کتاب ءِ نام ساز ءُُ زیمل
ندکار نور محمد نورل
تہر موسیک
سال ۲۰۱۵
شنگکار بلوچی اکیڈمی کوئٹہ
نہاد ۲۰۰
بلوچی زبان ءُُ لبزانکءِ رگ ءُُ ریشگاں ساز ءُُ زیمل ءِ توار اوں گندگ ءُُ مارگ بیت انچو کہ یکبرے واجہ استاد شوکت حیات ءَ گشتگ اَت کہ بلوچ ءِ ہمک پُسگ یک شائرے ،منی دل ءَ شائری ءِ ہمرائی ءَ بلوچ ءِ پسگاں گوں ساز ءُُ زیمل ءَ اوں بلائیں واھگے بندوک اِنت چنائی ءَ ساز ءُُ زیمل ہمک قو م ءِ تہا است انت ءُُ ہمک راج ءَ وتی زیمل ءِ پاسداری ءَ لہتیں سازندگ ءُُ گشندہ ودی کتگ ہمے چندے وشتوار ءُُ وش الہانانی تہا یکے استاد نور محمد نورل اِنت ۔استاد نورل ءِ نام نہ ایوک ءَ بلوچستان ءَ بلکیں سرجمیں پاکستان ءُُ واجہ ءِ وتی گشگ اِنت کہ ہندوستان ءَ اوں بازین زیمل زانتاں گوں گرگ بیت چوکہ نمیرانیں ہندوستانی استاد جگجیت سنگ ءِ گوما استاد نورل ءَ اوں گند ءُُ نند کتگ ۔ہندوستان ءَ بازبران واجہ ءِ روگ بوتگ ۔استاد نورل ءِ چنائی ءَ زیملی ھساب ءَ توسیپ منی ڈولیں زیمل ءَ نہ نابلدیں مردمے ءِ بسات ءَ در اِنت بلئے چوکہ واجہ ءَ وتی ہنر ءُُ زانت ءَ را کتابے دروشمے داتگ پمشکا ہمائی ءِ بابت ءَ یک ءُُ دو تاک سیاہ کنگ بیت کنت۔
’’ساز ءُُ زیمل‘‘ یک زیمل زانتی کتابے،ایشیءِ سرجمیں رنگے ءَ ۱۴۵ تاکدیم اَنت ءُُ کتاب ءِ گڈی ءَ بلوچی زبان ءِ نامدار ءُُ نمیرانیں استادانی عکس اوں دئیگ بوتگ اَنت چوکہ استاد ستار،جاڈوک ،فیض محمد فیض، استاد عزیز ، ءُُ اے دگہ بازیں زیمل زانت ءُُ گشندہ ہوار اَنت ۔استاد نورل ءَ اے کتاب پہ واھگے رند ءُُ بند داتگ ءُُ ہرچی کہ آئیءِ زانت ءُُ زانگ بوتگ آئیءَ ہما رنگ ءَ بیان کتگ اَنت ۔ اے کتاب لبزانک ءِ تہا یک جتائیں بستارے اے ھاتر ا اوں داریت کہ بلوچی لبزانک ءَ چد ءُُ ساری چشیں کتاب چاپ نہ بوتگ ۔بلوچی اکیڈمی ءَ اے کتاب ءَ ابید دگہ یک انچیں ساز ءُُ زیملی کتابے واجہ عبدالرحمن ءِ اوں شنگ کتگ۔ ساز ءُُ زیمل ءِ واھگداراں پہ اے یک جوانیں مستاگے پرچکہ بازیں مردم ساز ءُُ زیمل ءِ واھگ داریت بلئے آ چہ ساز ءُُ زیمل ءَ بے زانگ اَنت اے کتاب پرآہاں یک راہے شوہاز اِت کنت ۔ کتاب ءِ توسیپ ءَ بازیں ھبرے بوت کنت بلئے یک عئیبے کہ منی چماں کپتگ آ ایش اِنت کہ واجہ ءَ ہمک بنگپ باز گوانڈ گپتگ اَنت ءُُ درور اوں ہوار نہ کتگ بزاں آئی ءَ ہمک بنگپ ءِ بزانت باز گونڈ بیا ن کتگ پمشکا بازیں چیزے لس مردم پہمت نہ کنت چنائی ءَ اے کتاب ایوک ءَ پہ ہما مردمان اِنت کہ آہانی سیادی گوں ساز ءُُ زیمل ءَ بہ بیت آ بگندے چرے کتاب ءَ سیتے زرت بہ کنت بلئے لس وانوک چرے کتاب ءَ باز کم زانت زرت کنت منا امیت اِنت کہ استاد نورل ءَ اگاں آوکیں وھداں اے کتاب ءِ تہا گیشی کنگ ءِ واھگ درشان کت داں اے چیزانی ھیال ءَ الم داریت دانکہ چشیں بے دروریں کتابے ءَ چہ ہمک مردم لذت زرت کنت ۔بائدیں اے پڑ ءَ مئے گشندہ ءُُ زیمل زانت بائد وتی وتی پڑاں وتی زانت ءُُ زانگاں کتابے دروشم ءَ دیم ءَ بیار اَنت دانکہ آہانی اے زانت ءُُ زانگ پہ آوکیں مردماں یک راہے پچ کت بہ کنت ۔بلوچی زبان ءَ استاد ءُُ زانتکارانی کمے نہ بوتگ بلئے آ مردماں وتی زانت ءُُ زانگ پہ آوکیں مردماں ایر نہ کتگ اَنت چوکہ واجہ فیض محمد فیضکو ءَ گشتگ اَت کہ من ءَ دوسد ءَ برز زہیرونک کیت اِنت بلئے آ کجام کجام زہیرونک بوتگ انت آہانی وڑ ءُُ پیم چے چے بوتگ اَنت آ درست گوں واجہ فیضکو ءِ ہمرائی ءَ شتاں ۔چوکہ زہیرونک یک بلوچی زیمرے تہرے ءُُ ایشیءِ بابت ءَ زانگ بزاں وتی جند ءِ ربیدگ ءِ زانگ اِنت پمشکا بائد اِنت مئے استاد ءُُ زیمل زانت وتی زانت ءُُ زانگاں چو استاد نور محمد نورل ءِ ڈول ءَ کتابے رنگ بدینت ءُُ دیم ءَ بیار اَنت دانکہ آہانی زانت ءُُ زانگ گار مہ بیت ءُُ آوکیں مردماں راہے گشوار کت بہ کنت۔
