گوستگیں ۳۵ سالاں بلوچستان ءِ سر شہر بوھگ ءَ ابید ہم کوئٹۃ یکشل ءَ ڈلگچار کنگ بوتگ ہر دور ءِ حکومتاں بلوچستان ءِ سر شہر ڈالچار کتگ پمشکہ اے شہرءَ مدام چہ بنکی آسراتیاں زبہر بوتگ چوکہ ایندگہ دمگانی شہر کراچی ،پشاور ،لاہور، ءُُ اسلام آباد دیمروئی ءِ نیمگ ءَ برتگ انت ۔راجکارانی حکومتاں اے شہر ءَ را بنکی آسراتیاں دئیگ ءِ بدل ءَ مدام وتی راجکاری کارندہاں راجکاری بندر ءَ کار ءُُ روزگار داتگ ءُُ شہرءِ دگ ءُُ کشکانی جوڑ کنگ ءَ ہچ دلگوش نہ کتگ ۔بیورکرسیی ءِ جہت ءَ گیشتریں بیوروکریٹ وتی بنداتی روزگار ءَ چہ ہمے شر ءَ بنا کن انت ءُُ پدا پہ اے کار ءَ کماک ءُُ ناز انت کہ آھاں وتی کار چہ دمگ ءِ گران تریں جاہ ءُُ ہند ءُُ بنا کتگ ۔اشانی تہا بازیں حکومت جوڑ کنگ ءُُ پروشگ ءَ ہوار بوتگ انت انوگیں وزیر اعظم ءِ پرنسپل سکیرٹری کوئٹہ ڈپٹی کمشنر بوتگ ۔اے مرد بگٹی ،رئیسانی ،قبائیلی جنگ ءِ میان ءَ بے ریا ءُُ روائیں ریفری یے ات ۔اے قبائیلی جنگ ءِ وھد ءَ اے مرد یک کرا اوشتات ءُُ تماشائی بوت آئی ءَ جنگ دارگ ءِ ہچ وڑیں توجیلے نہ کت اے بیوروکریٹاں ھچبر کوئٹہ شہر ءَ را گہتر کنگ ءِ حاترا دلگوشے نہ کت اے پہ پرے گپ ءَ کماک ات انت آ یک سکیں دمگے ءَ نوکری کنگان انت اشاں مدام اے گران ءُُ سکیں جاہ ءِ نوکری ءَ را پہ وتی دیمروئی ءَ کارمرز کتگ ۔
پدا جاور حال چدو گنتر بوت انت وھدے گچین کاری در پارٹی ءِ رد ءَ کنگ بوت انت ءُُ وزیر ءُُ اسمبلی باسکاں چہ حد ءَ گیش طاقت ءُُ زردئیگ بوت چریشی ءَ چے اے وزیر ءُُ اسمبلی ءِ باسکاں وتی دلگوش چہ مہلوک ءِ گہتری ءِ کاراں درکت۔ ہمے دور ءَ وزیراں سرکاریک نوکراناں وتی جند ءِ نوکر پہمگ بنا کت ءُُ وتی اگدہ ءُُ کرسی ایوک ءَ زر جوڑ کنگ ءِ مشین جوڑ کت انت ۔افغان جنگ ءَ پد مزنیں لڈ ءُ بار کنوکیں مردمے بلوچستان ءُُ خیبر پختونخوا ءَ آتک جاہ منند بوت انت کہ چریشی ءَ چے اے دمگانی مالی جاور چد گنتر بوت انت ۔ دوست دست ء۔ ملک حقی ایں حاکماں اے لڈ ءُُ بار کنوکیں مردماں کیمپ نہ داشت بلکیں جہد کت کہ اے دمگ ءِ بند مردماں گوں ہور ءُُ توار بہ بنت تنکہ افغان لڈ ءُُ بار کنوکیں مردم پجہ آرف مہ بیت ہمے زمانگ ءَ افغان لڈ ءُُ بار کنوکیں مردماں دمگ ءَ بازیں سرکاری نوکری گپت بازیں یونین کونسلاں کونسلر ءُُ چئیر مین بوت انت ءُُ بازیں اسمبلی ءِ باسک ،اشانی حاترا وش تریں جاہ ءُُ دوار بلوچستان ءُُ کوئٹہ ات انت پرچکہ بلوچاں دودامانی درچ ءَ اشاں مہمان ءِ نگاہ ءَ چاراِت پمشکہ کوئٹہ ءُُ بلوچستان بجٹ ءِ نیم ہمے لڈ ءُُ بار کنوکیں مردمانی سرا ہرچ بوت ۔اگاں اے لڈ ءُُ باری کیمپاں دارگ بوتیں انت مرچی کوئٹہ ءُُ بلوچستان جاور دگر ات انت ۔
