانی کورے شم شم اَت
ششت ءَ چہ گیش بیران بوت
درائیں دمگ ھیران بوت
اے کہریں درویران بوت
ذات آدمی دلگران بوت
اے کوش تہنا کوشے اَت
گوں بود ءُُ سد ءُُ ہوشے اَت
کئے کئے نزاناں گون بوت
کئے کئے نزاناں چون بوت
ہمراہاں ہمراہ داتاں یل
وت تراک کت جیگ ءَ را تل
نوں ملکموت ءَ کرتگ گل
جونانی امبار بوتگ پَّل
کسہ نہ بیت گوں من بیان
کس کت نہ کنتیں گپ ءُُ تران
است بیت دائم لامکان
اللہ تئی نام ءُُ نشان
