میرانیں استادنورخان بزنجو

|

وقتِ اشاعت :   November 6 – 2016

بلوچی ساز ءُُ زیمرءِ عہد ءُُ باریگ سک کہن ءُُ گیدی اِنت کہ ایشیءِ سر شاہ ءُُ بُنزہ انگت پولگ لوٹ اَنت ۔بلوچ قوم ءَ را ساز ءُُ زیمر داں ازل دوست بوتگ ءُُ است اِنت ۔ ساز ءُُ زیمری دنیاءَ بلوچی زبان ءَ پہ وت ءَ چندے انچیں وش گش ءُُ ،وش الہانیں سازند ہ پیداک کتگ کہ بید چہ آھانی ازم ءِ توسیپ ءَ بلوچی زیمری پہنات ءَ گپ کنگ نہ بیت ۔اشرفِ درّا ءَ بگر داں فیض ءُُ جاڈوک ،مرید بلیدھی،نورل محمد نورل،سبزل سامگی،شفیع ،ستار ءُُ ہمے لڑ ءِ تہا یک نوک ورنائیں گشندہ یے کہ زند ءَ آئیءَ را پیری نسیب نہ کت آ اِنت واجہ نورخان بزنجو۔ نورخان بلوچ ساز ءُُ زیمل ءِ دنیا ءَ ہما چندے ناماں شمار بیت کہ دائم است ءُُ نمیران اِنت۔ واجہ ءَ وتی زند ءَ انچیں نوار کیسٹے دروشم ءَ قوم ءُُ راج ءِ دیم ءَ درشانتگ اَنت کہ روچ مرچی آھانی مٹ ءُُ بدل دست نہ کپیت ۔واجہ نورخان وتی وش الہانی ءَ وَ چار کنڈ ءَ نامدار اَت بلئے بازیں مردم بلکیں چہ اے چیز ءَ بے زانت بہ بنت کہ نورخان بزنجو یک گشندہ یے ءِ ہمرائی ءَ یک جوانیں شائرے اوں بوتگ آئیءَ بلوچی ءُُ اردو ہر دو زباناں شائری ءَ کتگ ءُُ باز جوانیں شائری کتگ ۔آئیءِ نبشتانک،آزمانک ،رجانک وَ تاک ءُُ ماھتاکاں ہمائی ءِ زند ءَ چاپ ءُُ شنگ بوتگ اَنت بلئے شائرے دپتر واجہ ءِ بیرانی ءَ رند چاپ ءُُ شنگ کنگ بوتگ اَنت ۔آئیءِ شائری اوں آئیءِ گشندہ یے ءِ ڈول ءَ بے در ور اِنت ہمے سوب اِنت کہ آئیءِ شئیرانی گچین کہ پہ گشگ زرتگ اَنت آ بے مٹ بوتگ انت ۔اے ہمائی ءِ شائری کمال ءِ سوب بوتگ کہ آئیءَ شر ءَ چہ شرتریں شائرانی شئیر الہان کتگ اَنت ۔ واجہ ءِ اردو ءُُ بلوچی ہردو کتاب چاپ ءُُ شنگ بوتگ اَنت اردو شائری دیوان ءِ نام’’ قاتلِ دریا‘‘ اِنت ءُُ بلوچی کتاب ءِ نام ’’ بام رنگیں صدف‘‘ انت ہر دو کتاب ۲۰۱۱ ءَ چاپ بوتگ اَنت ۔ زورگ نہ بیت تہنا مہرانی بار گوں من تو ہم وفا ءِ شارءِ لمب ءَ بدار گوں من نورخان بزنجو ءِ شائری ءِ بابت ءَ بلوچی ءِ زبان ءِ سرتاجیں شائر واجہ مبارک قاضی ؔ گشیت کہ ’’نورخان یک عام پہمیں شاعرے ءُُ من اے گشگ ءَ چک ءُُ پد نہ باں کہ آ چہ منی جند ءَ سک باز اثر مند بوتگ من آئی ءِ ہر غزلے کہ ونتگ منا ہمے گمان گوستگ کہ من وتا وانگایاں ۔اے منی ءُُ نورخان ءِ فکری ءُُ زہنی نزیکی ءِ مستریں درور اِنت شاعرانی اے کٹم ءَ کہ نورخان ءَ ردوم زرتگ من تہنا دونام پہ درور دات باں یکے واجہ منیر مومن ،دومی میر عمر میر بلکیں من بہ گشتیں زبیر مختار گڑا چہ انصاف ءَ زیادہ نزور تر اَت چیا کہ من زبیر مختار ءَ چہ میر عمر میر ءَ مستریں شاعرے سرپد باں ءُُ ہمے درچ ءَ من نورخان ءَ چہ زبیر مختار ءَ کمیں برز ترلیکاں‘‘۔ مبارک قاضی ؔ ءِ اے گپانی تہا یک چیزے الم پدر بیت کہ آئیءَ را نورخان بزنجو ءِ شائری جوانی ءَ وانتگ ءُُ اے آئیءِ گوں نورخان ءَ مہری گپ نہ اَنت بلکیں راستی ءَ انچش اِنت کہ پرچکہ اولی رند ءَ من کہ اے کتاب وانت داں گمان بوتگ کہ شئیر قاضی ئیگ اَنت ایوک ءَ کہربا بند ءَ نام نورخان ءِ آرگ بوتگ چوکہ تو زپتیں زہیراں گوں ایرجیگ بہ کن مارا بیا واہگ ءُُ مہرانی بندیگ بہ کن مارا یاکہ درد پنڈوکیں فقیراناں صدایے گون اِنت مہوشاں چوکہ شپ ءِ نیم ءَ ادایے گون اِنت نورخان برنجو ءِ شائری سرجم ءَ لس پہمیں شائری یے بلئے چہ شئیری ریس ءُُ پریساں جوانی ءَ سرپد بوتگ آئیءَ زاتگ کہ شائری چون کنگ بیت ءُُ شائری ءِ نازرکی چے چے اَنت ۔چوکہ آئیءَ گیشتر دستونک گشتگ ءُُ دستونک گیشتر مہر ءُُ وفائی ءِ بنگپاں نبشتہ کنگ بوتگ اَنت ءُُ شئیرانی تام انچو کہ واجہ ءَ مبارک قاضی ءَ گشتگ اَت کہ’’ قاضی ءِ رنگ ءَ جنت ءُُ پہکی ءَ انچش اِنت ۔ گیشتر یں شئیر کسانیں بحرءُُ وزناں گوں نبشتہ کنگ بوتگ اَنت دراج بُریں شئیر باز کم گندگ ءَ کیت اے درچ ءَ اے گالاں دلگوش کن ات۔ جیگ ءَ درد ءِ لاس وفا زند ءِ چاریں پاس وفا دل چمانی راز ءَ زانت ارس ءِ پُریں تاس وفا یاکہ راز ءِ رازاں راز بہ زانت کم بہ زانت کہ باز بہ زانت نورخان ءِ بزنجو ءِ شئیری دپتر وانگ کرزاِیت پرچکہ آئیءِ شائری اگاں چہ نوکیں شئیری دوداں چہ نہ آشنا گندگ ءَ کیت بلئے ہما وھد ءِ ھساب ءَ اگاں چارگ بہ بنت داں سما بیت کہ نورخان وتی عہد ءِ نامیگیں شائرانی اگاں برزی سرپ ءَ نئیت داں جہلی سرپ ءَ اوں ایر کنگ نہ بیت ۔آئیءِ دپتر ءِ تہا نہ ایوک ءَ دستونک بلکیں چاربند،ہائیکو ءُُ گڈی ءَ چندے اردو شئیر اوں ھوار کنگ بوتگ ۔واجہ ءِ ہائیکوآہانی چندے شئیر دئیگ لوٹاں کہ آئیءَ را شئیری تہرانی چنچو زانت بوتگ کہ چتوریں تہر چون نبشتہ کنگ بیت پہ درور میتگ میتگ ہون در د ءِ زمانگ ،آہ ءِ سال اِنت دیدگ دیدگ ہون یاکہ جمبر ساچان بنت وہدے شنگنت مسکیں مہپر مہلب درشان بنت واجہ ءِ چندے اردو شئیرانی نمونگ اوں دئیگ بیت دانکہ زانگ بہ بیت آئیءَ انچیں کہ بلوچی شئیر گشتگ ہمے رنگ ءَ آئیءِ اردو شائری اوں بے مٹ اِنت چوکہ اس کی زلفوں میں جب نمی ہوگی آنسوؤں کی بہت کمی ہوگی یاکہ تَن تن سے جدا مَن من سے جدا یاں ہر گھر ہے آنگن سے جدا یاکہ لذتِ غم سے آشنا ہوں میں پہلے کیا تھا اور اب کے کیا ہوں میں ہوں تری بزم کا دِیا شاید اَشک پی کر بجھا بجھا ہوں میں نورخان بزنجو ءِ شائری ءِ سرا گیشں ھبر یک شرگدارے بہ کنت داں گہتر ءُُ شرتر اِنت اے نبشتانک ءِ مستریں مول ءُُ مراد ایوک ءَ اے سرپدی اَت کہ نورخان ءَ وتی سرجمیں ازم پہ قوم ءُُ راج ءَ ندر کتگ اَت نوں بائد اِنت راج ءُُ قوم آئیءِ ازم ءِ پہازی ءَ کنت ءُُ وتی ہمے چندے ازمگرانی آ کہ رپتگ اَنت آہانی یاتگیری یے بدار ایت ءُُ آ کہ است اَنت آھانی دلبڈی ءَ بہ کنت۔ مئے زندگیں ارمان ءِ کس جست ءَ نہ کنت چون اِنت مئے عمر شتگ گار اِنت ارواہ پُلگ بوتگ بیا روچ شپ ءَ لیٹین مئے غم جتیں پاسانی نوں واب کجا کیت اِنت سرجاہ پُلگ بوتگ