گواستگیں دوئیں ماہاں راج دوستیں سروک ءُُ پارلیمنٹ ءِ باسک ءُُ ممبراں ہمے جہد کتگ اَت کہ اوگان مہاجرانی بلوچستان ءَ استی ءَ آ مردم شماری ءَ قبول نہ کن انت بلئے اے درائیں گپ پوک بوتگ اَنت پرچکہ مردم شماری ءِ بند ءُُ بوج جوانیں رنگے ءَ سرکار ءَ اڈ داتگ اَت ءُُ ایشیءِ بندات اوں کنگ بوتگ آوکیں چندیں روچانی تہا ھلاس بیت ۔راج دوستیں گلانی ہمے لوٹ اَت کہ اگاں اوگان مہاجرانی بلوچستان ءَ استی ءَ مردم شماری بوت داں آہانی حق جنی بیت ءُُ اوگان چشکہ بلوچستان ءِ سر شہرءَ چہ بلوچاں گیش اَنتءُُ نوں درائیں مردماں وتی لوکل اوں جوڑ کتگ اَنت نادراہ ءِ دفتر ءَ وتی پجار کارڈ بزاں شناختی کارڈ اوں اڈ داتگ اَنت بازیں مردماں پہ وت ءَ اے ہند ءَ جاہ ءُُ مکام بہا زرتگ باز کاروبار ءَ گلائیش انت باز ءِ چک ءُُ کہول ہمے ہند ءِ وانگجاہاں وانگ ءَ اَنت ،نوں آہاں بلوچستان ءِ سرشہر( کوئٹہ) سرجم ءَ وتی کتگ ۔اے اوں کسی دیم ءَ چیر اندر نہ انت کہ بلوچستان ءِ درائیں مزن اگدگ اوں ہماہانی دست ءَ اَنت آتری کجام اوں کدگ بہ بیت مزن اگدگ(key post) ہماہانی دست ءَ اَنت ۔ اے ایوک ءَ بلوچستان ءِ سرشہر( کوئٹہ) ءَ نہ انت بلکیں سرجمیں بلوچستان ءِ ہمے جاور اَنت ۔پرچکہ اوگانانی جنگ ءُُ جُڑ ءِ وہد ءَ پاکستان ءَ وتی مدتی در پچ کت اَنت گڈا ں آ ایوک ءَ بلوچستان ءِ در بوتگ بزاں درائیں اوگان مہاجر بلوچستان ءَ جاہ مہ نند بہ بنت ۔ہمے جاہ منندی مرچی انچو باز انت کہ بلوچ وتی جند ءِ ہلک ءَ درامد انت ءُُ نوں کہ اے مردم شماری بوت گڈاں بلوچ چد ءُُ بزگ تر ءُُ وتی حق ءُُ مُزاں چہ زبہر بیت ۔پداں ہما پٹھا ن کہ بلوچستا ن ءُُ پاکستان ءِ جند ءِ جاہ مہ ننند اَنت آ اوں چہ اوگاناں وش نہ انت پرچکہ آ ایشانی اوں حق جنی ءَ کنگ ءَ انت ۔بلوچستان ءَ بیروزگاری ءِ کچ ءُُ کیل چہ پاکستان ءِ اے دگہ صوبہاں دوسر گیش انت بلئے ہردے کہ نوکری ءِ جارے شنگ کنگ بیت داں آئی ءِ فارم جمع کنوکانی تہا ہپتاد درسد ہمے اوگان اَنت کہ آہاں پہ وت ہمے ہند ءِ لوکل ءُُ شناختی کارڈ جوڑ کتگ ءُُ نوں کس آہاں ہچی کت نہ کنت ۔پاکستان دنیا ءِ اولی ءُُ آخری ملک بیت کہ گواستگیں پانزدہ سالاں آہودگ پہکیں مردم شماری نہ بوتگ ءُُ آئی ءَ را وتی پہکیں مردمانی کچ ءُُ کیل مالوم نہ انت ۔ اے وت یک اجکہی حبرے بلئے نوں کہ اے مردم شماری بہ بیت داں گیشتر تاوان بلوچ قوم را رسیت کہ دائم رسگ ءَ انت ۔راج دوست ءُُ پارلیمنٹ ءِ باسک ءُُ ممبرانی ہمک روچ روتاک ءُُ نیور چینلاں جار اش کنگ ءَ کائینت کہ ’’ بلوچ قوم کی بقا حقوق کے حق میں مردم شماری ان حالات میں قبول نہیں ہوگی ‘‘ بلئے ما درستاں دیستگ کہ سرکاری مردماں ایشانی گپ ءَ ہچ ارزشت نہ دات ءُُ ایشانی گپ ہشکیں گپے بوت ۔