چریشی ءَ پد جاورانی حراب بوھگ ءِ وھد ءَ بازیں مردمے چہ بلوچستان ءُُ سندھ بازیں دمگاں لڈ ءُُ بار کنوک آتک ءُُ کوئٹہ ءَ جاہ منند بوت انت بلئے اے مردماناں ہچبر چہ حکومت ءِ نیمگ ءَ آئی ،ڈی، پینر نام دئیگ نہ بوت ءُُ ناں پریشاں زر ءُُ بجٹے دارگ بوت پرچکہ بلوچ جیڑھ برجاہ اَت ۔کوئٹہ ایوک ءَ ۱۵ لکھ مردم ءِ حاتر ءَ جوڑ کنگ بوتگ ات وھدے کہ اے وھد ءَ کوئٹہ شہر ءِ آبادی ۲۵ لکھ ءَ گیش بوتگ پمشکا اے وھد ءَ شہر ءِ دارگ چہ ضلعی حکومت ءِ وس ءُُ واک ءَ در انت بلکیں نوں دمگی حکومت ءِ طاقت ءَ ہم ۔اے وھد ءَ شہر ءِ زلورت ۵۰ لکھ گیلن آپ انت بلئے شہر ءَ ایوک ءَ ایشیےءِ چارک دست کپگان انت ہمے حال شہر ءِ بچانی چست کنگ سلیں آپ ءِ راہ ءُُ در ءُُ ایندگہ آکوٹانی ساپ کنگ ئیگ انت پمشکہ دارئیں سال ءَ ماں کوئٹہ ءَ گٹر ءِ آپ ماں مکاں یلہ اِنت ۔چہ گٹر ءِ آپاں سول سکیرٹریٹ ءُُ سول ہسپتال ءِ دگ ہم گوزگ نہ بنت ۔حکومت اے وھد ءَ جہد ءَ انت کہ اند س ایور نظام ءِ رد ءَ آپ ءَ پمپ ءِ سرا چکگ بہ بیت ءُُ شش ہزار فٹ برز ءَ آرگ بہ بیت بے شک اے یک انسانی کارے ءُُ بوت ہم کت بلئے اے یک سکیں گرانیں ءُُ جگانسری کارے ءُُ پہ ہما شہر ءَ کہ آئی ءِ نیم درآمد انت۔
اے درائیں جیڑہانی یکیں گشواری ہمیش انت کہ بلوچستان ءِ سر شہر ءَ یک نوکیں جاہ ءُُ ہندے ءَ چو اسلام آباد ءِ وڑ ءَ شوہازگ بہ بیت ءُُ پہرے کار ءَ لینڈ مافیا چہ بندات ءَ چہ نوکیں شہر ءَ دور دارگ بہ بیت ۔لس مردماں پہ دائمی اے شہر ماڑی بندگ ءَ اجازت بیت۔ سر شہر ءِ حد ءُُ ابیلاں دور لس مہلو کءَ را جاہ منند بوھگ ءُُ جائیداد زورگ ءُُ بہا کنگ رضا بہ بیت ۔تنکہ یک گچین دردی بہرے ءِ مردماں بلوچ سر شہر ءَ سر بوھگ ءُُ کار کنگ ارزان بہ بیت گپ گیر آرگ بہ بیت اے دمگ ءِ آ کبت ءِ مالی ءُُ انڈسٹری درائیں کار چہ مکران ءَ ۳۰۰۰ کلومیڑ دراجیں تیاب ءِ بیت ایران سیتان ءُُ بلوچستان ءِ ۱۸۰۰ کلومیٹر مکران تیاب ءِ مستریں واہند انت کہ آئی ءِ تہا پر مز اوتاگ ءَ پاسا بندن ہم ہوار انت سر آتکگیں ۱۲۰۰ کلومیٹر پاکستان ءِ دست ءِ چیر ءَ انت ۔ گوادر چاہ بہا کوریڈور آوکیں روچاں دمگ ءِ مالی ءُُ اقتصادی دیمروئی ءَ مزنیں کردے دیم ءَ کارایت ملک ءِ پیش بندی کنوک بائدیں گوادر جاہ بہار کوریڈور ءِ نزیک ءَ یک سر شہرے آباد بکن انت تنکہ آ وکیں مالی جاوراں جوانیں وڑے گر ءُُ دار کت بکن انت اے درچ ءَ گوادر چاہ بہار کوریڈور زمیں بندیں ملکاں یک جوانیں راہ ءُُ درے بوت کنت پہ پہ آھانی تیل ءُُ گیس ءِ بر ءُُ آر ءَ اے وھد ءَ عالمی مالی طاقتانی نگاہاں گپ ایش انت کہ چدو پیش یونی کول ءُُ اے ڈٰ بی گوادر پورٹ ءِ دیمروئی ءَ کہند ن دارگ بوتگ انت آؤکیں دور ءِ مالی جاور حال حاکماں مجبور کن اَنت کہ آ کوئٹہ ءِ بدل ءَ پہ بلوچستان ءَ نوکیں سر شہرے ءِ شوہاز بکن انت تنکہ چہ اودا نوکیں مالی ءُُ معاشی کاروبار گر ءُُ دار بوت بکن انت ۔
اے وھد ءَ گوں حاکماں اے بوتنی گپے نہ اِنت کہ کوئٹہ شہر ءَ دیمروئی دات بکن انت گوادر ءَ وتی استیں آبادی داشت نہ کت پرچکہ اودا ورگی آپ ڈکال ات ءُُ مردم چہ گوادر ءَ درآتک ءُُ در ءَ شت انت ہمے وڑا آؤکیں روچاں کوئٹہ ءِ حال ہم ہمیش بیت کہ مردم آپ ءِ ڈکال ءَ چہ کوئٹہ وت درکپ اَنت۔
