ادا ڈگارانی تہا سبزگ ءُُ گلزاریں ندارگ گندگ ءَ اھت بلئے زند گواستیں عہد ءِ رنگ ءَ ات ہما ہاک ءِ پرشتگیں ءُُ کسانیں گس ہرکسی لنٹ ہشک بزگ ءُُ ملورات ۔

اے جاہاں یکے ءَ لنٹانی سرا بچکند ءَ نہ دیست بلوچ زالبولانی گد ءُُ پچ ہما گوستیں ءُُ کہنیں زمانگ ءِ دوچ ات انت دیم تہا ر انت گشئے زانہ چہ ہزار سالی ءِ ڈوکالاں ءَ گوازگ انت ۔
ملک ءُُ ڈگارانی مردین ءُُ زالبول ھوری ءَ کار ات انت یکے جاہے منی چم کپت انت باز مچی ات ہیران بوتاں بریں چے بوہگ ءَ انت؟

بازار ءَ کل جاہاں چہ گیش اے جاہ ءَ مچی ات بزاں پس ءِ منڈی ات ہمک نیمگ ءَ پس ءُُ گوک گامیشانی سوادا بوہگ ءَ ات اے جاہ ٹیکسی ہم باز ات ءَ چہ اے جاہ ءَ اے دمگ ءِ مالداری ءِ بابت ءَ سرپدی ریست نصیر آباد جٹ پٹ ءِ بازار بے ترتیب ڈول ءَ ات کہ پشتی نمبگ ءَ لوگ ءُُ گسانی آبادی ات ۔

بازار ءِ تہا یک جاہے بلوچ زالبول ءِ کرسی ءِ سرا نشتگ آئی ءِ دست ءَ ڈرپے جنوک ات چہ ہمے حبر ءَ اے جاہ ءِ دیمرائی ءِ بابت ءَ سرپدی رسیت۔

اے بازار ءِ تہا باز جاہاں پوسٹرءُُ بینرانی سرا سندھی زبان ءَ نبشتہ گندگ ءَ آھت اے مئے ہند ات بلئے مئے زبان ۔۔۔۔۔۔۔۔۔؟؟؟

راجے کہ بہ بیت گنگ نہ مانیت ‘‘ مئے بس ءَ کساس یک بج ءِ وہد ءَ پہ نہادی ءِ ہاترا ہوٹلےءَ داشت اے ہوٹل چلءُُ لیگاریں ہوٹلے ات واجکار ءَ ابید مےئے سوج ءَ ما ورگ آرت اے ہوٹل ءَ کرسی ءُُ ٹیبلانی جاہ ءَ تھت ایر ات ۔

اے ہوٹل ءِ مالک بلوچی زبان ءِ جاہ ءَ سندھی زبان ءَ گپ جت بلئے شکر انت ہوٹل کاردار ءَ گوں ما بلوچی ءَ گپ جت ،ہمے جاہ ءَ یک زھگے بزگیں بلوچ ءَ کہ آئی ءَ گشت ءُُ بوٹ پالش کرت گوں ما بلوچی ءَ گپ جت ءُُ مارا باز مہر دات بلئے آئیءِ دیم ءَ آئی ءِ بزگی ءِ کسہ وت نبشتہ ات ۔

اے جاہ ایوک کہ نفشتہ ءِ تہا بلوچستان انت ،اے جاہ زبان نند ءُُ نیاد دود ءُُ ربیدگ ءِ تہا گیشتر سندھی زبان ءُُ ربیدگ ءِ اثر گندگ ءَ آھت اے جاہ ءَ موسم ہم گرم ات ہچ معلوم نہ بوت کہ جنوری ءِ ماہ انت پیر ءُُ مریدانی باز اثر اے جاہ ءَ گندگ ءَ آھت وھدے ما بس ءَ سوار بوتیں بس ءِ تہا گرمی سبب اے سیءِ چالوکنگ بوت یا ھدا شال ءِ سردی ءَ اے جاہ ءِ گرمی

تئی قدرتانی چے حبر
بس ءِ دیم ءَ روگ ءَ سبزگ گیش بوہان ات انت ہمک نیمگ ءَ کہ چم کپت انت گندیم ءُُ جو ات انت سبزگانی چارگ ءَ دل ءَ تاھیر رست نصیر آباد ءِ شہر ءُُ صحبت پورچہ دور ءَ درا بوت انت بلئے آھانی تہا زند چہ وڑ ات ؟؟

بلوچستان ءُُ سندھ ءِ سیمسراں واجہاں آھت ءُُ مارا چار ات مئے بس کساس دو بج ءَ سندھ ءِ سیمسری شہر جیکب آباد ءَ سر بوت ۔اے جاہ ءَ سرجم ءَ سندھی دود ءُُ ربیدگ گندگ بوت دوکانانی نام ہم سندھی زبان ءَ نبشتہ ات انت۔ پوسٹر ہم سندھی زبان ءَ نبشتہ ات انت ۔

ہمدا من ءَ وتی سیاست دانانی گلامی دوتل ءُُ دوپوستی یات اھت کہ گپ قوم ءُُ راج ءِ جن انت بلئے وتی زبان ءِ جاہ ءَ دری زبانان ءَ گیشتر ارزشت دئینت وت ءَ قوم پرست گش انت قوم پرست شما ات کہ سندھی انت ؟؟؟

اے جاہ ءَ زندگی چہ بلوچستان ءَ ۴۰ درسد شتر ات اے جاہ ءِ لوگ ہم جوانتر انت کوچگانی مردمانی زند ءَ بلوچستان ءِ مردمانی زند ءِ تہا پرک نیست ات مردم ءُُ گامیش یکجا زندگی کنگ ءَ انت ہمے ۔

گسانی دیم ءَ گامیش بستگ انت نزیک ءَ مردمانی وپسگ ءِ نپاد ایر ات انت زالبول ہر جاہ ڈگارانی تہا کار ءَ ات انت اے جاہ ءِ مردمانی رنگ سیاہ چک ات لنٹ ہشک درا بوت انت ھرگسءِ دیم ءَ گامیش گندگ ءَ بوت زالبول ھرجاہ لڈ چنگ ءَ دست گٹ ات انت سندھ ءَ ہمک جاہ ءَ گسانی ڈگارانی تہا تحت گندگ ءَ اتک منی وتی کساس ءَ تحت ہمے ہاترا کارمرز بیت کہ سندھ میدانی جاہ ءِ آپ باز انت ءُُ نمبی سک باز انت مردم زمین ءِ سرا نشت نہ کن انت بلئے بلوچی دوچ ہمک جاہ ءَ گندگ ءَ اتک اے دمگانی بلوچ بزگ انت رنگ ءُُ دروشم ءَ سندھانی رنگ ءَ انت ۔

اے دمگ ءِ بلوچانی زبان دیر انت مرتگ۔ اے سندھی زبان ءَ گپ جن انت اے ھند دمگانی کار گیشتر کشت ءُُ کشاری انت۔ ہمک نیمگءَ کہ چم کپ انت ڈگار انت آپ ءُُ سبزگ انت بلئے زند ہما کہنیں رنگ ءَ انت دوچ ہما کہنیں دوچ انت ۔اے ھندانی مردم ایوک ءَ پہ دو وھدے انسان ءِ ہاترا کلیں زند ءَ جہد کن انت ۔