نودان یک کسانیں میتگے ءَ نشتگ اَت آئی ءَ را وانگ ءِ باز ھب ءُُ واھگ است اَت آئی دہ جماعت ونتگ اَت ءُُ دیم ءَ وانگ ءِ بازیں مول ءُُ مراد اس دل ءَ داشتگ اَت آئی ءَ بلوچی ءِ گرم ءَ مزنیں مہرے ھست اَت آئی ءَ را مدام بلوچی زبان ءِ مزن مزنیں ادیب ءُُ شائرانی وانگی بگل ءَ اَت انت آئی ءَ را بلوچی گدار ءُُ شائری کتابانی گوم ءَ انچیں مہرے است اَت انچیں مہرمے مات ءَ گوں وتی چک ءَ بہ بیت ۔بلئے بدبکتی اش اِت نودان یک انچیں میتگے ءِ کسانیں ورنائے ات کہ ھودا سی پیک دگ گوزگ ءَ ات آئی ءَ را مدام ہمے سکین دئیگ بوتگ اَت کہ تئی میتگ ءَ دیمروئی دئیگ بیت ۔۔۔بلئے ہچ۔
نودان ءِ پت یک ڈاکٹرے ات آ یک باز جوانیں ءُُ انسان دوستیں مردے اَت آئی ءَ گوں وتی راج ءَ باز مہر است اَ ت نودان ءِ پت ءُُ بازیں نیزگاریں مردمانی مدام مپت ءَ علاج کتگ اَت ۔آئی ءِ مستریں دوستی گوں وتی راج ءَ اَت آئی گوں وتی ادب ءُُ لبزانک ءَ ھب ءُُ واھگ است اَت نودان ءِ پت مدام چہ سہب ءَ مہل ءَ پاد اتک ءُُ وتی ڈیوٹی شت داں شپ ءِ ساھت ءَ پدا واتر بوت ۔۔۔۔
یکے روچے ڈاکٹر گوں وتی لہتیں سنگتاں بازار ءَ روگ ءَ بیت کہ نیم راہ ءَ لہتیں ناشناشیں سلاہ بندیں مردم آئی ءَ را آوار جن اَنت گوں وت بر انت ۔۔۔نودان وتی پت ءِ یکیں بچک اَت آئی وتی پت ءِ شوہاز ءَ ھمک روچ واجہ ءُُ میرانی لوگ ءِ دپ ءَ شت بلئے آئی را ھچ وڑیں سکیں ءُُ دلبڈی نہ رست نودان ءَ بازیں پریس کلبانی دپ ءَ ننداک جت ءُُ زرشانی کرت تربت شال کراچی ءَ ننداک جت ءُُ روانک کش اِت بلئے آئی ءِ پت ءِ ھچ گواہ ءُُ سوج نہ بوت ۔
ہمے وڑ ءَ نودان ءِ وانگ باز اثر مند بوت پرچہ کہ آئی ءِ لوگ ءِ ذمہ داری سرا اَت ءُُ پت ءِ یکیں بچک اَت۔۔۔۔۔ نودان ءَ بازیں جہدے کرت بلئے پت ءِ ہچ ھال ءُُ احوال نہ بوت آئی ءَ وت وانگ وائیل کت پت ءِ شوھاز ءَ در پہ در بوت ۔یک روچے اناگتہ آئی ءِ سر ءَ فون ئے اتک کہ آئی ءِ پت ءِ ٹپ ءُُ ٹوریں لاش دست کپتگ ہمے دمان ءَ آئی سر ءَ گشئے آزمان کپت نودان ءِ رژنائیں باندات کوراسی ءِ نیمگ ءَ جنزان بوت ۔
نودان ءَ پت ءِ جدائی ءِ گم سگ اِت نہ کت گڈا آئی ءِ ھب ءُُ واھگ بوت کہ وتی پت ءِ بیر ءَ بگراں آئی ءِ لوگ مدام ناشناسیں مردم اتک اَنت آئی ءِ پت ءِ بارو ءَ جست ءُُ پد کرت آئی ءِ گس ءَ شریں سامان گوں وت ءَ برت اَنت گس آس مانداشت ۔نودان ءِ پت ءِ سر ءَ ہمے بہتام جنگ بوت کہ آئی ءِ پت ءَ مدام آجوئی لوٹوکیں گلانی کمک کرتگ ءُُ آھانی علاج کرتگ پمشکا آ کشگ بوتگ نودان ءَ دگے راہ نیست اَت آئی ءَ وتی گڈی پیسلہ کت ءُُ پدا دیم پہ کوھاں شت ءُُ سلاہ بندیں مردماں ھمراہ بوت ۔آئی ءِ لوگ ءَ انگت ءَ ناشناشیں مردم اتک اَنت ءُُ آئی ءِ پٹ ءُُ لوٹ اش کت بلئے نودان نوں یاگی بوتگ اَت ۔
