اے فطرت ءِ کانود اِنت ہمک است ،نیست بیت ہمک چیز الم ءَ زوال ءُُ ھلاسی گنِدایت ،ہمے رنگ ءَ روچ ،ماہ ءُُ سال زند اوں کیت ءُُ ھلاس بیت ۔اے رہبند ہمے وڑا داں قیامت ءَ برجم اِنت ۔اے دنیا ءَ ہمک مردم ودی بیت آئی ءِ کرا لہتیں سال ءُُ وھد بیت اے بنی آدم ءِ وتی جند ءِ منشا اِنت کہ وتی وھد ءَ چون گوازینیت ( اے گپ وتی جاہ ءَ راست اِنت لہتیں جاھاں زوریں کانود ءُُ زوراکیں مردم لاچار کن اَنت تو ہمائی ءِ وڑا زند ءَ گوازینئے)
مئے گیشتریں مردمانی زند روایتی رنگ ءَ گوزگ ءَ اِنت ما گیشتر روایتی رنگ ءَ فکر ءُُ سوچ کن اَنت نماز وان انت ،نبشتہ کن اَنت ،گپ جن اَنت ءُُ پدا بے ھال بنت۔
۲۰۱۶ ءِ گڈی روچاں ہمک مردم فیس بک ءُُ وٹساپ ءَ نوکیں سال ءِ مراد دئیگ ءَ گلایش اِت انت ہرکس وتی گواستگیں ردیانی پہلی ءَ لوٹگ ءَ اَت فیس بک ءُُ وٹساپ گیش کارمرز بوھگ ءَ اَت ،کسی دل ءَ اے واھگ نیست اَت کہ یکے دومی ءِ دیدار ءَ ہمائی ءِ گس ءُُ کوٹیاں بروآں بلئے ھئیر۔۔۔۔۔۔۔ہمے وھداں ھالے دیم ءَ گوست کہ ’’ جاپان ءَ نوکیں سال ءِ بندات گوں دعا ءَ کتگ ،من جیڑیت کہ ایشانی دیمروئی ءِ سبب ہمیش اِنت من انگت ءَ ہمے جیڑگ ءَ اتوں کہ چاریں نیمگ ءَ تیرانی توار بوت انچو گمان بوت شال ءِ سرا کافراں ارش کرتگ ءُُ کلیں مسلمان وتی اسلامی ملک ءِ رکینگ ءِ ھاترءَ جنگ ءَ اَنت کساس یانزدہ منٹ ءَ چاریں نیمگاں تیرگواری بوت شال ءِ مردماں نوکیں سال گوں تیراں وش آھتد کت ۔ من جیڑیت نوکیں سال ءِ وش آہت گوں تیراں پرچہ ۔۔۔؟؟؟
ہمے سبب اِنت داں سال ءِ گڈی ءَ اوں مئے چاگرد ءَ ہمے تیرہمراہ داری کن اَنت ءُُ روچے یکے ءِ زند ءِ چراگ کشگ بنت۔جاپان ءُُ روبرکت ءَ دعا کنگ بیت ءُُ مئے چاگرد ءَ تیرگواری انگت ءَ واجہ کار گش اَنت کہ رودراتکی چاگرد گنگ ءُُ کور اَنت ءُُ ملک ءِ شر شاعر اں ہمے بابت ءَ وتی بازیں شئیرے اوں نبشتگ چوشکہ
ؔ
اٹھا کر پھینک دو باہر گلی میں
نئی تہذیب کے انڈے ہیں گندے
من ءَ یات انت ۲۰۱۱ ءَ وھدے شال ءَ کمو زمین چنڈ بوت گڈا چاریں نیمگ ءَ تیرگواری بنا بوت نزاناں اے ھدا ءَ ترسینگ ءَ ات انت یا زمین چنڈ ءَ را۔۔۔۔؟؟؟ اے دگہ روچ ءَ روتاک ءَ ھال آھتگ ات شال ءَ زمین چنڈ ءَ مردم بیران نہ بوتگ بلئے ہمے تیر گواری ءَ چہ دو مردم بیران بوتگ اَت ۔فیس بک ءَ سنگت ءَ نبشتہ کرتگ اَت کہ ’’ نزاناں نوکیں سال چے رنگ ءَ بیت بلئے تیراں مارا کر کرتگ ۔‘‘
اگاں یک ملکے ءَ نوکیں سال ءِ بندات گوں تیراں بیت گڈا آئی ءِ سال چون بیت؟وہدیکہ یورپ ءُُ روبرکتی ملکاں سال ءِ بندات گوں دعا ءُُ وش رنگی نوراں گوں کنگ بیت ۔ہمے ھاترا آھانی سرجمیں سال گوں وشی ءُُ شاتکامی ءَ گوزانت ءُُ مئے ۔۔۔۔؟ ملکے ءِ راجی زند ہما وھداں شر بیت کہ آ وتی گواستگیں ردیاں بماریت ءُُ آہاں شر کنگ ءِ جہد بکنت۔ابید جہد ءَ نوکیں جزبگ نوکیں فکر ءُُ واہگاں مئے زندکدی مٹ نہ بیت بیا اِت نوکیں سال ءِ بندات ءَ گوں نوکیں فکر ،ھیال ،جذبگاں کن ایں پرچکہ مئے گار ءُُ بیگواہی ءَ سامان سرجم کنگ بوتگ اَنت ۔نوکیں دنیا ءِ لوٹاں چہ مارا سرپد بوھگی اِنت وھد ءِ ہمراہ داری کنگی اِنت دیم ءَ جنزگی اِنت پہ مرادانی منزل ءَ روگی اِنت بس دیم ءَ چارگی اِنت ،دیم ءَ روگی اِنت
ؔ
منزل ءَ مرادانی ما رسیں ہما روچ ءَ
من بزاناں گار اِنت دل،دل بزانت کہ گاراں من
