’’ بلوچی زبان کہ دنیا ءِ یک کہنیں زبانے ءِ جہت ءَ زانگ ءُُ پجار گ بیت،‘‘اے رد چنت بر ءَ ما وتی نبشتانک ،تران ءُُ گشتانکانی تہا کارمرز کتگ ؟ ہمک کواس ءُُ زانتکارے وھدے تران ءَ بندات کنت داں آئیءِ اولی رد مدام ہمیش بیت بلئے آ وت چرے گپ ءَ چہ بے حال ءُُ شموشکار اِنت کہ پہ گشگ دنیا ءِ ھچ زبان کہن ءُُ گیدی منّگ نہ بیت۔ اے گپ گوں پہتہ ایں شاہدیاں پدر کنگ لوٹیت کہ بلوچی چون ءُُ چے وڑ ءَ دنیا ءِ کہن ءُُ گیدی ایں زبانے۔۔۔۔اے دگہ راجاں کہ وتی زبان ءُُ دودمان دنیا ءِ مستریں ءُُ کہنتریں دودمان ءُُ زبان لیکیتگ اَنت آ ہاں وتی زبان ءِ سرا کار کتگ ءُُ دنیا ءِ دیم ءَ وتی استی ءُُ دودمان ءِ انچیں رنگے تالان کتگ کہ کس ءَ دوبر آئیءِ کہنی ءُُ مستریں دودمانی ءِ سرا دست چست نہ کتگ ۔مئے زبان ءُُ لبزانک ایوک ءَ ہما انگریز پولکارانی گشگ ءِ پد ءَ اگاں کہن ءُُ گیدی اِنت گڈاں بے نہ اِنت ،اگاں چیزے کتاب کہ ما اِشکتگیں گپاں نبشتہ کتگ اَنت ءُُ ہماہانی پشدر ءَ ما اے گپ ءَ کناں کہ مئے زبان ءُُ لبزانک کہن ءُُ گیدی اِنت داں اے اوں انوگیں سائنسی دور ءَ راست منّگ نہ بیت۔بلکیں انوں ہرچی پہ پولکاری ءُُ سائنسی رہبنداں پدر کنگ ءَ رند راست منّگ بیت ۔اے تک ءَ ما کجا سر اَنت اے کسی دیم ءَ چیر نہ اِنت ۔مئے لبزانک ءِ کتہ کار ءُُ کواسانی کار ایوک ءَ یکے دومی ءِ ایر جنگ اِنت ،یکے دومی ءَ گروپ ءُُ گلانی تہا بہر کنگ اِنت ،یک مردمے ایوک ءَ پرے ھاترءَ پشت ءَ دارگ بیت کہ آ آہانی گل ءِ بہر ءُُ باسک نہ اِنت۔ نودربر چے ہئیل بارت کنت وھدے سوجکار ءُُ رہشون آئیءَ اولی سبکّ ءِ تہا گروپ ءُُ گلانی تہا بہر کن اَنت چد ءُُ پیسر ہم من انچیں نبشتانکے نبشتہ کتگ اَت ءُُ منی یک استادے ءَ من ءَ پہ پتے ءُُ چکی سوج دات کہ چشیں نبشتانک وتی نودربری نوبتاں نبشتہ مہ کن اَنت کہ پہ تئی جند ءَ شر نہ بیت بلئے ،وھدے دل سچیت گڈاں لہڑ ءُُ پاہار الم ءَ درشان بنت۔بلوچی زبان ءِ یک بہرے کہ زبان ءُُ لبزانک ءَ نوکیں دروشمے ءَ چارگ ءُُ تپاسگ ءُُ نبشتہ کنگ لوٹیت ۔گیشتر ہما روبرکتی ہند ءُُ ملکانی وڑ ءُُ پیم ءَ کہ آ چہ مئے زبان ءُُ لبزانک ءَ سداں نا بلکیں ہزاراں سال دیم ءَ انت۔