اے وڑا اے دیھاں داں سے ہزار سال حاکمی کت ۔اشانی بازیں کار ءُُ کرد اَت انت اشانی دوازدہ سردار اِت انت۔ زیوس ءَ وتی کہول ءِ ربیدگ ءِ رد ءَ گوں وتی گہار ھیرا آروس کت ۔آہاں مدام وت ماں وت مڑ ءُُ کُسک کت ۔زیوس چہ آئی ءِ بے وفائی ءَ مدام زہر ءُُ کہر اَت۔ھیرا ءَ چہ وتی کار ءُُ کرداں آمدام بدگمان کت ۔ھیرا شک پیداک کنگ ءِ شہ بانک اَت ۔آئی ءِ واستہ زیوس ءِ دل ءَ بدگمانی ءُُ شک ودی کنگ گرانیں کارے نہ اَت ۔چو نا ءَ زیوس ءِ ایندگہ کار ہم باز اِت انت ۔
یک رندے آئی ءَ ا یندگہ دیھ زیوس ءَ پشت ءَ مست کت اَنت ءُُ آئی ءِ پشت ءَ پندلے ساز اِت ۔آئی ءَ را نشہ دات ۔ وہدے آ کہ واب کپت گڈاں آہاں انگیر کت ءُُ گوں تناباں بست۔زیوس ءَ گُرات ءُُ نہردات ءُُ سوگند وارت کہ آ آہاں تباہ ءُُ برباد کنت بلئے آہاں آئیءِ نپت دزاتکگ اَت پمشکہ آئیءَ تناب سوتک نہ کت اَنت ۔بلئے آئیءِ ناکوزتک سد دستی بریریوس کہ آئیءَ بلاہانی دیم ءَ آئیءِ کمک کرتگ اَت آئی ءِ باگ ءَ کار ءَ اَت آئی ءَ چہ ماڑی ءِ دریگ ءَ آئی ءِ گُر ءُُ نہر اِش کت اَنت ۔آئی ءَ سُرک دات، دیست ئے کہ آئی ءِ واجہ گوں نندانکی تحتگے ءَ بستگ ۔آئی ءَ چہ دریگ ءَ وتی دراجیں سدیں دست راہ دات اَنت ءُُ آئی ءِ بستگیں سدیں کک بوتک اَنت زیوس ءَ چہ تحتگ ءِ سرا انزار بست ءُُ وتی نپت چہ آہانی دست ءَ پچ گپت ۔درائیں پندل ساز چہ ترس ءَ گار بوت اَنت ءُُ زیوس ءِ پاداں کپت اَنت گریتئے ءُُ چرآئی ءَ پہلی یے لوٹ اِت ۔آئی ءَ ھیرا بندیک کت گوں زریں سانکلاں بست ءُُ آزمان ءَ درْتک ۔ایندگراں اے ہمت نہ بوت کہ آئی ءَ پچ بکن اَنت ۔آئی ءِ توار چو گوات ءِ توپان ءَ اَت پدا آئی ءِ گریوگاں آ چہ واب ءَ پاد کت ۔سہب ءَ آئی ءَ گشت کہ آ اے شرط ءَ آئی ءَ را آجوکنت اگاں آ سوگند بوار ت کہ دگہ پرے آ چشیں پندل نہ ساز ایت ۔آئی ءَ سوگند وارت ،ہمے وڑا زیوس ءَ ہم سوگند وارت کہ آ آئی ءَ ہچ نہ کنت ۔بلئے دوئیں یکے دومی ءِ چارو بوت انت ۔زیوس دیھانی بادشاہ اَت ،آزمان ءِ حاکم ءُُ واجہ اَت ۔آئی ءِ گہار ڈیمیٹرزمین ءِ شہ بانک اَت ۔چزانی رودینگ ءِ شہ زال آئی گہار ھیرا دیھانی بانک اَت ءُُ آئی ءِ جن( لوگبانک) اَت ہم ۔آئی برات چوسیڈن زرانی دیھ اَت ۔آئی ءِ دگہ براتے حادث تارونکیانی بادشاہ ءُُ حاکم اَت ۔چیر ءُُ اندریں دنیا ءِ حاکم اَت ۔چہ موت ءُُ مرگ ءَ آ دیم ءِ دنیا ہمائی ئیگ اَت۔دیھانی اے دنیا ءَ ایندگہ درائیں دیھ زیوس ءِ چک ءُُ زہگ اِت انت آہانی تہا سے چک چہ ھیرا ءَ اِت انت ۔چہ اشاں یکے آریس اَت کہ جنگ ءِ دیھ اَت ۔ہیپاٹیسٹس سلاہانی دیھ اَت ،لوڈیگے اَت ۔دگہ یکے ہریس اَت ،جاک ءُُ سلوات ءِ دیھ ،آئی ءَ گوں آریس ءِ ہمرائی ءَ جنگاں جاک ءُُ سلوات کت ۔زیوس ءِ ایندگہ درائیں چک بے نکاحیں چک اِت انت ۔آھاں سے دیھانی ہمے دنیا ءَ آتک اَنت ۔اولی اتھینے اَت ،اے جنک چوں ودی بوت اے اے کسہ ءَ آوکیں در ءَ کنیں۔۔۔۔۔
Heroes ,Gods and monsters of the Greek myths
By:Bernard Evslin
