جہا ن ءَ نام ءِ بستار ءُُ کرد ءَ ہرکس زانت ءُُ سرپد انت کہ نام ءَ کس ،کس ءَ کدے بُچّے اوں میان نیار ایت ۔اے نام اِنت کہ دیوان ءَ براہ دار ءُُ تئی شان ءِ سوب انت ۔اگاں نام مہ بیت کس ،دومی پجاہ اوں نیار انت ۔ہمے نام انت کہ بنی آدم ءَ را مروچی یک زبانے بکشاتگے اگاں نام ایرکنگ ءِ دود ہما وہداں بنی آدم ءِ پگر ءَ میایتکیں داں روچ مرچی ما گنگدامانی ڈول ءَ زندگی کنگ ءَ بوتگ اِت انت ۔آ پیسرا وڑ وڑیں چیزانی نام پر کت ،وہدے ایشانی کچ ءُُ کیل گیش بوت انت کہ داں وتی جند ءِ نام پری کنگ ایشانی بندات کت ،وہد ے جنگ ءُُ مڑ یاکہ وئیلاں ایشانی گپت داں ایشان پہ انچیں نامے شوہاز کت کہ آہانی درائیں جنجالانی گیشوار کت بہ کنت ،اے ڈول ءَ آہاں وڑ وڑیں نیکراہ حداہانی نام جوڑ کت ،چیزانی نام انچو باز بوت اَنت آہانی نوں ایوک ءَ لبزاں کار نہ دات پمشکا آہاں ایشانی رد جوڑ کنگ بندات کت ءُُ گڈی ءَ زبان جوڑ کت ۔اے بنی آدم ءِ عہدی زندمان ءِ یک کسانیں چیدگے اَت کہ گوں نام ءَ بندوک اَت ۔
نام تئی بہ بیت یا کہ منی نام اِنت ،بلئے نامانی تہا پرک ءُُ جتائی اوں است انت ،نام انچائیں نام بنت کہ کس آہاں نزانت ءُُ مان نیار ایت ،باز کارزوالیں نام بنت کہ کس ایشانی نام ءَ گرگ نلوٹیت ،نام تمردءُُ زورآوریں نام بنت کس آہانی ناماں گپت نہ کنت ،بازیں انچیں اوں نام است انت چیر اندر اَنت بلئے درائیں چیز ہمانی دست ءَ اَنت ، باز انچیں نام اوں است انت کہ درائیں جہان چہ آ ناماں آشکار ءُُ زانتکا ر اِنت آ نامداریں نامانی لڑ ءَ کائینت ،چنائی ءَ جہان ءِ درائیں مردم ہمے نام ءِ تلب گار اَنت کہ ہرکس چہ ہمے نام ءَ زانگ کار بہ بیت،وہدے درائیں مردم چہ ہمے نام ءَ زانتکار ءُُ شیوار بنت داں آ نام وتی تہا انچو مزن شان بیت کہ آئیءِ دل ءَ کفر ودی بوہگ ءِ گمان ردوم زوریت آئی ءِ دل ءَ آئیءِ نام ءَ چہ مستریں ءُُ برزتریں نام جہان ءَ دومی کسی نہ انت آ بے حال بیت کہ ہما نام ءَ کہ اے درائیں دنیا ءُ ہفت تبکیں آزمان ءُُ زمین جوڑ کرتگان آئیءِ نام جہان ءِ مستریں نام اِنت ۔ بلئے آئی ءَ ایشیءِ اوں سُدساری نیست انت ۔نامانی بازی ءُُ زور ءُُ نزوری ءِ گپ اے حاتر ءَ پر ارزشت انت کہ بیدئے نام بنی آدم زندگ اوں بوت نہ کنت۔ہمک مردم ءِ اولی ءُُ مستریں واہش انت کہ جہان ءَ آئیءِ اوں نامے بہ بیت آ تری کجام ہم رنگے ءَ بہ بیت بلئے آئیءِ نام الم است بہ بیت ۔پہ شَرّی یاکہ شِرّی بلئے آئیءِ نام الم ءَ جہان گول بہ بیت ۔اے واہش بنی آدم ءِ رگ ءُُ ریشگاں انچو کماتگ انچوکہ زند ءَ را مرگ،انچووشی ءَ را گم ،انچوشپ ءَ را روچ،انچواستی ءَ را ساہگ ،اے واہش مئے ہوناں ہوار انت کہ ہچ پیم ءَ درکنگ نہ بیت۔