بلوچی بہرگ گوستگیں چار ءُُ پنچ سال اِنت کہ وتی ندکار ءُُ لبزانتاں عہد بستگی داد دیان ءُُ پیداک اِنت ۔اے عہد بستگی داد ءِ بنگیج کار واجہ عبدالصبور بلوچ ءِ کماشی ءَ اولی براں ۲۰۱۲ ءَ بندات بوتگ ءُُ مرچی ءَ داں پنچ ءُُ شش کواس ءُُ زانتکاراناں عہد بستگی داد دئیگ بوتگ ہمیشانی تہا واجہ منیر احمد بادینی ،عبداللہ جان جمالدینی ، ظفر علی ظفر،بیگ محمد بیگل ءُُ نوں بلوچی زبان ءِ لبزانک ءُُ کواس ،شرگدارءُُ گدار نویس ،شاعر ءُُ پولکار واجہ غنی پرواز ءَ دئیگ بوتگ۔ دیوان ءِ بنگیج گوں قرآنی آیات ءَ کنگ بوتگ اَت ءُُ دیوان ءِ جار چین واجہ زاہد دشتی ءِ کوپگاں دئیگ بوتگ ۔ہمے دیوان ءِ تہا بلوچی لبزانک ءِ نامداریں ندکار ءُُ سوجکاراں وتی وتی گشتانک دات اَنت ہمیشانی تہا واجہ عبدلصبور بلوچ،رحیم بخش مہر ،اے آرداد،بانک نسرین گل ،کریم بریالے، ءُُ پرواز صاحب ءِ زھگ ڈاکٹر سمی پرواز ءُُ محسن بالاچ ءَ اوں وتی ھیال ءُُ مارشت پہ وتی کماش ءُُ بلوچی زبان ءِ لبزانکار ءَ درشان کت اَنت ۔دیوان ءِ بندات چہ بلوچی بہرگ ءِ کارمستر واجہ حامدعلی بلوچ ءِ وش آتکی تران ءَ چہ بوتگ اَت واجہ ءَ وتی تران ءِ تہا بلوچی بہر گ ءِ کار گشادی ءُُ واجہ پرواز صاحب ءِ منت زرتاں ۔ آئی ءَ رند بانک نسرین ءَ پرواز صاحب ءِ زندھال ءِ سرا وتی گشتانک وانت ءُُ دیوان سرجم ءَ بندات کتگ۔ہمے دیوان ءَ جامعہ بلوچستان ءِ وائس چانسلر واجہ جاوید اقبال اوں ساڑی اَت ءُُ دیوان ءِ پاگواجہی ءَ کنگ ءَ اَت دیوان ءَ نودربرانی یک جوانین کچ ءُُ کساسے ساڑی کہ وت پہ اے شاہدی ءَ بس اَت کہ بلوچی لبزانک ءِ وانوک ءُُ دربروکانی ھچ کمی نیست اِنت دیوان ءِ تہا مردینانی ہمرائی ءَ زالبولانی اوں یک جوانین کچ ءُُ کساسے نندوک اَت ۔دیوان ءِ تہا واجہ محسن بالاچ ءُُ ڈاکٹر سمی پرواز کہ واجہ غنی پرواز ءِ پسگ انت آھاں وتی ھیالانی درشانی گوں جزبگاں کت ءُُ محسن ءَ چو آزمانکی تہر ءَ وتی گشتانک دات۔ واجہ عبدالصبور بلوچ ءَ وتی گشتانک ءِ تہا بازیں انچیں تک ءُُ پہناتانی بابت ءَ تران کتگ اَت کہ چد ءُُ پیش لبزانکی دنیا ءَ سہر نہ بوتگ اَنت بزاں آئی ءَ پرواز صاحب ءِ زند ھال ءُُ لبزانک ءَ گوں ہمگرنچی ءِ لہتیں پہناتانی سرا تران کت۔واجہ رحیم بخش مہر ءَ واجہ پرواز ءِ شاعری ءُُ بلوچی شاعری ءَ واجہ ءِ تجربت ءُُ تکنیکانی سرا جوانیں چمشانکے دات ءُُ دیوان سرپد کت ۔دیوان ءِ دلگوش اے آرداد ءَ وتی نیمگ ءَ ترائینت وھدے آئیءَ وتی گشتانک ءِ یک نوکیں رنگے بزاں یک نمدی یے پنام ’’ جاور ترسناک اَنت ‘‘ وانت گشتانک ءِ دئیگی ءِ اے یک نوکیں دروشمے اَت کہ کم دیواناں گندگ بیت ۔دیوان ءِ گڈی تران واجہ پرواز ءَ دات آئی ءَ وتی گشتانک ءِ تہا وتی ھیال ءُُ لیکہانی ہمرائی ءَ بلوچی زبان ءِ استیں جاورانی سرا اوں تران کت ءُُ گشت کہ آدائم عالمی مارشتانی پد ءَ نبشتہ کنت ءُُ آئیءِ درائیں نبشتانک ،شاعری ،شرگداری درست پہ عالمی ھساب ءَ اَنت۔
چشیں عہد بستگی داد بائد دائم ایر کنگ بہ بنت ءُُ وتی لبزانک ءِ سروک ءُُ ندکار ہمے رنگ ءَ دلبڈی دئیگ بہ بنت چرے عہد بستگی داد ءَ نہ ایوک ءَ ہما ندکار ءَ دلبڈی ریست بلکیں آوکیں وھد ءَ نوک باھندیں ندکاراں اوں سکینے رسیت کہ بلوچی لبزانک ءِ وانوک ءُُ بلوچی زبان زندگ ءُُ زندگ پرست اِنت دانکہ ،بلوچانی نام ءِ پشت ءَ ’’ مردگ پرست ‘‘ ءِ شیگان ءُُ ٹاکور پہ مدامی ھلاس بہ بیت۔
چشیں عہد بستگی داد بائد دائم ایر کنگ بہ بنت ءُُ وتی لبزانک ءِ سروک ءُُ ندکار ہمے رنگ ءَ دلبڈی دئیگ بہ بنت چرے عہد بستگی داد ءَ نہ ایوک ءَ ہما ندکار ءَ دلبڈی ریست بلکیں آوکیں وھد ءَ نوک باھندیں ندکاراں اوں سکینے رسیت کہ بلوچی لبزانک ءِ وانوک ءُُ بلوچی زبان زندگ ءُُ زندگ پرست اِنت دانکہ ،بلوچانی نام ءِ پشت ءَ ’’ مردگ پرست ‘‘ ءِ شیگان ءُُ ٹاکور پہ مدامی ھلاس بہ بیت۔
