اے سال پہ بلوچ راج ءَ چنچو تاوان بار بوتگ اے گپ ءَ بلوچانی یک کہنیں بتلے ءُُ حمل ءِ شئیرے جوانی ءَ پدر کت کنت کہ عہد بلوچاں کہ اے روچ شوم ءُُ شانزدہ کتگ ءُُ ہما مردم کہ شوم انت آئی ءِ پشت ءَ شانزد ہ کہ گشتگ آ اشکیں گپ نہ بوتگ اَنت بلکیں ایشانی پشدرے اوں بوتگ اَنت۔ اے سال کہ سرجم ءَ شانزدہ ءِ سال اِنت گڈاں پہ بلوچاں چون ءُُ چتور وش بوت کنت؟ ۔پیسر ءَ ہما شئیر ءَ دلگوش کن اِت ءُُ رند ءَ گپ ءُُ رپ بنت۔
شمبے ءِ روچ ءُُ برج ہما شومیں اگرباں
شمبے ءِ روچ ءُُ شانزدہ اَت ماہ ءِ برقرار
گوشتگ اَت مات ءَ گوں وتی ماہیں چم خمار
شمبے ءُُ شانزدہ سرمہ شود براتانی گہار
شمبے پہ براتاں شوم انت ءُُ شانزدہ پہ پت ءَ
اے شئیر ءِ گوں بلوچ پسگاں داں اے سال ءَ گون اِنت ءُُ اے ستک کہ پیشی مردمانی بوتگ کہ شانزدہ یک بدیں روچے ءُُ اے سال کہ شانزدہ اِنت اے اوں بلوچ راج ءَ سک پال ءُُ بد بوتگ ۔ہمے سال ءِ اگاں وئیل ءُُ واکیاہانی سرا چم چاری کنگ بہ بیت داں اے گپ وت سہرا بیت کہ اے سال پہ بلوچاں چنچو نہ وش ءُُ بد بوتگ ۔بلوچ راج ءَ را انچو جانی ءُُ مالی تاوان کہ اے سال ءَ رستگ دگہ ہچ سال نہ رستگ ۔
دوشی واجہ فقیر شاد ءِ کتاب ’’میراث‘‘ منی دست ءَ اَت یک کہنیں شئیرے ءِ پٹ ءُُ لوٹ ءِ نیمون ءَ ناگہاں ہمے حمل ءِ شئیر چماں کپت ءُُ اے شئیر من سرجم ءَ دل ءِ مئیل ءَ ونت ۔ شئیر ءَ پیشی درائیں یات ءُُ ترانگ تازگ کتاں بلوچی عہدی شئیرانی وانگ ءِ یک مستریں وشی یے ہمیش اِنت کہ ایشانی وانگ ءَ رند پیشی درائیں یات چماں سہرا بنت ءُُ ہما پہکیں بلوچانی ترانک مردمانی گیر کائینت اے وھد ءِ دونمبریں بلوچانی اِناں کہ زبان ءُُ کولے اوں داشت نہ کن اَنت ءُُ مال ءُُ متائے ایوک ءَ دروگ بندگ ءُُ مردمانی رپینگ اِنت ہما پیشی بلوچانی کہ آہاں وتی کولانی پداں وتی دردانگیں دشتار بکشاتگ اَنت ،وتی کودکیں زھگ زہمانی زہان کتگ اَنت،وتی مہرانی درشانی ءُُ کولانی پیلوئی ءَ بلائیں ملکانی دژمنی زرتگ اَنت انوگیں بلوچانی تہا چشیں شرم ءُُ حیا کج اِنت؟؟؟۔ ہمے شئیر ءِ وانگ ءَ رند منا اناگت ءَ گمان بوت کہ حمل ءِ شئیر ءِ تہا ہما شوم ءُُ شانزدہ ءِ گپ بوھگ ءَ اِنت کہ پہ بلوچ راج ءَ مدام بد ءُُ پال بوتگ ۔ اے سا ل اوں شانزدہ ءِ سال اِنت ءُُ اے سال پہ بلوچ راج ءَ انچو بد ءُُ پال بوتگ کہ دگہ چشیں سال منی گیر ءَ نئیت ۔آ چیز ءَ راکہ بوھگی اِنت آئی ءَ را وَ کس داشت نہ کنت بلئے گپ اِیش اِنت اے سالانی اگاں دیم پہ دیمی یے بہ بیت داں ما گشت کن اَنت کہ اے سال ءَ بلوچاناں گیشتر نکس ءُُ تاوان داتگ ۔اگاں ہمے جانی ءُُ مالی تاوانانی یک لڑے جوڑ کنگ بہ داں گیشتر گپ پہک تر بوت کنت چشکہ
۱۔بی ایم سی نادرہ جاہ ءِ اُرش ۱۵ جون ۲۰۱۶
۲۔لس نادراہجاہ( سول ہسپتال) ءَ وکیلانی سرا تراک ۸ اگست ۲۰۱۶
۳۔پولیس ٹرینگ سینٹرءِ سرا اُرش ۲۴ اکتوبر ۲۰۱۶
۵ ۔شاہ نورانی ءِ سرا تراک ۱۲ نومبر ۲۰۱۶
۶۔گڈانی ءِ وئیل ۶ نومبر۲۰۱۶
۷۔وومن یونیورسٹی
ءُُ بلوچی لبزانک ءِ پڑ ءَ سے نامیگیں شاہذانت ءُُ کواسانی بیرانی اوں پہ بلوچاں یک مزنیں تاوانے کہ ہمے سال ءَ اے واکیا پد ما پداں بوتگ اَنت چوکہ ہمے سال ءَ بلوچی زبان ءِ ’’ماما‘‘ بزاں واجہ عبداللہ جان جمالدینی ،واجہ غوث بخش صابر،ءُُ انوں ۸ تاریخ ءَ سال ءِ گڈی روچاں تربت ءِ کواس ءُُ لبزانت کہ ہمائی ءِ برکت ءَ مرچی تربت ءَ لبزانکی چست ءُُ ایر بوھگ ءَ اَنت ہمے واجہ ءِ کتہ کاریانی سوب اِنت بزاں بلوچی زبان ءِ شاعر،گدار نویس ،کواس ءُُ لبزانت استاد شوکت حیات اوں ہمے شومیں سال ءَ بیران بوت گوں ۔یک ءُُ دو چشیں وئیل ءُُ واکیا بوتیں داں گشگ بوتگ اَنت کہ اے بوت کن اَنت بلئے پد ما پد وھدے انچیں وئیل کہ یک قومے ءِ سرا بہ کپیت داں ہما میتھ کہ بازیں مردم آئیءَ را ارزشت نہ دنت آ دروگ بنت بزاں میتھ است اَنت ءُُ ایشانی ہما ستک اِنت کہ بے سبب نہ انت ۔ بزاں بلوچانی ہما ستک کہ پہ شانزدہ ءِ شومی ءَ بندوک اِنت آ ئی ءَ را پشدر ءُُ راستی یے اِست انت ءُُ ایشی ءِ پدر ائی ءَ ہمے سال بزان ’’۲۰۱۶‘‘ ءِ گنجیں وئیل ءُُ واکیا بس اَنت۔ ءُُ ما ہمے امیت داراں کہ اے شومیں سال زوت پدی بروت ءُُ آسر بہ بیت دانکہ دگہ چشیں وئیل ءُُ واکیا ئےِ اے لگتمال ءُُ درتہ پچیں راج ءِ سرا مئیت اِنت ءُُ ہرجاہ ءُُ ہرکجا کہ بلوچے نشتگ آ وتی کش ءُُ گور ءِ مردمانی ھیال ءَ بدارایت ءُُ وت ءَ گیگ ءُُ گوم بہ کنت پرچکہ اے سال انگت ءَ آسر نہ اِنت۔۔۔۔۔۔۔!
