مکران ءِ دمگ کیچ وتی زمینی ،راجدپتری ءُُ مچ ءُُ مچگدگی ءِ پیداکی ءَ سک نامدار انت ۔مکران ءِ اے دگہ دمگانی حساب ءَ چہ گیشتر وانندگ ترا نت ۔ہمے سوب انت کہ ہائرایجوکیشن کمیشن ءَ ۲۰۰۹ ءَ بلوچستان مزن شاہ در بر ءِ سب کیمپس جوڑکرت کہ ۲۰۱۳ ءَ اے ودینگ ءُُ سرجم ءَ یک جتائیں یونیورسٹی ءِ درجگ ءَ سر کنگ بوت۔ بنداتی وہد ءَ پروفیسر ڈاکٹر رزاق صابر کہ اے یونیورسٹی ءِ اولی وائس چانسلر ءُُ ڈاکٹر عبدالصبور بلوچ پرووائس چانسلر ءِ اگدگ دئیگ بوت انت ۔ہر دو اگدہ داراں وتی زانت ءُُ زانتکاری ءَ وانگ ءُُ زانگ ءُُ شاہ در برجاہ ءِ دیمروئی ءَ شپ ءُُ روچ کار کت ۔اے گپ ءَ ہچ گمان نیست کہ اولی روچ ءَ بگر داں انوگیں روچ مزن شاہ در برجاہ ءِ اگدہ دار وتی کارا ں یک شل ءَ گلائش انت ءُُ پاکستان ءِ گچین یونیورسٹیانی لڑ ءَ وتی نام ہوار کتگ ۔اے درگت ءَ بلوچستان ءِ گورنر محمد اچکرزئی ءُُ گوستگیں سر وزیر عبد المالک بلوچ ءَ ایشی ءِ ماڑی ءِ جوڑ کنگ ءَ وتی کمک ءُُ مدت ءِ درشانی کت ءُُ اے کار نوکیں سر وزیر ثنا اللہ زہری ءِ پاگواہی ءَ ماڑی ءِ کار نیم ءَ سر کنگ بوتگ ءُُ انگت کار جاری اِنت ۔تربت یونیورسٹی ءِ جہد آئی ءِ گوں اے دگہ یونیورسٹیاں چہ گیش دیم ءَ روگ انت ءُُ ایشی ءِ درائیں کار گوں میرٹ ءَ بوہگ ءَ انت ۔حکومت بلوچستان ءَ ایشیءِ مالی جیڑگانی گیشواری ءُُ ایندگہ کارانی تہا وتی کرد پیلو کتگ اَنت۔یونیورسٹی ءِ اگدہ دارانی جہد ءُُ کوشتتانی پداں سے ءُُ نیم سال ءِ گونڈیں مد ت ءَ یونیورسٹی ءَ مزنیں گام بری یے کتگ ۔وہدے اے یونیورسٹی پچ وبت اد ءَ چار پروگرام گوں ۲۰ استاد ءُُ ۱۵۰ نودربرانی ہواری ءَ بندات کنگ بوت بلئے نوں اے یونیورسٹی ءَ نوہ ڈیپارٹمنٹ ۱۸ پروگرامانی سرا کار بوہگ انت ابید چہ ایشیءَ ایم فل ءُُ پی ایچ ڈی ءِ کار اوں بوہگ ءَ انت ۔نوں استادانی کچ ۱۰۰ ءُُ نودربرانی کچ ءُُ کیل یازدہ سد ءَ برز انت ۔نوکیں ماڑی ءِ کار ہشتاد در سد سرجم کنگ بوتگ اے اوں یک ریکارڈی کاری انوں داں یونیورسٹی ءَ وتی یازدہ نودربر پہ ایم فل ءُُ پی ایچ ڈی ءَ ڈنی ملکاں روان داتگ انت ءُُ بازیں دیم دئیگ ءَ چار ءُُ بچار کنگ بوہگ ءَ انت ۔
