اے ھبر ءَ دگہ ہچ وڑیں شک ءُُ گمان نیست اِنت کہ مرچیگیں دنیا پولکاری ءِ ئیگ اِنت ۔ہما قو م ءُُ راجاں کہ وتی زبان ءُُ لبزانک ءَ پولکاری کتگ آ مرچی دنیا ءِ سوبمندیں قوماں شمار کنگ بنت ۔مرچی اگاں یورپی ملکاں ما چمشانک بدئیں داں اے گپ وت پدر بیت کہ آ ہاں وتی زبان ءَ انچو باز کار کرتگ کہ نوں پہ کنگ کار ءِ جند سر نہ یتکگ ءُُ آ ہما است ءُُ سرجمیں کارانی تہا دو بر پولکاری کنگ ءَ اَنت دانکہ ہما کار چد ءُُ شرتر بہ بنت بلئے دومی نیمگ ءَ ما وتی زبان ءُُ لبزانک ءَ بچاراں کہ جیڑہ ءُُ جنجال ءَ چکار اِنت بلئے کس ءَ را سُدے اوں پر نیست ۔اے گپ اوں وتی جاہ ءَ راست اِنت کہ دنیا ءِ ہچ زبان پہک ءُُ ذگر بوت نہ کنت بلئے داں ھدّے ءَ آ گشوار وَ کنگ بوت کنت ۔بلئے مئے زبان ءُُ لبزانک داں ھدے ءَ اوں گشوار نہ اِنت بلئے ندکاری ءِ پڑ ءَ ہرکس ءَ بچار کتاب نبشتہ کنگ ءَ چاڑکگ اِنت یک ماہے ءَ سے ءُُ چار کتاب آئیءِ بازار ءَ پہ نہاد ءَ ایر اِنت آکتاباں چے مان ءُُ چے مان نیست آ دگہ گپے ۔۔؟بلئے ہرکس ایوک ءَ ہمے پگر ءَ زندگ اِنت کہ آئیءِ کتاب چہ کلاں گیش بہ بنت بلّے توری آگپاں ہچی مان مہ بیت ۔بلئے چشیں کتابانی گیشی ءَ چے سیت ءُُ نپ کہ آ پہ زبان ءُُ لبزانک ءَ دردے وارت مہ کن اَنت چشیں ندکار بائد ایراد گرگ بہ بنت بلئے کس ایشاں گپے اوں گشت نہ کنت کسے شئیر زانت نزانت کہ شائر اِنت ،کسے آزمانک ءِ تب ءَ سرپد اِنت کہ نہ اِنت آزمانکار اِنت ،کسے پولکاری ءِ الف ءُُ ب ءَ ہم نزانت بلئے پولکار اِنت گڈاں اے پہ زبان ءُُ لبزانک ءَ تاوان باری ءَ ابید دگہ چے کت کن اَنت۔ بائد چشیں ندکار کڈن کنگ بہ بنت ۔بلئے اے گپاں ما دیوانے ءَ بلکیں بہ کناں پہ وشگپی بلئے ایشیءِ سرا سنجیدگی نیست اِنت ۔دومی نیمگ ءَ مئے اکیڈمی اَنت کہ سرکاری اوں کمکے گون اِنت بلئے انگت ءَ ھچی کت نہ کن اَنت ھُدا بزانت کہ آہانی تہہ ءُُ توکی جیڑگ چے اَنت کہ آ انگت چاڑکگ نہ اِنت، آہاں انگت ءَ وتی جیڑگانی سما نہ اِنت کہ زبان ءُُ لبزانک ءِ روچ پہ روچ جنجال گیش بوہاں اَنت ءُُ اے تیز گامیں دنیا ءَ اگاں ہمگام بوئگی اِنت داں ما را اوں تیز تیز کار کنگی اِنت بلئے نزانں کجام سوب اِنت کہ اکیڈمی کارانی گشادی سارتی ءِ آماچ اِنت ۔چنائی ءَ زبان ءُُ لبزانک ءِ جیڑگانی گشواری ءَ اکیڈمی ءَ چہ مستر ءُُ شرتریں گل دومی بوت ہم نہ کنت ۔بلوچی اکیڈمی کوئٹہ کہ بلوچستان ءِ مستریں اکیڈمی اِنت ءُُ آئیءِ سال ءِ گرانٹ اوں چہ اے دگہ بلوچ گلاں چہ گیش اِنت بلئے آئیءِ کارانی گشادی آ وڑ نہ اِنت کہ آئیءَ را بوہگی اِنت ۔اے سال ءَ وَ اکیڈمی ءِ گشادی کار نیستی ءِ ھساب ءَ بوتگ اَنت ھالانی رد ءَ اے سال ءَ بزاں (۲۰۱۶) ءَ کتاب چاپی اوں چہ اے دگہ سالانی ھساب ءَ سک باز کم بوتگ ءُُ انگت ءَ ھشتاد ءَ برز کتاب کہ سالے ءَ برز اِنت کہ اکیڈمی ءِ کارگشادنی گور ءَ ایر اَنت آہانی ہچ ھال ءُُ اھوال نیست اِنت۔اکیڈمی بائد اِنت اے تک ءَ وتی گشادی ءَ دیم ءَ بیار ایت ءُُ کتاباں زوت چاپ بہ کنت ءُُ ہما کتاب کہ لاھکِ چاپ نہ اِنت داں یک دیمگ بہ بیت ءُُ کتاباں واتر بہ کنت ءُُ چاپے مہ کنت بلئے ہمے داروکائی ءِ رہبند ءَ وئیل بہ کنت ۔پرچکہ اوشتگ مرگ اِنت۔۔۔اے تک ءَ اکیڈمی بائد اِنت وتی ہما کارگشاداں کڈن بہ کنت کہ کتاباں زوتاں چہ زوت چاپ بہ کنت ءُُ دیم ءَ بیارایت ۔