ءُُ دومی بہر زبان ءُُ لبزانک ءَ چہ وتی دودمان ءُُ ربیدگاں چہ دور کنگ نہ لوٹیت ءُُ آ ہرچی کہ نبشتہ کنت کہ وتی دود مان ءُُ ربیدگ ءَ دیم ءَ کن اَنت ءُُ نبشتہ کن اَنت ۔چنائی ءَ اے دو بہرگ نہ بوتگ اَنت بلکیں دو لیکہ اَنت کہ مرچی مئے زبان ءِ کواس ءُُ زانتکاراں دو بہر ءُُ گل جوڑ کتگ اَنت ءُُ راجدپتر اے چیز ءِ شاہد اِنت کہ اے دوئیں لیکہانی منوگرہچبر وت ما وت تپاک نہ بوتگ اَنت ءُُ یکے دومی ءِ مدام ایرجنی کتگ ءُُ یک دومی ءِ ھلاپ ءَ پندل سازی کتگ بلئے مارا بائدکہ ما ہماہانی رندگیری ءَ مہ کن اَنت بلکیں ہردو لیکہانی پہمگ ءُُ سرپد بوھگ ءَ رند چریشاں پہ زبان ءُُ لبزانک ءِ دیمروئی ءَ کار بہ کن اَنت ءُُ نوکیں درور ءُُ مسالے پہ آوکیں وھد ءِ وانوکاں ایر بہ کن اَنت ۔اے قوم بزّگ ،وت لگتمال ءُُ بے وار اِنت بس ہمے زبان ءُُ لبزانکے است انت ءُُ ما ہمیشی ءِ پد ءُُ پُشتاں کپتگ اَنت۔۔۔۔اپسوز انت سد اپسوز۔۔۔۔۔۔۔یکے دگہ راستی یے اوں است اِنت کہ چریشی ءَ اوں کس بے زانت نہ اِنت بلئے چشیں بے زانتی اوں پہ زبان ءُُ لبزانک ءَ جوان نہ اِنت ۔چنت سال اِنت کہ بلوچی زبان ءُُ لبزانک ءِ تہا کتاب چاپگ بوئگ اِنت،بلئے ہما مہکمیں یا Standardءِ کہ درجگ اِنت آ مئے کتابانی تہا نیست اِنت پرچہ؟ زبان ءِ جیڑگ انچو باز اَنت کہ پہ ہساب ھلاس نہ بنت ءُُ روچ پہ روچ ایشانی تہا گیشی بوھگان اِنت ،بلئے ایشانی گِشواری ءَ چے بوھگ اَنت؟ انگت ءَ چنچو مزنیں دیوان پہ زبان ءِ ساپ ءُُ سلہّ کنگ ءَ جم دارگ بوتگ؟ سد شاباش اِنت سید ہاشمی ءِ جہداں کہ مرچی مارا نبشتہ رہبندے وَداتگے ،ءُُ آ وھدءَ یک ءُُ دو مجلس چوکہ کراچی مگسی ہاوس ءَ ءُُ دومی رند ءَ کوئٹہ ءَ ہمے جیڑگانی سرا جم دارگ بوتگ آہاں رند پہ جیڑگانی گشواری ءَ چشیں مجلس منا ہوش نہ کنت ۔گڈا چوں زبان ءِ جیڑگ گشواربنت ،چیزے ءِ سوڈگ ءَ دانکہ نند ءُُ نیاد کنگ مہ بیت آ بہہ تچک نہ بیت ءُُ ہرکس کہ وتی ہساب ءَ نبشتہ بہ کنت ءُُ ایوک ءَ ہمے گپ ءَ بجنت کہ’’ انگت ءَ مئے رہبند گشوار نہ اِنت پمشکا اے ردی بنت۔۔۔۔‘‘ گڈاں گلہّ کنگی نہ اِنت ۔
