بنیادم گونگیں ملکموت بلوچ پُسگانی ھوان واری ءَ سک ھیلاک اَنت۔شیہک، مات ءِ یکیں چُک اَت ۔ وھدے کہ آئیءِ ھند ءُُ دمگ ءِ جاور سک نگیگ بوت انت گڈا آئی مات ءِ چماں واب ھرام اَت۔آئی مات ءِ ھر وھد ءَ جہد ھمیش اَت کہ چک ءَ وتی ڈنی ملکے ءَ راہ بدیاں بلئے نہ دسترسی چونیں چیزے۔۔۔؟
شیہک ٹِلی لیب ءِ باز جوانیں کھلاڑی یے اَت ءُُ آئی سنگتاں آئی نام آسکلوک ایر کتگ اَت۔یکروچے آ تچانءَ اتک ءُُ وتی مات ءَ را گُشتئے کہ اماپولیس ءَ نوکری اتکگاں ما وتی کاگداں جمع کناں تو چے گشئے۔۔۔؟مات چہ گَل ءَ چے گُشت کنت۔۔۔آئی وتی دست بُرز ءَ کُت انت اللہ پاک ءِ شُکر گِپت۔۔۔تچگ ءِ ٹیسٹ ءَ آ اولی نمبر ءَ اتک ءُُ اے دگہ ٹیسٹا ں ھم سوب مند بوت۔۔۔شش ماہ ءِ ٹریننگ ھم سر جم کُت ءُُ مات ءَ آئی ءِ واست ءَ دشتارے ھم چمے چیر ءَ کتگ اَت کہ منی بچ چہ شال ءَ کہ انچو لوگ ءَ سر بیت آرا اے وشیں ھال ءَ پہ ھلوت دیاں۔۔۔مات ءِ چم انگت راہ ءَ انت کہ منی شیہُک کیت۔
بلئے بی بی مریم ءَ کئے سرپد کُت کنت کہ شیہک ءِ زُرتگیں ٹیکی انگت ءَ پولیس ٹریننگ کالج ءِ ھاسٹل ءَ پہ شیہک ءِ دست ءَ وداریگ انت کہ آرا بنیادم رنگیں ملکموت ءَ وتی ھرجان جت۔۔۔شیہک ءِ ٹلی ءِ لیب جاہ اھدی ڈنُک ئے چہرگ ءَ جنْگ ءَ ات ۔۔۔آئی مات ءِ ودار ءِ گُٹگیریں نوبت ءُُ آئی ھُڈسکگ ءُُ ھاک شانی ءِ کسہ لبزاں گوں ھم دپ کنگ نہ بنت۔۔۔بلئے یک پیرزالے ءَ آئی ماتءِ سرا دست ایر کُت ءُُ گُشت کہ ’’ماتی مارا ھر کجا کُش انت۔۔۔؟ !
