انچو گشنت ’’ہرمرگ ،بالء وت‘‘ بزاں ہمک مردم ءِ وتی یک آٹئیگ ءُُ اوپار ءِ کچ ءُُ کساسے بیت ۔ہمک مردم ءِ گران باری ءِ ڈبہ ءِ کوپگاں کنگ ءِ اوں وتی جند ءِ کچ ءُُ کساسے بیت۔بزاں آ وتی کچ ءَ چہ گیش چست کت نہ کنت ۔پمشکا بائداِنت کہ ہرکس وتی کچ ءُُ آٹئیگ ءِ ھساب ءَ بار ءَ کوپگاں بہ کنت ۔منی یک نزیکیں سنگتے ءَ من ءَ گشتگ اَت کہ تو مدام زبان ءِ جیڑگانی بابت ءَ نبشتہ کن ئے ترا زانہ دگہ لبزانکی چست ءُُ ایراں گوں کار نیست؟ من نزانت کہ من اے مردءَ را چے پسو بدئینت۔۔۔۔۔۔اے مردماں کئے سرپد بہ کنت کہ زبان بیت گڈاں لبزانک بیت اگاں زبان ءِ جند مہ بیت گڈاں لبزانک چون بوت کنت ؟منی زبان ءِ بابت ءَ نبشتہ ءِ کنگ ءِ مستریں مول ءُُ مراد ہمیش اِنت کہ مئے زبان ءِ جیڑگ سک باز اَنت ءُُ مارا زبانزانت نیست اِنت۔زبانزانتی چنائی ءَ ہم درائیں وانگیاں چہ گران تر اِنت ،ایشیءِ گرانی ایوک ءَ ہمیش اِنت کہ اے گیش وانگ لوٹیت ءُُ تجزیہ کم بلئے لبزانک ءِ اے دگہ گیشتریں پڑ سسا ساچی اَنت بزاں ندکار ءِ وتی سما ءَ گوں بندوک اَنت ۔بلئے زبانزانتی ایوکیں پڑ اِنت کہ ایشیءَ گمانی گپ ءُُ تران بوت نہ کنت۔ پرچکہ اے یک سائنسی وانگے ءُُ سائنسی وانگ بید چہ شاہدی بزان دلیل ءُُ بیان ءَ بوت نہ کنت ءُُ ہمے سوب اِنت کہ مارا جوانیں آزمانکار رستگ ،گدار نویس است ،شاعر وَ مئے بے مٹ انت ءُُ پہ ھساب ھلاس نہ بنت بلئے زبانزانت مارا نیست اِنت بید چہ سید ءَ کہ آئیءَ پہ زبان بازیں کارے پماں گشوار کتگ ۔ بلوچی ڈیپارٹمنٹ کوئٹہ ءَ مئے شاہ زانت ءُُ کواسیں استادانی تہا ایوک ءَ یک ٹیچرے است کہ آئی ءَ ہمے پڑ دوست داشتگ ءُُ ہمیشی ءَ کار کنگ ءَ اِنت بزاں واجہ حامد علی بلوچ کہ انوگیں بلوچی بہرگ ءِ کارمستر اوں است انت ۔ اِدا منی گشگ ہچبر اے نہ اِنت اے دگہ استاد چہ زبان ءَ نا بلد اَنت ،اِناں درائیں استاد چہ زبان ءَ سرپد ءُُ آشنا اَنت بلئے آ لبزانک ءِ اے دگہ پڑانی گشواری ءُُ شوہاز ی کاراں دست گٹ اَنت ۔واجہ حامدعلی بلوچ یک کسانیں کوچگے ءَ ودی بوتگ ءُُ وتی وانگی روچاں بازیں جنجالے ءِ دیمپان بوتگ کہ آھانی بیان ءَ ادا کنگ نہ لوٹاں ۔۔۔۔۔۔بلئے آئیءِ نزیکیں مردم ءُُ سنگت شر سرپد ءُُ زانتکار اَنت کہ آئیءَ چون ءُُ چتور وتی وانگی دور آسر کتگ ءُُ مروچی اے اگدھا ءَ سر بوتگ ۔بلوچی ڈیپارٹمنٹ ءَ واجہ ءِ پوسٹنگ گمان ۲۰۰۸ ءَ بوتگ ءُُ وتی ایم فل ہم چہ ہمے مزن شاہ دربر ءَ زبان ءِ پڑ ءَ کتگ ۔انوں وتی پی ایچ ڈی ءِ کاراں گوں دست گٹ اِنت ۔دو رند ءَ سویڈن ءَ زبانی جیڑگانی کانفرس ءَ شتگ ءُُ بلوچی زبان ءِ جیڑگانی گشیوار ی ءَ وتی شور ءُُ صلاح داتگ اَنت ۔واجہ ءِ بازیں نبشتانکے تاک ءُُ ماہتاکاں چاپ بوتگ ۔ بلئے گیشتریں کار گوں زبانزانتی ءَ بندوک بوتگ اَنت ۔یکرندے منا یات اِنت کہ من آئیءَ را جست کت کہ واجہ مئے چاگرد ءَ دانکہ مردمے ءَ را یک ءُُ دو کتاب نام ءَ نہ بیت آئیءِ زانت ءُُ زانگ ءَ کس بئے نہ کنت ءُُ تئی انگت ءَ کتاب پرچہ چاپ نہ بوتگ ؟ داں آئیءَ پسو دات کہ من انگت ءَ وانگایاں ۔۔۔۔زبان ءَ شر سرپد نیاں آئیءِ رگ ءُُ ریشگاں جوانی ءَ پوہ نیاں من چتور کتاب در کت کناں ءُُ نیم بندگ ءُُ نیم شلوگیں کتاباں ہچ سیت نیست ءُُ رد ءُُ بندی کتاب درد وار بوت ہم نہ کن اَنت۔ اے پسو ءَ رند من دگہ جست نہ کت ۔زانتکاریں مردم مدام چہ وتی گپتارءَ زانگ بیت ۔انچو کہ نامداریں شاہزانت سقراط ءَ گشتگ کہ من ہمنچو زاناں کہ من ہچ نزاناں ۔۔۔۔۔ایشیءِ بزانت اے نہ اِنت کہ آ ہچی نزانت آئیءِ زانت وت گپ جنت پمشکا آئیءَ را دگہ شور ءُُ سلواتے ءِ آجت نہ اِنت ءُُ واجہ حامد علی بلوچ اوں چمے مردماں یکے ۔
بلوچی بہرگ ءِ کماشی ءَ گوں آئی ءَ وتی کارانی یک بے دروریں گامگیجے دیم ءَ آورتگ ۔اگاں واجہ حامد علی سوبمند بہ بیت داں آئیءَ را ہمے کار پہ ابدمانی ءَ بس اِنت ،بزاں’’ انسٹیٹیوٹ آف بلوچیالوجی‘‘ ءِ جوڑ کنگ ۔اگاں اے کار ءَ واجہ سوبمند بہ بیت داں نہ ایوک ءَ پہ بلوچی زبان ءُُ لبزانک ءَ بلائیں کارے بیت بلکیں آوکیں وھد ءَ پہ بلوچ اسکالراں اوں یک مزنیں راہ ءُُ درے پچ بیت۔واجہ ءِ وژن پہ زبان ءِ دیمروئی ءَ تچک اِنت ۔جہان ءَ چشیں مردم نیست کہ سرجم ءَ پہک ءُُ پلگار بہ بیت آئیءِ تہا اوں لہتیں نزوری است اِنت کس پارسائی ءِ جار ءَ جت نہ کنت بلئے یک چیزے کہ پہ قوم ءُُ زبان ءَ کنگ بوھگ ءَ اِنت داں بائد مئے اے دگہ کواس ءُُ سرپدیں مردم آئیءِ دست کمکی ءَ بہ کن اَنت نیکہ ایرجنی ءُُ پاد کشی بہ بیت ۔ہمے ایرجنی ءُُ پادکشی ءَ مروچی بلوچ راج ءَ را کجا سر کتگ ،ما وتی دیم ءُُ پشت ءَ بچار اَنت کہ مئے عہدی زمانگ ءَ مئے مستریں ردی ہمے بوتگ ۔اگاں ما چہ وتی ردیاں ہئیل نہ زرت ءُُ انگت ءَ یکے دومی ءِ پادکشی یل نہ دات داں آ روچ دور نہ اِنت کہ مئے نام دپتر ءِ تاکاں اوں گندگ نہ بیت ۔
انچو گشنت کہ کار ءَ ہما مردم ءَ بل کہ آ ہما کار ءَ شیوار ءُُ بلدکار اِنت،من پیسر ءَ گشت کہ ہرکسی وتی یک بستار ءُُ ارزشتے است انت ءُُ ہرکس وتی جند ءِ پڑ ءَ کار بہ کنت داں درائیں کار پہ ڈولی گشوار بنت بلئے بلوچ ءِ مستریں بد بھتی ہمے بوتگ ءُُ ہمیش اِنت کہ ہما کار کہ ہمائی ءِ نہ اِنت ہمائی ءَ را دست ءَ اِنت ءُُ ہما کار ءِ کہ اسل مردم اِنت آ ہما کار ءَ کنگ ءَ نہ اِنت یا آئیءِ پادکشی بوھگ ءَ اِنت۔ اے ڈول ءَ زبان چتور دیمروئی کت کنت ۔مرچی یک مردمے ءِ کارانی توسیپ ءَ چار دانک نبشتہ کنگ بہ بیت داں ہمے گشگ بیت کہ بچار پلانی مرچاں پلانی ءِ چمچہ ئی ءَ اِنت،چو وَ شما تماشا کنئے ، بزاں مردمے ءِ توسیپ ءَ کنئے گشئے چمچہ اِنت ،اگاں توسیپ نہ کنئے گڈا گشگ بیت کہ تو مرچاں مئے گروپ ءَ نیئے اے ڈولیں پگر ءِ واجہ دیمروئیءِ منزلاں چون سر بوت کنت ؟ھو من نبشتہ کتگ ۔۔۔۔!ہرکس ایشیءَ ہرچی سرپد بیت بہ بیت،بلئے اگاں اے نبشتانک ءَ چہ ہمے زبانزانت ءَ را دلبڈی یے بہ رسیت داں من ہمے سرپد باں کہ منی اے دوئیں دانک پہ مپت نہ بوتگ اَنت ۔