بلوچی بتلے است کہ’’ کار پہ چارگ بہہ ھلاس نہ بنت کار پہ کنگ ھلاس بنت ‘‘۔ ماایوک ءَ کاراں چار اَنت بلئے ایشانی گشواریءَ ہچی نہ کن اَنت ۔من ءَ واجہ جام محمد دشتی ( شے رگام) ءِ یک گپے مدام گیر کیت کہ ’’ مئے کار ایوک ءَ دپ چاکی اِنت‘‘ بزاں ما اِشکیں گپ جن اَنت کار ءِ باری ءَ مئے دست ءُُ ند ہردوہُشک بنت ۔ ہمے سوب اِنت کہ مئے زبان ءُُ لبزانک انچو سیر آپ بوئگ ءَ پد ہم پدمنتگ اِنت ۔اے گپ کہ اِد ءَ نبشتہ کنگ بوتگ اَنت اے گپاں زانگ ءَ وَ درست زاننت بلئے دیم پہ دیمی ءَ ہمے گپانی گشواری ءَ کس لانک نہ بندایت ۔برز ءَ من کہ گشتگ اَت کہ بلوچی لبزانک مروچی دو بہراں بہر کنگ بوتگ ءُُ نودربر اوں ہمے گلانی تہا نہ سربتکگ کتگ اَنت اگاں ہمیشانی دیوان ءَ بہ ننداں اول وَ یکے دومی ءِ ایرجنی چراہی ءَ رند آہانی واہش زبان ءُُ لبزانک ءِ دیمروئی اِنت ہردو بہرگ زبان ءِ دیمروئی ءَ چاڑکگ اَنت بلئے رہبندانی تہا پرک ءُُ جتائی است اِنت بائد اِنت ہمے دوئیں گل یکے دومی ءِ ایرجنی ءُُ نودربرانی سربتکگی ءَ بند بہ کن اَنت ءُُ وت ما ں وت وتی سوڈگ ءَ بہ کن انت ۔واجہ غنی پرواز صاحب ءِ عہد بستگی داد ءِ دیوان ءَ واجہ عبدالکریم بریالے ءَ باز وشیں ءُُ راستیں گپے جتگ اَت کہ یک وھدے بوتگ کہ مئے شرگداری مجلس ءُُ دیوان ءَ ساڑی ایں مردماں پستول گوں وت برتگ گوں ءُُ نوں جاور ایش اَنت کہ مہلوک ءَ کّلشنکوپ گون ءُُ شرگداری دیوان ءَ نشتگ اَنت‘‘۔ واجہ ءِ گپ وتی جاگہ ءَ سرجم ءَ راست اِنت کہ مئے دیوان ءُُ مجلس مرچاں ہمے تہرءَ اَنت کہ مردم پہ وشدلی کائینت بلئے پہ زد ءُُ کینگی یاکہ پہ ناکامیں دلے واتر بنت ،چُشی ءَ زبان ءُُ لبزانک کجا دیمروئی کت کنت ۔
اے درائیں گپانی نیام ءَ نودربر بزّگ اَنت کہ آ وت ءَ کجام بہرءِ باسک بہ کن اَنت اگاں اولی بہرءَ دور بہ کن اَنت داں دومی بہر نالان بیت ءُُ ہرچی کہ آئیءِ دست ءَ بوت بہ کنت پہ نودر بر ءِ تاوانی ءَ کنت،ءُُ اگاں دومی بہر ءَ دور بہ کنت داں اولی بہر ءِ باسک ءُُ کماش پہ آئیءَ پندل سازانت ءُُ آئیءَ جہل دور دئینت ۔اگاں ہمیشانی تہا یک نودربرے ہردو بہراں چیزے ہیل برگ ءِ جہدءَ ہردو بہراں بروت ءُُ بئیت داں آئیءَ را’’ چمچہ ‘‘ ءِ پنام دئیگ بیت ۔گڈاں بگش اے قوم ءُُ راج چون ءُُ چے وڑ دیمروئی کت کنت؟؟؟؟؟؟؟؟
