شماریات ءِ بہرگ ءَ اے جار جتگ ات کہ ۱۵ مارچ ءَ مردم شماری کنگ بیت بلئے دومی نیمگ ءَ بلوچستان ءَ افغان مہاجرنیانی جاہ منندی ءُُ بلوچ راجکاری گلانی گشگ ءِ ردا بلوچستان ءِ بازیں دمگ ءَ آپریشن ءَ ملک ءِ تہ ءَ لڈ ءُُ بار کنوکیں مردمانی سوب ءَ بلوچ راج ءِ مردم شماری ءَ جوانین حساب ءُُ شمار ءِ نہ بوھگ ءِ ترس ءَ بلوچ راجکاری گل ،چاگردی گل ،سوجگری گل ءُُ شہ زانتاں اے گمان پدرا کتگ ات کہ بلوچ راج اے مردم شماری ءَ بلوچستان ءِ ایندگہ راجاں کم پیشدارگ بوت کنت ۔بلوچ شہ زانتانی لیکہ ایش ات کہ اے جاوراں بائدیں مردم شماری مہتل دارگ بہ بیت تنکہ بلوچ دمگاں لڈ ءُُ بار کنوکیں مردم پدا وتی حقی ئیں جاہ ءُُ دواراں آباد ءُُ جاہ منند بہ بنت ءُُ دومی چوکہ افغان حکومت نوں افغان مہاجراں وتی ملک افغانستان ءَ برگ ءُُ جاہ منند کنگ ءِ کار ءَ انت پمیشکہ افغانستان ءِ حکومت ءَ را اے موہ دئیگ بہ بیت کہ آ وتی دست ءَ وار بکنت ءُُ افغان مہاجراں وتی ملک ءَ بلوٹ ایت ۔اے درچ ءَ افغانستان ءِ حکومت ءَ یک رندے چہ پاکستان ءِ بنجاہی حکومت ءَ لوٹ کتگ ات کہ آئی ءِ ملک ءِ درائیں مردماں کہ پاکستان ءَ مہاجر گشگ بنت افغانسان ءَ دیم دئیگ بہ بیت ءُُ آ ہانی گشگ ات کہ افغانستان اے درائیں مردماں وش اتک کنت افغانستان ءِ حکومت ءِ گشگ ات کہ نوں چوکہ افغانستان ءَ ایمنی برجاہ انت بائدیں افغان دگہ ملکے ءِ دست ءَ لیبوک بوہگ ءَ بدل ءَ افغانستان ءَ بیا انت ءُُ ملک ءِ دیمروئی ءَ افغان مہلوک ءِ دست ءَ سبک بکن انت ۔اے درچ ءَ افغان حکومت ءَ شربت گلہ ءِ ماں افغانستان ءَ روگ ءُُ جاہ منند بوہگ ءَ ہنچو وش اتک کت کہ آئی ءِ حاترا افغان صدارتی محل ءَ یک مراگشے برجم داشت ۔اے ہمے شربت گلہ ءَ ات کہ آئی ءِ اکسے یک یورپی اکس گرے ءَ چہ نادراہ سی ءِ ریکارڈ ءَ دسیتگ ات ءُُ گشتگ ات کہ اے ہما جنک انت کہ ۳۰ سال ءَ پیش آئی ءَِ اکس آئی ءَ افغان مہاجر کیمپے ءَ کش اِتگ ات وہدیکہ نوں سے سال ءَ رند اے جنک ءَ نوں پاکستانی شناختی کارڈ دئیگ بوتگ ۔چرے حال ءَ نادرا ءِ مزنیں رسوائی یے بوتگ ات بلئے افغان حکومت ءَ شربت گلہ ءِ وش آتکی مراگش ءَ گشتگ ات کہ آ درائیں افغاناں ہمے وڑا وش آہت کن انت بازیں شہ زانتانی گشگ ہمیش انت کہ چرے گپ ءَ پد پاکستان ءِ واکدارانی ترس ہمیش انت کہ نوں زوت افغان حکومت پاکستان ءَ مجبور کنت کہ آئی ءِ ملکی مردماں ماں پاکستان ءَ دیراں دارگ مہ بیت بلئے چد و پیش زاہر انت واکدار یک تیرے سے (۳)شکار کنگ لوٹ انت اگاں ناں !بلوچ راج دوستانی گمان ءِ ردا مردم شماری ۲۰ سال دارگ بوتگ اگاں دگہ ۲ سال ءَ دارگ بوت انت، حونے چہ آزمان ءَ نہ ریتکگ اَت بلئے شہ زانتانی لیکہ ایش انت کہ واکداراں ترس ایت کہ اگاں افغان پدا افغانستان ءَ شت انت ءُُ دیم ءِ مردم شماری ءَ بلوچستان ءَ مردمانی حساب چیر ءُُ سر کنگ نہ بوت گڈا’’ سی پیک‘‘ جیڑہ بلکیں چد وگیش مانبگش ایت ۔اے درائیں زیدءَ مردم شماری ءِ بنداتی ءِ جار ءِ وہد ءَ بلوچ راجکاری گلاں مزنیں جاک ءُُ سلواتے کت کہ آ بنجاہیں حکومت ءَ مجبور کن انت مردم شماری ءَ بدار ایت، چوکہ بنجاہی حکومت ءَ تپنگ سپریم کورٹ ءِ کوپگ ءَ ایر کتگ ات پمشکہ بلوچ راج دوستیں گلانی بانزل اودا سر بوہگ ءَ سوتک انت البت آہاں وتی کارنداں رازی ءُُ وش کنگ ءِ حاترا اوگام جت ،حالتاکاں تران کاری کت ءُُ یکے دو ءَ پٹیشن دائر کت ۔نوں اے وہد ءَ وہدے مردم شماری دیم ءَ جنزگان انت بلوچ راج دوستیں گلاں وتی اے گپ بازا نت کہ ما وتی جہد ءُُ کوشست کت چیزے کہ حدا ءَ نہ کنگی انت ،آ وا نہ بیت پمشکہ ما ہم گشیں کہ بلوچ راج دوست راست گش انت اے بیچارگاں وتی جہد کت انت حکومت زوراک انت پدا سنگ ءُُ سر میڑینگی چیز نہ انت بلئے اشانی کارندہ بائدیں اشاں جست بکن انت کہ بلوچ میارءَ مردم ءِ رپینگ ءُُ دگا دئیگ ’’کنگی ‘‘کار اَنت؟؟
