اے وڑیں حال ہمروچ حالتاکاں شنگ بنت کہ کار ءُُ روزگار ءَ مردماں دارگ ءِ وہد ءَ ناروائی کنگ بوتگ ۔روزگار ءِ دروسیلہانی سرا وزیر ءُُ مزن مزنیں آفسر نشتگ انت کہ آ نزور ءُُ ناتوانیں مردماں داں جوانیں روزگاراں سر بوہگ ءَ نیل انت اے کارانی تہا ہندی سردار ءُُ نواب ءُُ میر ءُُ متبرانی ہم مزنیں دستے ہوار کہ آہانی سیادی گوں ہمے راجکاری گلاں انت کہ ہمے وزیر ءُُ گزیر ءُُ واکدار آفیسرانی دست ءَ انت ۔بلوچستان ءَ جاور حال اے وہد ءَ ایش انت کہ واکداریں مردم یا وَ روزگار ءَ بہا کن انت وتی سیاد ءُُ عزیزاں دئینت اِش نوں اے زنگاں وت ہمے گلانی کار ندہ ( ورکر) ہم جن انت ۔حالتاک چہ چشیں حال ءُُ شکایاتاں چکار انت بلئے اے شکایاتانی گوشداروک نیست ۔انوگیں حبرے کہ صوبائی اسمبلی ءِ اجلاس ءَ یک اسمبلی باسکے ءَ اے گمان زاہر کتگ کہ دمگی حکومت ءِ نیمگ ءَ پُر ارزشتیں نوکری قرعہ اندازی ءِ گوما بہر ءُُ بانگ کنگ بوتگ انت ۔اے گمان تنی وہدءَ کس ءَ انکاری بیان دیم ءَ نیاورتگ۔ استیں وزیر ءَ دومی مجلس ءَ وتی نزانتکاری درشان کتگ ءُُ گشتگ کہ ایشیءِ سرا پولکاری کنائینگ بیت۔ اسل ءَ درائیں جیڑگ حق ءُُ انساپ ئیگ انت ءُُ حکومت ءُُ کانود ءِ مستریں ذمہ دار انت کہ آ ہمائی کہ حق انت روز ءَ ہمائی ءَ بدنت ۔بلے ہمے گند گ ءَ کیت کہ میرٹ ءِ مپت ءَ نام گرگ بیت بلئے ایشیءِ اسل مول ءُُ مراد ہمیش انت کہ وتی مردم زورگار کنگ بہ بنت ءُُ ہمائی ءِ کہ حق انت آ دئیگ مہ بیت ۔بلوچستان ءِ کانود ءَ است انت کہ روزگاری میرٹ ءِ حساب ءَ کنگ بہ بنت ۔اے کانود ہمے ھاترا جوڑ کنگ بوتگ انت کہ بلوچستان ءِ لہتیں دمگاں ابید اے دگہ درائیں دمگ پسماندگ انت ءُُ ہماآنی حق ءُُ مُز جنی ءِ رکینگ ءَ درائیں دمگاں اے کانود ایر کنگ بوتگ ۔بلئے گندگ ءَ ہمے کیت کہ زردار ءُُ توانیں مردم وتی مردمانی دلانی وش کنگ ءِ ھاترا میرٹ ءِ ڈرامہ ءَ کن انت۔سرجمیں ملک ءَ بلوچانی حق ءُُ مُزانی دیمداری کنوک کس نیست پمشکہ گوں بلوچاں مدام بے رہبندی بوہگ ءَ انت ۔سرجمیں ملک بلوچانی حق جنی ءَ مشگل انت ءُُ انتظامی مشینری ءَ بلوچاں بے بہر کنگ لوٹ انت ۔اے گپ ءِ سرا بلوچستان ءِ بلوچ رہشونانی ہاترا یک جیڑگے گپے کہ بلوچستان ءَ روچ پہ روچ ردی زبانانی مردم پیداک ءُُ حکمرانی کنگان انت ۔ہمے رہبند ءَ را میرٹ ءِ نام دئیگ بوہگ ءَ انت ءُُ ہمیشی ءِ پشت ءَ درائیں کار ہرابی بوہگ ءَ انت بلوچستان ءِ مزن شاہدرجاہ ءَ داخلہ زورگ ءَ ہم ہمے میرٹ ءِ نام بلوچ نودربر داخلہ دئیگ نہ بوہگ ءَ انت دانکہ آ وانگ ءُُ زانگ ءِ راہ ءَ کس اتک مہ کنت گوں ۔مئے گوں حکومت ءَ دست بندی انت کہ آئی ٹی یونیورسٹی ءَ تربت ءَ پچ بہ کنت پرچکہ ایشیءِ اسل حقدار مکران ءِ مردم انت ،خاران ءُُ اے دگہ ہندانی مردم کوئٹہ ءُُ کش ءُُ کر ءِ وانینگ بوت کن اَنت بلئے مکران چداں سک دور انت ۔بلئے بلوچ اداں اوں پد منتگ کنگ بوہگ ءَ انت ہمے رنگ ءَ بلوچ چہ زورگار ی ءَ اوں زبہر کنگ بوہ گءَ انت چشیں مردم نہ ایوک ءَ چہ آہانی اگدگاں پچ گرگ بہ بنت بلکیں دستگیرا اوں کنگ بہ بنت ۔گوستگیں سالاں ۱۴۰۰ ءَ گیش دری مردم کوئٹہ ءَ روزگار دئیگ بوتگ انت اگاں چہ ایشیءِ اسل حق دار ہمود ءِ مردم بوتگ انت ہمے رنگ ءَ سیاسی کارندہانی بھرتی اوں ہمے رنگ ءَ وتی مردم گچین کنگ بوتگ انت ۔بائدیں چشیں کرپٹ ءُُ دونمبریں مردم ایرجیگ کنگ بہ بنت ءُُ چیف سکیرٹری کڈن کنگ بہ بیت کہ آ حقدار ءِ حق جنی ءَ مہ کن انت ۔اے کار ءَ سروزیر وتی چیر دستی ءَ بہ کنت ۔
