بلوچستان ءَ چنائی ءَ بے روزگاری ءِ کچ ءُُ کیل چہ گشگ ءِ ھد ءَ در انت،یک یک پوسٹے ءِ سرا ہزارانی ھساب ءَ مردم پہ ہمے پوسٹاں جمع کن اَنت ہمے ڈول ءَ ایگریکلچرر پوسٹ انوں پہ بلوچستان ءِ مردماں اتکگ اَت پوسٹ سرجمیں رنگ ءَ دہ ءُُ بیست بوتگ اَنت ءُُ جمع کنوک بیست ءُُ پنچ ہزار ءَ گیش مردم بوتگ اَنت آ اوں ہما مردم کہ شارٹ لسٹ کنگ نہ بوتگ اَنت آ اوں پہ ہمے پوسٹانی ھاترا ءَ دیم ءَ آرگ بوتگ اَنت ۔سرکار ءَ اگاں پوسٹ پہ لس مہلوک ءَ دئیگی نہ اِنت گڈاں چہ بن ءَ مداینت بلئے پہ پیشدارگ ءِ ہاترءَ چندے پوسٹ روتاکاں دئینت کہ ما بلوچستان ءِ لس مہلوک ءَ ما پوسٹ دئیگ ءَ اَنت۔ٹیسٹ ءِ روچ ءَ انچیں بے رہبندی دیم ءَ اتکگ کہ آئی ءِ گپ کنگ نہ بنت نہ گشئے یک ٹیسٹے بلکیں انچو سما بوتگ کہ گشئے سرکار ءَ مپت ورگ بہر کنگ ءَ بہ بیت مردمانی رش بیت انچو رش بوتگ ۔یک مستریں بے رہبندی یے اے بوتگ کہ ہما درائیں مردماں اے ٹیسٹ داتگ گوں کہ آ پہ اے ٹیسٹ ءَ لاھک نہ اَنت بزاں ہما آں کہ میٹرک کتگ آ اوں اسسٹینٹ فلیڈ ءِ آفیسری ءِ ھاتر ءَ وتی فارم جمع کتگ اَنت بزاں ایم اے ءُُ ایم فلانی ءُُ میڑک پاسانی مانا یک بوتگ اے یک مستریں ءُُ بلائیں بے رہبندی یے بوتگ کہ ٹیسٹ گروکاں گوں بے روزگاراں کتگ ۔
دومی روچ ءَ انٹریو ءَ ہم بید چہ شارٹ لسٹ والائیں مردم لوٹائینگ بوتگ اَنت ءُُ یک روچے ءَ سرجمیں انٹریو ھلاس کتگ بزاں یکیں روچ ءَ انٹریو ھلاس کتگ درائیں مردم شد ءُُ لاپ سردی ءَ نشتگ اَنت کہ کوئٹہ اے وھداں ہور ءُُ برفباری ءِ تہا انت ءُُ موسم سک باز سرد انت بلئے درائیں نودربر ڈن ءَ نادینگ بوتگ اَنت اے گوں وانگ ءَ یک بلائیں زلم ءُُ زوراکی یے کہ نودربر کہ قوم ءِ آکبت اَنت آ ڈں ءَ سارتی ءَ دور دئیگ بہ بیت ۔پدا انٹریو ءَ انچیں جست کنگ بوتگ کہ آ ہاں گوں استیں پوسٹ ءَ ہچ وڑیں سیادی نہ بوتگ بزاں لبزانی اسپیلنگ جست کنگ بوتگ اَنت ءُُ نودربر کلاگ گرگ بوتگ اَنت ۔انٹریو دیوکیں نودربرانی گشگ ہمے بوتگ کہ انٹریو گروکیں افسراں گوں آہاں لیب ءُُ مسکرائی کتگ کس ءَ نہ گشتگ کہ اے یک چکاسے بوئگ ءَ اِنت ءُُ سرکار اے بابت ءَ بائد دلگوش گور بہ کنت ءُُ چکاس جاہ ءَ چار ءُُ تپاسی ٹیم روان بدنت ءُُ بچارایت کہ چکاس پہ وڑ ءُُ پیم گرگ بوئگ ءَ اَنت یا پہ دیم ۔اگاں سرکار چشیں گامگیج دیم ءَ میار ایت گڈاں ہمے زانگ بیت کہ سرکار اوں گوں ہمے ڈنگ ءُُ دُزاں ہوار اِنت ءُُ اے بے رہبندی ءَ سرجم ءَ دست ہواری است انت ۔ حکومت بائد اے درگت ءَ بلوچستان ءِ بے روزگاریں مردمانی ھاترءَ نوکتریں وڑ ءُُ پیم ءَ دیم ءَ بیار ایت اگاں حال ہمے بہ بیت گڈاں انوگیں کہ بیست ءُُ پنچ یا سی ہزار کہ پوسٹ پیداک اَنت اے اوں ہمے ڈول ءَ ور ءُُ چری ءِ آماچ اَنت ءُُ ہما کہ اے پوسٹانی ھکّیگیں مردم بنت آ سرجم ءَ ڈالچار کنگ بنت ءُُ ٹیسٹ ءُُ انٹریو گروکیں مردم وتی جند ءِ مردماں پہ ہمے پوسٹانی ھاترا گچین کن اَنت ۔بلوچستان کہ پیسرا پاد مال ءُُ لگتمال انت ایشیءِ قوم ءُُ راج ءِ مردم گیشتر بائد پدمنتگ کنگ مہ بنت ۔اے درگت ءَ کلیں نودربر ءُُ ہما بے روزگاریں مردمانی کہ ڈگری اِش گپتگ اَنت ءُُ اے دفتر ءُُ پرا دفتر اَنت آ ہمے لوٹ انت کہ سرکار اے درگت ءَ چکاسانی چار ءُُ تپاس ءَ وتی دست ءَ بزور ایت ءُُ اے جیڑگ ءِ گشواری ءَ زوت بہ کنت دانکہ ہما نودربر کہ ہمے پوسٹ ءُُ سیٹانی ھکّیگیں مردم اَنت آ ہاں وتی ھک ءُُ مُز دست بہ کپیت ۔دلپروشی وَ ساری ءَ چہ بلوچستان ءِ مردمانی دل ءَ است اِنت بائد اے دلپروشی چد ءُُ گیش کنگ مہ بیت ءُُ اے آس کہ دلاں جمبور اِنت اے توسگ بہ بیت داں پہ ملک ءُُ قوم ءَ ءُُ پہ ہرکس ءَ گہتر ءُُ شرتر اِنت۔