یونیورسٹی ءَ وانگ ءُُ زانگی کاراں ابید دود ءُُ ربیدگی،گشتانکی دیگی مراگش ،ٹریننگ ،ءُُ کتب میلہ ءِ کار اوں ہمک سال کنائینگ بوہگ ءَ انت ۔ ہمے کارپدانی پشدر ءَ ہائر ایجوکیشن ءَ اے کم وہدءِ تہا ۲۰۱۴ ءَ یونیورسٹی آف تربت ءَ را کل وقتی یونیورسٹی ءِ درجگ ءُُ وتی جند ءِ ڈگری جاری ءِ کنگ ءِ اجازت اوں داتگ ۔ ہمے سالاں یونیورسٹی ءَ پاکستان حکومت ءِ واہش ءِ پداں گوادر ءَ وتی سب کیمپس اوں پچ کتگ ات کہ جنوری ۲۰۱۷ ءَ داں چار پروگرام بی ایس،بی اے ،بی ایڈ آنزر ءُُ بی کام ءِ وانگی کنائینت ایت ۔ابید چہ ایشیءَ ہمے کیمپس ءَ چائینیز زبان ،عربک ءُُ انگلش زبانانی کلاسانی اوں بندو بوج ءَ کنگ ءَ انت ۔ابید چہ ایشیءَ پہ گوادر ءَ جتا یونیورسٹی یے جوڑ کنگ ءِ ہاترا ءَ پی سی ونے جوڑ کنگ بوہگان انت ۔ دانکہ ہمود ءِ ورنا جوانی ءَ وانت بہ کن اَنت۔
یونیورسٹی آف تربت ءَ اولی کانووکیشن ءِ مراگش ءَ گوں دیمروئی ءِ یک نوکیں راہے گیشوار بوت پرچکہ یک شریں وانگجاہے وتی بنداتی وہداں کانووکیشن کنائینت چہ یونیورسٹی ءَ گمان دوسد ءَ برز فارغ بوتگیں نودربرانی ڈگری دئیگ ءِ یک پرمڑائیں مراگشے ءِ جم دارگ پہ نوکیں یونیورسٹی ءَ پہری گپے زانگ بیت ۔اے مراگش ءَ گورنر محمداچکرزئی ءُُ بلوچستان یونیورسٹی ءِ درائیں استاد ءُُ چانسلر اوں اے دیوان ءَ ساڑی بوتگ اَنت ۔کانووکیشن ءِ روچ ءَ تربت یونیورسٹی ءِ اولی ءُُ بنکی کارانی تہا چد ءُُ شرتر کار ءُُ نوک نوکیں ڈیپارٹمنٹ ءُُ پروگرامانی نیمگ ءَ گامبری اِنت ۔ایشانی تہا سائنسی پروگرام اول سرا ارزشت دئیگ بنت۔ہمے پروگرامانی تہا کمپیوٹر ءُُ بیگاہ ءِ وہداں انٹرپری نیور شپ سرٹیفکیٹ کورس ءِ پروگرام ہم کنائینگ بنگ کہ اے پہ دفتری مردمانی ھاتر ا بیت ۔ ہمے رنگ ءَ انوں ایوک ءَ بلوچی ڈیمپارٹمنٹ ءَ ایم فل کنائینگ بوہگ ءَ انت ءُُ آیوکیں وہد ءَ کیمسٹری ءَ ہم ایم فل کنائینگ بیت ۔جاورانی حراب ءُُ ترابی ءَ ابید ہم یونیورسٹی آف تربت ءَ وتی وانگ ءُُ وانینگ ءِ کار برجم داشتگ ءُُ اے ہند ءُُ دمگاں وانگ ءُُ زانگ ءِ ردومی ءَ وتی کرد ءَ پیلو ءَ کنگ ءَ انت ۔اے دگہ یونیورسٹیانی ڈول ءَ تربت یونیورسٹی ءَ ہم ورکشاپ ،ٹریننگ ،لیپ ٹاپ اسکیم ، فیس ریفنڈ ءُُ اے دگہ درائیں کمک ءُُ مدت کہ مزن وزیر ءَ جاری کرتگ اَنت رستگ انت ءُُ آ وتی وائس چانسلر ءِ رہشونی ءَ ہمے ڈول ءَ دیمروئی کنان کنت ءُُ راج ءُُ قوم ءِ ھاترا ءَ نوکیں دہرے ءِ شوہاز ءَ گام جنان ءُُ دیم ءَ روان کنت ۔ ہمے وانگ ءُُ وانگ کہ گوستگیں عہد ءُُ باریگ ءَ بلوچستان ءِ اے بہرگ بزاں مکران ءِ گریب ءُُ بزگراں نہ رستگ انت ءُُ اے ادارگ انچوش کہ دیمروئی کنان کنت داں بلوچستان ءِ نندوکیں بلوچاں حاص مکران ءِ مردماں دگہ نیمگے سر دئیگ ءِ حاجت نہ بیت۔