نامے ءِ رردوم ءِ بابت ءَ ہمے گشگ بیت کہ یک نامے کہ پیسر ءَ تئی مات ءُُ پت زا ن اَنت ،رند ءَ تئی سرجمیں کہول ءُُ خاندان تئی نام ءَ چہ آشنا بنت ،چیزے وہد ءَ رند ءَ تیوگیں بازار چہ ہمے نام ءَ آشنا بیت کہ بازار ءَ نوکیں نامے ءِ گیشی بوتگ وہدے دربرجاہ ءُُ وانگجاہاں روگی بئے گڈاں بازار ءَ چہ ڈن دومی میتگ ءُُ بازار ءِ مردم چہ ہمے نام ءَ آشنا ءُُ زانتکار بنت کہ ہلک نوکیں نامے ودی بوتگ، وہدے کالج ءُُ یونیورسٹی ءَ سر بئے داں وتی نام ءِ یک پجارے ءِ ودی کنگ ءِ جہد ءَ گوں گلائیش بئے ہمے گلائیشی ءَ بازیں نام سوبمند بیت ءُُ ہرکس چہ ہمے نام ءَ زانتکار بیت ءُُ چارجہان ءَ ہمے نام پروشیت ،ءُُ باز نام وتی نام ءِ رودم دئیگ ءَ بے سوب بیت ءُُ آ امروز ءِ دنزاں انچو گار ءُُ بیگواہ بنت کہ دپترانی تاکاں اوں آ نام ہوار کنگ نہ بنت ۔ایوک ءَ بلوچی ءَ نا بلکیں سرجمیں دنیا ءَ بلکیں سرجمین بنی آدمی پگرءُُ شعور ءَ اے گپ بندوک انت کہ نام ءِ ودی کنگ انچوکیں مزنیں کارے نہ اِنت ہرکس جہد ءُُ جفا ءَ رند یک نامے پہ ودی کت کنت کہ ہرکس چہ آ نام ءَ زانتکار بہ بیت بلئے اسل جیڑگ ہمے نام ءِ داں عمر ،داں استیں ءُُ سرجمیں زند ءَ یکوڑ ءَ دارگ انت ۔چشیں نام سک کم گندگ بیت کہ آہاں وتی نام داں عمر یکوڑ داشتگ ءُُ زند آسر کتگ ،من وت وتی جند ءِ ذات ءَ چشیں ہزاراں نام زاناں کہ ،نام ءِ بزر شانی ءَ رند ءَ آہاں وتی بستار شموگار کتگ ءُُ وتی نام ءِ پشت ءَ انچو پہر بستگ کہ بید چہ آہاں دگہ ماتانی چکاں نام پر نیست گشئے ۔۔۔۔۔۔ بلئے چشیں نام زوت گار بنت ،رسوا بنت ،انچو ھالجت ءُُ کوچرا بنت کہ دمپرا چشیں گوہ نہ ورانت کہ جہا ن ءَ ایوک ءَ ہماہانی نام است انت بس۔ بلئے چش نہ انت دنیا ءَ ایوک ءَ ہما نام است بنت کہ آ مدام وتی نام ءِ پہازگ ءَ جہد کن اَنت چشیں ہچ وڑیں کرد ءُُ کارے نہ کن اَنت کہ چراہی ءَ آئی ءِ نام سبک بہ بیت آ وتی نام ءَ چوکیں نوک کشیں ڈگار ے ءَ کد ءُُ حاک کن اَنت دانکہ آئیءِ برور سرسبز ءُُ بن اِش بَز بہ بیت ۔ہمے جہدانی گوماں آ وتی زند ءَ آسر کنگ لوٹاں گڈان چشیں مردمانی نام آہانی زند ءَ وَ است بنت بلئے پد چہ زند ءَ اوں چشیں نام ابدمان ءُُ نمیران بنت ۔نامانی کسہ انگت دراج انت پرچکہ ہمک مزنیں نام یک وہدے کسان بوتگ،ہمک نامداریں نام یک وہدے کس مہ زانت بوتگ ،ہمک درپشوکیں نام ،یک وہدے تہار ی ءِ آماچ بوتگ بلئے ہمے جہد ءُُ محنت انت کہ کسانیں ،کس مہ زانتیں ءُُ تہاری ءِ آماچیں ناماں ،مزن،درپشوک ءُُ نامدار کنت ۔
