وھدیکہ یک چاگردے نگیگیں جاوراں گوں دُچار بیت گڈا پہ جاورانی دیمپان ءِ ھاترا دگہ پیمیں ٹہشت سہرا بنت۔بدلی آروک پُرشت ءُُ پُروشیں ٹہشت ءِ واتر گوں نوکیں رنگے ءَ جوڈکنگ ءِ جہد کن انت ءُُ پدا آرا کارآمد جوڈ کن اَنت۔دومی نیمگ ءَ آشوبی ءُُ بدلی آروک کُہنیں ادارہان ءَ سرجم ءَ ولگوج کنگ لوٹ انتءُُ آھانی جاہ ءَ نوکیں ادارہ ٹاہین اَنت کہ آھانی بُن ھشت ھمایانی نظریہ ءِ سرا بیت۔
چاگرد ءُُ آئی جیڑہانی اگاہی ءِ بُنگیج ءَ پد شہزانت،سساساچءُُ کواس چاگرد ءِ ٹہشت ءِ بدل کنگ ءِ ھاترا وتی پگر ءُُ سسّا ءَ دیم ءَ کار اَنت۔شہزانتانی کِرد چین ءِ راجدپتر ءِ تہا ھما وھدا ارزشت دار ءُُ سوبین بوت وھدیکہ اودے چاگرد سیاسی ،راجمانیءُُ مالی جیڑہ آں گوں دُچار بوتگ اَت۔
نامداریں شہزانت کہ آئی پہ جیڑہانی گِرودار کنگ ءُُ چاگردءِ بدل کنگ ءِ ھاترا آشوبی پگر ءُُ زانت دیم ءَ آؤرتءُُ آ کنفیوشس ءَ اَت کہ آ 551BCءَ گوریچانی چین ءِ ھند لُو(Lu)ءَ ودی بوتگ اَت۔آئی وتی وانگ ءِ سرجم کنگ ءَ پد پہ روزگارءِ شوہازءَ نزیک ءُُ گوارے دُراہیں شہراں شُتءُُ ھمئے وھدا آئی چہ واک دارانی سوب ءَ وتی پگر ءُُ زانت رِواج دیگ لوٹ اِت۔بلئے بدبہتی ءَ آ نوکری ءِ گِرگ ءَ بے سوب بوت ءُُ لوگ ءَ دلپروشی ءَ گوں واتر بوت۔
کمو وھدا پد وھدے کہ آیک سوجکارے (Teacher)ءِ بوت آئی وتی نودربرانی دلگوش وتی نیمگ ءَ کُت ءُُ آئی نودربراں اے نوکیں شہزانتی ءِ ہیل کنگ ءَ باز واھگ داشتگ اَت۔آئی یک وانگجاہے پچ کُت کہ مردم گُشت کنت کہ اے یک نوکیں آشوبے ءَ اَت چیاکہ اے وھدا چین ءَ اے پیمیں وانگجاہ ھچ نیست اَت۔آ وھدا وانگ ءُُ زانگ ایوک ءَ بادشاہ آنی چُکانی واست ءَ اَت بلئے کنفیوشس ءِ وانگجاہ ءِ دروازگ پہ بزگر، مالدارءُُ ھر تبکائے چُکانی واست ءَ پچ اَتءُُ اے چیز آئی راجمانی برابری ءِ ستک ءَ پیش داریت۔آئی یک انچیں تعلیمی نصابے دیم ءَ آؤرت کہ آئی تہا شائری،راجدپترزانتی،سیاسیات،سازءُُ زیملءُُ لیب ءُُ گوازی ھوار اِت انتءُُ ایشانی ھوار کنگ ءِ مول ءُُ مراد ایش اَت کہ پہ سرجمیں چاگرد ءِ واست ءَ وانندہیں ،سساساچیں ءُُ زِرنگیں مردم ءِ جوڈ کنگ۔
کنفیوشسؔ چو سقراطؔ ءِ پیم ءَ ھچ چیز نبشتہ نہ کتگ اَت بلکیں زُبانی وتی زانت داں نودربراں سَر کُتگ اَت۔پدا آئی نودربراں آئی گُشتن کتابی دروشم ءَ یکجاہ کت انت ءُُ آ کتاب ءِ نام انالِکس(Annalex)ایر کُت اِش۔ھمئے کتاب ءِ تہا ما کنفیوشسؔ ءِ شہزانتی ءُُ نظریہ ءَ ونت کُت کنیں کہ آ ھما زانتکاریں بیوروکریٹس آنی جوڈ کنگئے سرا زور دنت کہ آ وش تب ءُُ وش روح بہ بنت۔آئی را ستک اَت کہ سرکاری مردمانی واست ءَ سئے(۳)وڈیں سِپت لازمی اِنت بزان کہ وش دل،وش تبءُُ مہروان بہ بنت۔
آئی لوٹ اِت کہ سرکاری مردم آنی گیچین کاری میرٹ ءُُ زانتکاری ءِ سرا بہ بیتءُُ ناکہ بوتنی ھق ءِ سرا چیاکہ بوتنی ھق پدا گوں بادشاہی کُٹم ءَ سیادی داریت۔دیمترا آئی گُشت کہ سرکاری مردمان ءَ اینکس تاگت ءُُ ھمت بہ بیت کہ قانود اڈکت بہ کن انت ءُُ وتی ڈیوٹی ءَ بُرزی وکدارانی تُرس ءَ ابید جوانیں وڈے ءَ بہ داینت۔ھما مردم کہ بیوروکریسی ءُُ سول سروسءِ چکاس ءَ دیگ بنت گڈا آھانی سرا المی انت کہ کنفیوشسؔ ءِ پگر ءُُ زانتاں بوان انت ءُُ یات بہ کن انت ءُُ اے آھانی نصاب ءِ بہرے ھم بہ بیت۔
کنفیوشس ءَ پیر ءُُ مرشدی چاگرد ءِ بَرجم دارگ ءِ سرا زور داتءُُ گُشت کہ یک کُٹمے ءِ تہا چُک وتی مات ءُُ پت ءِ منوگِر بہ بنت ءُُ پیری ءَ آھانی ھیال ءَ بدار اَنت۔اے ھما وھد اَت کہ پہ پیریں مردمانی واست ءَ راجمانی رکینگ ءِ ھچ وڈءُُ پیم نیست اَت۔کنفیوشسؔ ءِ اے ھیال ءِ رِد ءَ مہلوک ءَ وتی پیریں پت ،مات،پیرک ءُُ بَلوکانی ھیال دارگ گوں وشدلی ءَ بندات کُتگ اَت۔
کنفیوشس ءَ کُٹمی جاور دیم ءَ آؤرت انت کہ گوست ءِ گوں انوگیں وھدے کُٹمی ارزشت ءَ پدر کنگ ءَ اِت انت۔آئی لوٹ اِت کہ مہلوک وتی مسترینانی ءُُ ھاکم آنی منوگِر بہ بیت۔سوبمندیں چینی واکداریں بادشاہ آں وتی روب ءِ برجم دارگ ءُُ راجمانی ءُُ سیاسی جیڑہانی گیش ءُُ گیواری ءِ واست ءَ کنفیوشس ءِ شہزانتی گیچین کُتگ اَت۔