مردم شماری ءِ روچانی نزیکی ءَ بلوچستان رڈالرٹ کنگ بوتگ کہ جاور اے دور ءَ سک ناگیگ بوتگ انت ،ہمک روچ تراک ءُُ مردمانی جنگ ءُُ کشگ بوتگ ۔اے یک سکیں دورے اَت کہ روان بوت۔بلوچستان ءَ مردم شماری ءِ ہما کہ مسترین تاوان انت کہ آ ایش انت بلوچ ءَ را بلوچستان ءِ تہا کم گشی کنگ بیت بزاں بلوچستان ءِ تہا بلوچ کم ءُُ ایندگہ قوم ءِ مردم گیش بنت پرچکہ نوں اوگان مہاجرانی کچ ءُُ کیل چہ لکھ ءَ گواستگ ءُُ کروڑان سر انت اے کروڑانی اگاں بجٹ ءِ تہا بہر مان کنگ بہ بیت داں پہ بلوچاں حاک پہ سر بچ ایت انچو کہ پاکستان ءِ بجٹ وت پیسر خسارہ ءِ تہاانت آئی ءِ بجٹ ءِ گیشتریں بہرے عسکری گلاں دئیگ بیت نوں اگاں اوگان ہوار بہ بنت داں بجٹ ءَ چے سر کیت ۔پمشکا یک مسترین تاوانے ہمیش انت ۔ دومی مئے ہند ءِ درائیں کاروبار چشکہ پیسر ہمے اوگان مہاجرانی دست ءَ انت اگاں مردم شماری بوت داں اے سرجمی ءَ نوں اے ہند ءُُ جاگہانی واجہ بنت ءُُ پہ بلوچ ءُُ بلوچستان ءِ اسل جاہ مہ ننندانی بحت ءَ ہچی نیت انت ۔
مردم شماری انچو کہ پیسر ءَ گشگ بوتگ اَت کہ گواستگیں پانزدہ ،شانزدہ سال انت کہ نہ بوتگ بلئے میان ءَ پاکستان ءُُ حاس بلوچستان ءَ بازیں چنت وئیل ءُُ ناشرکاری بوتگ اِدا چنچو مردم جنگ ءُُ کشگ بوتگ،اِد چنچو مردم انگت ءَ گار ءُُ بیگواہ اَنت ،چنچو مردم دراں ڈیہہ کنگ بوتگ اَنت یاکہ شتگ اَنت اے درائیں مردمانی کچ ءُُ کیل چنکس بوتگ ایشی ءِ حساب نسیت انت ،دومی ہما مردم کہ ہمے ناشرکا ری ءُُ وئیل کاریانی ترس ءَ چہ وتی جند ءَ ہنداں لڈ ءُُ بار اِش کتگ ءُُ دومی ہنداں شتگ اَنت آہانی حساب داد اوں نیست انت اے حساب ءَ بلوچستانءَ مردم شماری ءِ کنگ منی دل ءَ وت یک زلمے ءَ شمار بیت اگاں جوان چارگ بہ بیت ۔بلوچستان ءِ راجی سروک سردار اختر مینگل ءَ چہ مردم شماری ءِ بوہگ ءَ چنداں ماہ پیشتر وتی گشتانک ءُُ دیواناں ایشی ءَ حلاپ کتگ اآئی ءِ گشگ ہمے بوتگ کہ دانکہ اوگان مہاجر بلوچستان ءِ تہا جاہ مہ نند اَنت مردم کنگ مہ بیت ءُُ وہدے اے اوگان وتی جند ءِ ہنداں ءُُ جاہاں راہ دئیگ بہ بنت گڈاں پہکیں مردم شماری یے بوت کنت ءُُ بلوچستان ءِ اصل آباد تی ءِ کچ ءُُ کیل زانگ بیت ۔اے بابت ءَ نوازشریف ءِ حکومت ءَ یک وارے گامگیجے زرتگ ءُُ چیزے اوگان مہاجر چہ پاکستان ءَ درکت اَنت بلئے زوت آئی ءَ وتی دست داشتاں پرچکہ آئی ءِ جند ءِ ذاتی مفاد آجاہ بند بوہگ ءَ اِت انت اوگان باڈر بند کنگ بوت ،اوگاناں وتی ابیلانی در پہ پاکستان ءَ بند کت اَنت چمشکہ پاکستان حکومت ءَ وتی گام چمودا داشتاں اگاں چہ ہمک روچی ھالتاکاں بیان جاری کنگ بوہگ ءَ انت کہ اوگان مہاجر چہ پاکستان ءَ درکنگ ءُُ وتی ہنداں روان دئیگس بوہگ اَنت بلئے ہرکس زانت کہ نوں ایشانی چہ ملک ءَ درکنگ یک نہ بوتگیں گپے ءُُ مردم شماری ءِ پرے زوتاں کنگ ایشیءِ مستریں شاہدی اِنت۔
