ایگزیکٹیو آفیسرانی آکبت ءِ بابت ءَ اولی رند ءَ سپریم کورٹ ءَ سوڈگ داتگ ات کہ اشانی کیڈر گشینگ بہ بیت پرچکہ چہ بلوچستان ءَ بازیں حقداریں مردمے اشانی حق جنی ءِ آماچ بوتگ اَت چوکہ اشانی پشت ءَ مزنیں واکداریں مردمے ہست ات کہ اشاناں وتی نپ ءُُ سیت ءَ کامرز کنگ لوٹگان ات انت ءُُ اے آفیسر پرے کار ءَ تیار ءُُ چاڑیگ ات انت ۔ایگزیکٹیو آفیسرانی آکبت ءِ بابت ءَ بلوچستان ہائی کورٹ ءَ ہم جوانیں سوڈگے کتگ پرچکہ اے آفیسرانی بندری جاگہ فانینس ءُُ پلاننگ ڈیپارٹمنٹ انت بلئے اشاں بازینے اے وہد ءَ ڈی سی ،اے ڈی سی ءُُ ایڈیشل کمشنر ءِ جاہ ءُُ منصب ءَ کار ءَ انت حالانکہ اشانی پوسٹ ءُُ پوزیشانی حد ءُُ ابیل اے نہ اَنت بلئے چوکہ اے پیسریگیں وزیراعلیٰ ایڈوکیٹ جنرل ،ایم پی اے ، ایم این اے ،سینٹر ءُُ ایندگہ واکداریں مردمانی سیاد ءُُ عزیز ءُُ نزیکیں مردم بوتگ انت پمشکہ اے واکداریں مردماں وتی جندی نپ ءُُ سیت ءَ اے آ فیسراں ڈی سی ،اے ڈی سی ،ایڈیشنل کمشنری ءِ پوسٹانی سرا کتگ ءُُ پہ وت ءَ ہندی، چاگردی، معاشی ءُُ سیاسی نپ ءُُ سیت گپتگ ءُُ دومی دست ءَ بلوچستان ءَ ہمے حقی ایں پوسٹانی امیت وار پہ پوسٹ ءُُ پوزیشنے ءَ چمدار بوتگ انت بلئے حکومت ءَ ہواریں میرٹ ءِ اوگام جنوکیں سیاسی پارٹیانی گوش ءَ مورے ءَ ہم نہ وارتگ کہ اشانی اے پوسٹانی سرا بوہگ ءَ چنچو حق داریں مردمانی حق جنی بوہگان انت ۔اے ایگزیکٹو آفیسرانی ناحقیں وڑے ءَ اے پوسٹانی سرا بوہگ ءِ سرا اولی گشتاں سپریم کورٹ آف پاکستان ءَ سوڈگ کتگ ات ءُُ بلوچستان ءِ پیسریگیں چیف سکیریڑی ءَ را کھڈن کتگ ات کہ اے درائیں آفیسراں پدا فانینس اینڈ پلاننگ ڈیپارٹمنٹ آرگ بہ بیت ۔سپریم کورٹ ءِ سوڈگ ءَ پد چیف سکیریڑی ءَ لہتیں نزوریں آفیسر پدا وتی پوسٹانی سرا آورتگ ات انت۔ بلئے ہما آفیسرانی سیادی کہ صوبہ ءَ مزن سندیں واکداراں گوں ہست ات آ کس ءَ سُرینت نہ کت انت آ اے سوڈگ ءَ پد ہم بازیں ضلعاں ڈی سی ءُُ اے ڈی سی ءِ پوسٹانی سرا نشت انت پرچکہ اے پوسٹانی سرا آ اے ضلعاں وتی سیاد ءُُ عزیزءُُ مزن سندیں واکداراں سیاسی ءُُ معاشی نپ ءُُ سیت پجارینگاں ات انت ۔ اشکنگ ءَ آ وہد ءِ چیف سکیریٹری ءِ اے واہگ ءُُ تماہ بوتگ کہ آ اے درائیں آفیسراں پدا وتی حقی ئیں جاہ ءُُ دواراں بیار ایت بلئے صوبہ ءَ ہستیں مزن سندیں واکدارانی دیم ءَ چیف سکیر یٹری بے وس بوتگ ۔پدا وہدے اے ایگزیکٹیو آفیسراں دسیت کہ صوبہ ءِ برزی سند ءَ اشانی سیاد ءُُ عزیزانی واک ءُُ اختیار ہلاس بوتگ انت ءُُ دومی نیمگ ءَ سپریم کورٹ ءَ یک رندے پدا چیف سیکریٹری بلوچستان ءَ اے بابت ءَ کھڈن کت گڈا اے آفیسراں ہواریءَ بلوچستان ہائی کورٹ ءَ سپریم کورٹ ءِ سوڈگ ءِ حلاپ ءَ پٹیشن داخل کت ءُُ لہتیں وہد ءِ حاترا اسٹے زورگ ءِ جہد کت بلئے چوکہ اے آفیسراں کانودی جوازے نیست پمشکہ بلوچستان ہائی کورٹ ءَ ہم وتی سوڈگ سپریم کورٹ آف پاکستان ءَ حق ءَ دات نوں اے وہد ءَ مستریں گپ ایش انت بلوچستان ہائی کورٹ ءِ سوڈگ ءَ پد باریں نوکیں چیف سیکریٹری بلوچستان صوبہ ءِ مزن سندیں سیاسی ءُُ معاشی اختیار داریں مردمانی سان ءُُ ناس ءَ وت ءَ را چے حدّ ءَ آجو کنت؟ یا چے حدّ ءَ اے آفیسراں بلوچستان ہائی کورٹ ءُُ سپریم کورٹ ءِ سوڈگانی رد ءَ پدا وتی حقی ئیں بہرگاں آرگ ءَ سوبین بیت ۔