مئے مزن شاہ درجاہاں بلوچی بہرگ ءِ کارمسترانی اوں یک نزوری یے است اِنت آ ایش کہ آ ہرکس ءُُ ناکس ءَ پہ مزن وانگ بزاں ایم فل(M.phil) ءَ داخلہ دئیگ اَنت ایشانی تہا انچیں بے کاریں نودربر اوں گوں کہ آہانی تہا نہ بود مان نیکہ زانت بس دراہ کہ زورگ ءَ اَنت من بے بہر مہ بنت ہمے وڑیں نودربراَ نت ۔مرچی لہتیں نودربر من وت زاناں کہ آ نہ بنگپ زورگ زان اَنت ءُُ نیکہ کار کنگ ءِ سد ءُُ بود مان اِش آ انچیں بنگپ زورگ ءَ انت کہ کہ نہ یک جیڑگے ءِ گشواری ءَ دردے ور اَنت ءُُ نیکے نوکیں گیشی یے کار اَنت ایوک ءَ تاکانی سیاہ کنگ اِنت ۔اے ڈول ءَ ما کہ پہلیں اسکالر ءُُ وانوک اَنت آ ہانی ہکجنی بیت بائد ما نوں بود بہ کن اَنت ءُُ چشیں نودربراں سرپد بہ کن اَنت کہ یکبرے آ بوان اَنت سرپد بہ بنت نوں چشیں وانگی آں دست جنی بہ کنت ءُُ دانکہ سرپدی مہ بیت آہاں داخلہ اوں دئیگ مہ بیت بلکیں گچین نودربرانی داخلہ دئیگ ءَ نہ ایوک ءَ جوانیں کار دیم ءَ کیت بلکیں زبان ءُُ لبزانک اوں دیمروئی کت کنت ۔ اگاں نا اے ڈول ءَ ما ایوک ءَ گوں اسکالری ءِ نام ءَ وتی جند ءَ ءُُ وتی زبان ءَ رپینگ ءَ انت باندہ یکے ڈنی مردمے بئیت ءُُ مئے اسکالراں گوں تران بہ کنت داں آ مارا کلاگ بندایت ءُُ مارا شیگانی کنت گڈا شر ہمیش اَنت کہ ما چشیں مردماں بُن ءَ چہ دیم ءَ میار اَنت ۔
یکرندے من گوں یک سنگتے ءَ کہ انوں ایم فل کنگ اَنت من آئیءَ را جست کت کہ تو یک اسکالرے یے ایشی ءِ مانا ءُُ بزانت ءَ سرپدئے ؟ گشیت کہ اِناں ۔۔من گشت ہمے کہ’’ ایم فل ‘‘ ءِ لبز اِنت ایشی ءِ بزانت ءَ سرپدئے ،گشیت کہ اِناں ۔۔۔۔ من گشت گڈاں تودیم ءَ پولکاری کنئے گڈاں ایشیءِ راہ ءُُ رہبنداں پوہ ءُُ سرپدئے ؟ گشیت اِناں آئیءِ گشت کہ اِدا ایشانی ھاجت نہ اِنت بس تھیسسز(Thesis) ءَ جم کن ءُُ ڈگری ءَ بگر۔۔۔۔‘‘ آئیءِ اے گپ ءَ دیم ءَ من دگہ چے گپ کت کناں ۔انگریزی ءَ گشگ بیت کہ Leave Quantity ,keep Qualityبلئے ما بلوچاں ایشیءِ چپ زرتگ ءُُ نشتگ اَنت کہ
Leave Quality Keep Quantity نوں بگش اے قوم چتور سوبمند بوت کنت اے بلکیں تورناک بہ بنت بلئے راست اَنت اپسوز بیت کہ مئے اکیڈمی ،نودربر ءُُ کواس ہردے گوں زبان ءُُ لبزانک ءَ پہک دل نہ اَنت گڈا میاری کیا کن اِت۔اگاں ہمے رنگ ءَ ما وتی تہا بدلی نیارت داں دپترانی تہا مئے نام ءُُ توار اوں گار ءُُ بیگواہ بیت ءُُ اے گاری چہ مئے زبان ءُُ قوم ءَ چہ زورآوریں قوم ءُُ مردمانی گوما بوتگ گڈاں مئے بستات چے اِنت ۔
