وہدے یونانی وتی مردگاں کل کن اَنت گڈا آئی ءِ لِکّک ءِ چیرا ذّرے ایر کن اَنت تنکہ آئی ءِ اروح اسٹیکس کور ءِ گوزگ ءِ کرایاں دات بکنت۔ اسٹیکس دوزح ءِ یک کورے ءُُ اے کور ءَ گوازینوک کیرون انت کہ سکیں کنجوسکے ۔ہما اروح کہ کور ءَ گوزگ ءِ کرایاں دات نہ کنت آئی ءَ پہ مدام کور ءِ ہمے دست ءَ نندگ ءُُ ودار کنگی انت۔باز براں اے مردگانی روح پدا ہما مردمانی سرا کپ انت کہ آہاں آہانی کرا نہ داتگ انت ۔کور ءِ آ دست ءَ یک مزنیں دیوالے مک اِنت کہ ایشی ءِ در ءِ پانگ پاہ ’’سر بیرس‘‘ انت کہ یک سے سرگی ایں کچکے کہ آئی ءِ تلب ڈُنڈ ناں بلکیں زندگیں ساہداری گوشت انت ۔اے کچک ہرچ اروح ءَ دپ جنت ۔دروازگ ءَ آد یم دوزح ءِ گرک انت یک مزنیں پراہ ءُُ شاہیگانیں باگے کہ آ مڑ ءِ سیاہیں درچکاں ساہگ کتگ ۔مردگ ہمدا بنت ۔بامرد ءُُ بینگ ۔سپاہیگ ءُُ شوانگ ،ملا ءُُ حامی ،واجہ ءُُ غلام دراہ، بے مول ءُُ مراد ءَ ہمیدا تر ءُُ گرد کن انت ۔وہدے اے گپ جن اَنت گڈا چو چپچل ( شپ چر) ءِ وڑا چری چری کن(چریسک) اَنت۔ہمے جاہ ءَ اے وتی حساب ءُُ کتاب ءِ ودار کن انت ۔سے دیھ اشانی حساب ءُُ کتاب ءَ کنت ۔مینوس، رہدا مینتسءُُ آئیکس ۔ہماہاں کہ دیھ ناوش کتگ انت ،آہاں سزا دئیگ بیت ۔سیسی پس ءَ مدام یک مزنیں کُتکے چہ بن ءَ کوہ ءِ چنبال ءَ برگی ءُُ سرکنگی انت۔ ہروہد ءَ آ ایشی ءَ کوہءِ نیم ءَ بارت بلئے پدا شِتر اِت ءُُ جہل ءَ کیت بلئے آئی ءَ پدا اے چنگی ءُُ برزا برگی انت ءُُ آ اے کار ءَ داں ابد کنت۔ٹان ٹالس ءَ را یک ہوشامے دئیگ بوتگ کہ بہہ نہ پروش ایت۔آ مدام سارت ءَ وشیں آپانی شت ءُُ شہجواں نندایت بلئے ہمے کہ سرءَ جہل کنت کہ ترمپے بوارت، آپ ہش ایت ۔ اے وڑا آ آپ وارت نہ کنت اے ہمے وڑا اوشتاتگ کہ سیسی پس وتی کُتک ءَ کوہ ءِ سرا سر بکنت۔
بلئے اے گچینی جیڑہ انت ۔بازیں ارواح اے وڑا ٹپاسگ بنت یا آہانی حساب ءُُ کتاب اے وڑا بیت کہ ناں جوان بوتگ انت ءُُ ننکہ حراب ،اے ایوک ءَ مردگ حساب بنت اے چہ چداں پدا دگہ یک پٹے ءَ رونت کہ آئی ءَ اسپیڈل(Asphodel) گش انت ودار ۔۔۔۔ودار پہ ہچی! ہماہاں کہ بازنیکی کتگ ہمے باگ ءِ کش ءَ بہشت ءَ بنت ۔ادا ارواح آجو ءُُ آزات انتاشاں پہ کنگ ءَ ہچ کار نیست ۔ کوش زیمر جنت۔ ساہگ درائیں روچ ءَ ناچ ءُُ لیب کن انت ءُُ درائیں شپ ءَ ہم اے مردگاں واب ءِ زلورت نہ بیت ۔پہ اے وش ءُُ رازی ایں ارواحاں اے باری ہم ہست انت کہ اے دومی براں پدا زمین ءِ سرا( اے دنیاءَ ) ودی بہ بنت ۔