جاہل کجام مردم گشگ بیت؟ ہما کہ کسی گپاں بئے مہ کنت ءُُ ایوک ءَ وتی جند ءِ دلیگاں بزور ایت ،یاکہ ہما کہ جاہل ءَ سرپد کنگ ءِ جہد بہ کنت ۔اے گپ ءَ ہرکس زانت کہ دنیا ءِ مستریں جاہل اوں ہما اِنت کہ آ دومی ءَ جاہل گشیت،بلئے جاہل ءَ اگاں جاہل گشگ مہ میت گڈان جاہل ءِ ءُُ سرپدیں مردم ءِ نیام ءَ چے پرک ءُُ پیرا بیت ۔گشگ ہمے بیت کہ دنیا ءِ تہا مستریں جاہل بنداتی ہساب ءَ ہما فلاسفر گشگ بوتگ اَنت کہ آہاں دنیا دگہ ہساب ءَ معنا کتگ ہمک دور ءَ گوں فلاسفراں ہمے وڑ ءَ کنگ بوتگ بلئے گڈی ءَ گپ ہماہانی راست بوتگ ءُُ مرچی درائیں دنیا آہانی گشتگیں گپانی سرا پہر بندایت ءُُ وتی جند ءِ زند ءَ گوں ہماآنی گپاں دیم پہ دیم کنت ۔چنائی ءَ انچیں تجربتانی سوب اِنت کہ مروچیگیں جاہلاں گیشتر شیکل کنگ ءَ اِنت کہ ما بس ہرچی زان اَنت ءُُ آ کہ مرچی منی ہلاپ اَنت باندہ منی گپاں کن اَنت ۔۔۔۔اے آہانی مستریں جاہلی اِنت،چو نہ بیت اول وَ آ مردم کہ وتی ہرجاہ وتی زانتکاری ءَ پدّر کنگ ءِ جہد بہ کنت آ جاہلے،دومی آ اوں جاہلاں شمار بیت کہ وتی زانت ءُُ زانگ ءَ گوں وت بداریت۔بلکیں اے گپ بے معنا بہ بنت بلئے کمو اگاں پگر کنگ بہ بیت داں اے گپ وت پدرائی دنت کہ ہردو ہساباں مردم جاہلاں شمار کنگ بیت گڈا اسل رہبند چے اِنت کہ مردم جاہل گشگ مہ بیت بلکیں سرپدءُُ شیوار گشگ بہ بیت ایشیءِ مستریں وڑ ءُُ پیم ہمیش اِنت کہ ہرچی کہ تئی زانت ءُُ زانگ ءَ است اِنت آئیءَ دومی مردماں سر کنگ ءِ جہد بہ کنت ءُُ ہرجاہ مپت ءُُ ھُدا وتی زانتءِ پدرائی ءَ مہ کن۔اگاں دیوانے ءَ تو نشتگ ءُُ ساڑی ئے داں گپ ءُُ ھالانی تہا ناگہاں یک جستے دیم ءَ بئیت داں جہد ہمے بکن کہ گڈی ءَ تو وتی پسو ءَ دیم ءَ بیار چو نہ اِنت گپے دپ ءَ دو مہ بیت ءُُ تئی پسو دیم ءَ بئیت گڈا اے جاہلی ءَ شمار بیت سرپدیں مردم چش نہ کنت بلکیں آئیءَ را اوپار ءُُ برداشت ءِ مادہ مان بیت۔اگاں تو دیست کہ دیوان ءَ کس ءَ ہما جست ءِ پسو دات نہ کت گڈا تو پہ گمان وتی پسو ءَ دیم ءَ بیار پدا بچار کہ تو چنچو دوستدارگ بئے ،پدا ہمک مردم تئی زیبائی ءُُ زانتکاری ءِ منوگر بیت ۔تو باز براں دیستگ کہ دیوانے ءِ تہا مدام دیوان ءِ پاگواجہ گڈ سر ءَ لوٹائینگ بیت ایشیءِ پشت ءَ ہم لوجک ہمیش اِنت کہ آ چہ درستاں بزاں دیوان ءِ نندوکاں گیش زانتکار ءُُ عالم اِنت ( اے زلوری نہ اِنت آ سیاسی مردمے بہ بیت)شئیری دیوان ءَ بچار درائیں مردم وتی وتی شئیراں واناں بلئے دیوان ءَ ہردے عطا،ظفر،کریم،قاضی ءُُ منیر ڈولیں شائر کہ وتی شئیراں گڈسران وان اَنت آہانی گال داں دیوان ءِ آسر ءَ مجلس ءِ مردمانی دپ ءَ بنت ۔اے آہانی زانت ءِ چیدگ اِنت ۔بلئے مردماں کئے سرپد کنت کہ ہرکس گشیت کہ ایوک ءَ عقلِ کل ءُُ عالم بس مناں ،ہرچیزے بہ بیت ،ہروڑیں زانت ءُُ زانگے بہ بیت آئیءَ ایوک ءَ من زانان بس دگہ کس آ بزگ نزانت کہ آکہ ہرچی زانت آئیءَ چہ دہ سری زانتکاریں مردم جہان ءَ است بوتگ ءُُ است اِنت بلئے آہاں بہہ وتی زانت ءُُ زانگ ءِ سرا پہر نہ کتگ بلکیں مدام ہمے گشتگ کہ ما ہچ نزاناں انچو کہ یک نامداریں فلاسفرے ءَ گشتگ کہ ’’ من ہمے زاناں کہ من ہچ نزاناں ‘‘۔جاہلیں مردم ءِ لہتیں نشانی اوں بنت اگاں تو شر بچار ءِ داں زانت کنئے کہ کجام مردم زانتکار ءُُ شیوار اِنت ءُُ کجام ایوک ءَ جاہلے۔۔۔۔چوکہ اولی ءُُ مستریں نشانی آئیءِ ہمیش اِنت کہ آ وتی دیم ءِ مردم ءِ گپانی گوشدارگ ءَ ساڑی نہ بیت،دومی نشانی آئیءِ ہمیش انت کہ آ کوکار کنت ،سیمی نشانی آئیءِ مدام ہمیش اِنت آوتءَ راست سرپد کنگ ءِ ھاتر ءَ دروگیں درور دنت ۔دومی دست ءَ ہما کہ زانتکار ءُُ شیوار اِنت آ بہہ کوکار نہ کنت بلکیں ہمے جہد کنت کہ آئیءِ دیم ءِ مردم سرپد بہ بیت برانز مہ گپت ءُُ زانتکار ءِ دومی نشانی ہمیش اِنت آ یکبرے کہ جاہل ءَ را دیستے گڈاں دوبر گوں آئیءَ بہداریں بنگپاں گپ نہ کنت بلے جاہل مدام گوں آئیءَ تران کنگ ءَ چاڑکگ بیت پرچکہ آ وتارا زانتکار سرپد بیت۔ءُُ ہمے قوم ءِ مستریں بدبہتیں اِنت ءُُ کمو پگر بکن ءُُ بچار کہ ما درست اگاں انچیں جاہل بہ باں گڈا چے بیت؟؟؟؟؟؟