ایشی ءَ ایوک ءَ دلیریں ارواح قبول کن انت ۔بہشت ءَ دگہ گچین جاگہے ہست کہ آئی ءَ را اسلے ءِ جاگہہ گش انت اسلے ہماہاں گش انت کہ زمین ءِ سرا سے براں ودی کنگ بوتگ انت ءُُ آہاں سیئیں براں بہشت رستگ ۔حادث ءُُ آئی ءِ شاہ بانک یک مزنیں ماڑے ءَ جاہ منند انت کہ آ گوں سیاہیں سنگا ں بندگ بوتگ۔آپہ وتی ایندگہ براتاں سک حسدیگ انت ءُُ بازکم چہ وتی ماڑی ءَ در در کپ ایت ۔حادث مدام چہ وت ءَ گیش نہ اَنت۔ آئی ءَ گوں دگراں کار نیست ہرچ نوک آ ؤک ءِ سرا شک کنت ءُُ ہرچ روچ ءِ ہلاسی ءَ کیرون ءَ گشیت کہ آئی ءَ ہما روچ ءِ آؤکیں سرانی حساب ءَ بدنت ۔آئی ءَ وتی ہرچ کار ءِ حساب جوانی ءَ گون انت آ ہچ زندگ ءُُ میرانیں چیز ءَ وتی دمگ (Tatarus) ءَ آہگ ءُُ رؤگ ءَ نیل اِت ۔آئی ءِ اے کار رہبند ءَ دو چیزانی اجازت انت بلئے اے دوئیں چیر دگہ دو مزنیں کسہ انت ۔حادث ءِ ماڑی پیش گاہ ءُُ چپ ءُُ چاگرد ’’ اری بس‘‘ گشگ بیت ’’ تہاری چیدگ ‘‘۔ اے چیر زمین ءِ جُہل تری ہند ءُُ جاگہہ انت ۔ادا ہچ بالی مرگ ناگواہ ایت بلئے مرگانی بانزلانی توار اشکنگ بیت ۔ادا ’’اری نس‘‘ ءُُ پری نشتگ انت اے عمر ءُُ سند ءَ چہ دیھاں مستر انت ۔اشانی نام ٹیسی پونے ،الیکٹو،میگائیرا انت ۔اے چو جن ءُُ جاتوگ ءَ انت اشانی پُٹ چو سیہ مار ءَ انت ،سہر ءُُ روکیں چم ءُُ زردیں دنتاں انت ۔آ گوں آہن بندیں چابک ءَ گوات ءَ جن انت ءُُ درانت ۔اگاں آ ڈوہ دارے بگنداں گڈاں آئی ءِ پوست ءَ جن انت ۔آئی ءِ گوشتاں چہ ہڈاں دور کن انت ۔اشانی کار زمین ءَ آہگ ءُُ چارگ انت اگاں اے ھراب کارے بگندانت ۔آئی ءَ سزا دئینت ءُُ پہ گچین ہماہاں کہ چہ پیسریگیں سزاہانی رکگ ءَ درشتگ انت ۔ اشانی ترس ءُُ بیم سک باز انت۔کس اشانی نام ءَ نہ گپت ۔اشاں ’’ مہربان‘‘ ءِ نام پرکنگ بوتگ کہ اشانی چیدگی نا م اَنت۔
حادث اشاں سک باز شرپ ءُُ عزت دنت پرچکہ ہمیشانی برکت ءَ آئی ءِ بادشاہی ءُُ حاکمی برجاہ انت پرچکہ مردماں گیشتر وت کشی ءِ سکین ءَ ہمے دئینت ۔حادث چہ آہانی وت ماں وتی گپ ءُُ ہلوتاں سک وش بیت ۔وہدے آ وتی کاراں پد کہ ’’ اری بس‘‘ ءَ کاینت ءُُ ماڑی ءِ پیژگاہ ءِ جہل دیم ءَ پہ جاک ءُُ کوکار وتی کسہاں کن انت ءُُ پدا بازیں گپ پہ ہلوت جن انت ۔حادث مردگانی بادشاہی ءِ لائق ات پرچکہ آ جنگولے ات آئی ءَ وتی بیر بہہ یلہ ندات ۔آئی ءِ تامداریں کسہ ہمیش انت کہ وہدے آئی ءَ پرسیپون آوار جت ءُُ وتی شاہ بانک کت ۔بلئے اے دگہ کسہے!۔۔۔
